AKP បន្ទាយមានជ័យ ថ្ងៃទី០៨ ខែតុលា ឆ្នាំ២០២៥-- លោក កែ សួនសុភាព អភិបាលរងខេត្តបន្ទាយមានជ័យ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកថ្មពួក បានថ្លែងអំណរគុណយ៉ាងជ្រាលជ្រៅចំពោះកងកម្លាំងប្រដាប់អាវុធគ្រប់ប្រភេទ ដែលបានខិតខំប្រឹងប្រែងទាំងយប់ទាំងថ្ងៃក្នុងការរក្សាសន្តិសុខ សណ្តាប់ធ្នាប់សាធារណៈ ជាពិសេសការការពារព្រំដែន យ៉ាងរឹងមាំពីការឈ្លានពានរបស់សត្រូវដែលធ្វើឲ្យប្រជាពលរដ្ឋអាចរស់នៅ និងប្រកបរបរចិញ្ចឹមជីវិតដោយគ្មានការភ័យខ្លាច។

ការថ្លែងយ៉ាងដូច្នេះធ្វើឡើងក្នុងឱកាសលោកអភិបាលរង រួមជាមួយលោក ឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ ព្រមទាំងក្រុមការងារ និងអាជ្ញាធរមូលដ្ឋាន បានអញ្ជើញចូលរួមរៀបចំពិធីសាសនាមួយយ៉ាងមហោឡារិក  ស្ថិតក្នុងភូមិសាស្រ្តស្រុកថ្មពួក ខេត្តបន្ទាយមានជ័យ នៅព្រឹកថ្ងៃទី០៨ ខែតុលា ឆ្នាំ២០២៥ ដើម្បីបួងសួងសុំសេចក្តីសុខសាន្ត។

ពិធីនេះគឺដើម្បីប្រារព្ធកម្មវិធីអភិសេកឡើងអាសនៈ និងរូបសំណាកលោកយាយលាភថ្មី ព្រមទាំងកម្មវិធី ឡើងបុស្សបុក រូបសំណាក់ព្រះបាទជ័យវរ្ម័នទី៧ ដើម្បីបួងសួងសុំសេចក្តីសុខ សេចក្តីចម្រើន និងប្រសិទ្ធិពរជ័យជូនដល់វីរកងទ័ព កងកម្លាំងជួរមុខទាំងអស់ ក៏ដូចជាប្រជាពលរដ្ឋទូទាំងខេត្ត ឱ្យរួចផុតពីឧបទ្រពចង្រៃទាំងពួង និងបានសេចក្តីសុខសាន្តជានិច្ចនិរន្តរ៍។

ក្នុងឱកាសដ៏មានសារៈសំខាន់នេះ លោក កែ សួន សុភាព បានមានប្រសាសន៍ថាពិធីអភិសេក និងឡើងបុស្សបុកនាពេលនេះ គឺមិនត្រឹមតែជាការគោរពតាមប្រពៃណី សាសនា និងជំនឿប៉ុណ្ណោះទេ តែជាការបង្ហាញអំពីការដឹងគុណ និងការបួងសួងដល់វត្ថុស័ក្តិសិទ្ធិទាំងអស់ ក្នុងបំណងសុំសេចក្តីសុខ សេចក្តីចម្រើន ជូនដល់វីរកងទ័ព និងកងកម្លាំងជួរមុខ ដែលបានលះបង់គ្រប់បែបយ៉ាងដើម្បីការពារបូរណភាពទឹកដី និងសន្តិភាព។

ទន្ទឹមនោះ លោក កែ សួន សុភាព ក៏បានរំឭកផងដែរថា ស្រុកថ្មពួកជាតំបន់ប្រវត្តិសាស្ត្រមួយដែលធ្លាប់ឆ្លងកាត់ភ្លើងសង្គ្រាមដ៏ជូរចត់ ប៉ុន្តែបច្ចុប្បន្ន ក្រោមម្លប់នៃសន្តិភាព ស្រុកនេះកំពុងមានការរីកចម្រើនគួរឲ្យកត់សម្គាល់ ទាំងផ្នែកហេដ្ឋារចនាសម្ព័ន្ធ ជីវភាពប្រជាពលរដ្ឋ និងសេដ្ឋកិច្ច និងបានអំពាវនាវឱ្យបងប្អូនប្រជាពលរដ្ឋបន្តចូលរួមថែរក្សាសន្តិភាពនេះឱ្យបានគង់វង្សតទៅមុខទៀត។

លោក កែ សួនសុភាព បានបួងសួងដល់ទេវតាឆ្នាំថ្មី វត្ថុស័ក្តិសិទ្ធិទាំងអស់ និងបារមីនៃព្រះបាទជ័យវរ្ម័នទី៧ សូមតាមថែរក្សាឱ្យប្រជាពលរដ្ឋទាំងអស់ ជួបតែសេចក្តីសុខ សុភមង្គល និងចៀសផុតពីជំងឺដង្កាត់ទាំងឡាយ៕

ដោយ ឈុន សារ៉ាត