AKP តាកែវ ថ្ងៃទី០៨ ខែតុលា ឆ្នាំ២០២៥--នៅវត្តអង្គសុវណ្ណសាគរ ឃុំកំណប់ ស្រុកគិរីវង់ ខេត្តតាកែវ បានរៀបចំពិធីចុះសាកសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ចែកជូនដល់គ្រួសារបងប្អូនប្រជាពលរដ្ឋរងគ្រោះដោយទឹកជំនន់ចំនួន១០០គ្រួសារ កាលពីថ្ងៃទី០៧ ខែតុលា ឆ្នាំ២០២៥ ក្រោមអធិបតីភាពរបស់ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ ដោយមានការអញ្ជើញចូលរួមពីអនុប្រធាន សមាជិក សាខាកាកបាទក្រហមកម្ពុជាខេត្តតាកែវ ប្រធាន អនុប្រធាន សមាជិក អនុសាខាកាកបាទក្រហមកម្ពុជាស្រុកគិរីវង់ និងក្រុមគ្រួសារបងប្អូនប្រជាពលរដ្ឋរងគ្រោះដោយទឹកជំនន់ចំនួន១០០គ្រួសារ។

ក្នុងពិធីនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានពាំនាំនូវការផ្ដាំផ្ញើសួរសុខទុក្ខពីសំណាក់ ឯកឧត្ដមបណ្ឌិត ជា វ៉ាន់ដេត ប្រធានកិត្តិយសសាខាកាកបាទក្រហមកម្ពុជា ខេត្តតាកែវ។ ពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់អំពីសុខទុក្ខរបស់បងប្អូនប្រជាពលរដ្ឋ ដែលរងគ្រោះ និងងាយរងគ្រោះគ្រប់ប្រភេទនៅគ្រប់ទីកន្លែង។ ដោយមិនប្រកាន់និន្នាការ ពូជសាសន៍ សាសនា អ្វីឡើយ ដូចពាក្យស្លោក ទីណាមានការលំបាក ទីនោះមានកាកបាទក្រហមកម្ពុជា។

ឯកឧត្តម វ៉ី សំណាង ក៏បានធ្វើការណែនាំ និងក្រើនរំលឹកដល់អាជ្ញាធរមូលដ្ឋាន និងប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ចំពោះគ្រោះមហន្តរាយដែលបង្កឡើងដោយទឹកជំនន់ទឹកភ្លៀង និងខ្យល់កន្ត្រាក់ ជាពិសេសនៅតំបន់ងាយរងគ្រោះ។ ការកើនឡើងនៃកម្រិតទឹកភ្លៀង និងគ្រោះធម្មជាតិ នៅតាមបណ្ដាប្រទេលជិតខាងអាចមានផលប៉ះពាល់មកដល់ខេត្តតាកែវយើងផងដែរ។ ដូច្នេះ សូមអាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ក្នុងការរៀបចំផែនការ ត្រៀមមធ្យោបាយសម្ភារៈ បើមានគ្រោះធម្មជាតិកើតឡើងជាយថាហេតុ ត្រូវជួយអន្តរាគមន៍ឲ្យបានទាន់ពេលវេលា។ត្រូវត្រៀមរៀបចំទីទួលសុវត្ថិភាពឱ្យបានសមរម្យ សម្រាប់ជម្លៀសប្រជាពលរដ្ឋ នៅពេលមានគ្រោះមហន្តរាយកើតឡើង ក្នុងដែនសមត្ថកិច្ចរបស់ខ្លួន។

សូមបញ្ជាក់ថា អំណោយដែលបានចែកជូនបងប្អូនប្រជាពលរដ្ឋរងគ្រោះដោយទឹកជំនន់ចំនួន១០០គ្រួសាររស់នៅឃុំកំណប់ ស្រុកគិរីវង់ ខេត្តតាកែវ ក្នុងមួយគ្រួសារទទួលបានអង្ករ២៥គីឡូក្រាម មី១កេស ទឹកត្រី៣ដប ទឹកស៊ីអ៊ីវ៣ដប កន្ទេល១ មុង១ ភួយ១  និងថវិកាចំនួន២ម៉ឺនរៀល៕

ដោយ អ៊ុច សៀង