AKP កំពង់ធំ ថ្ងៃទី០៨ ខែតុលា ឆ្នាំ២០២៥-- ដើម្បីចូលរួមលើកកម្ពស់ និងគាំទ្រលើវិស័យសុខាភិបាលនៅកម្ពុជា កាលពីថ្ងៃទី០៧ ខែតុលា ឆ្នាំ២០២៥ ក្រុមវេជ្ជបណ្ឌិតមកសហរដ្ឋអាមេរិករបស់អង្គការMedical Mission Outreach តាមរយៈលោក ហ្វីលីព កាស្រ្តូ ជាប្រធានអង្គការ ប៊ីលេគ អភិវឌ្ឍន៍សហគមន៍អន្តរជាតិសហការជាមួយការិយាល័យសុខាភិបាលស្រុកប្រតិបត្តិបារាយណ៍-សន្ទុក ធ្វើការចុះពិនិត្យព្យាបាលជំងឺជូនបងប្អូនប្រជាពលរដ្ឋនៅស្រុកតាំងគោក ខេត្តកំពង់ធំដោយឥតគិតថ្លៃ។

សកម្មភាពរបស់ក្រុមវេជ្ជបណ្ឌិតបានធ្វើការពិនិត្យ និងព្យាបាលជំងឺជូនប្រជាពលរដ្ឋស្រុកតាំងគោកជាច្រើនលើករួចមក ហើយលើកនេះដោយមានកិច្ចសហការបានល្អរបស់លោក ហ្វីលីព កាស្រ្តូ ដោយលោកបានអញ្ជើញក្រុមវេជ្ជបណ្ឌិតមកពិនិត្យ និងព្យាបាលជូនបងប្អូននៅប្រទេសកម្ពុជា។ លោកក៏មានការចាប់អារម្មណ៏ស្រុកតាំងគោក និងបានសន្យាថានឹងអញ្ជើញក្រុមគ្រូពេទ្យដែលជាមិត្តភក្តិបរទេសរបស់គាត់ចំនួន២ក្រុមផ្សេងទៀតមកពិនិត្យព្យាបាលនៅកំឡុងពាក់កណ្តាលខែមករា ឆ្នាំ២០២៦ខាងមុខនេះ។

លោក ហាក់ ម៉ុងហួត អភិបាលស្រុកតាំងគោក បានថ្លែងអំណរគុណដល់លោក ហ្វីលីព កាស្រ្តូ ដែលតែងតែកៀរគរសប្បុរសជនចូលរួមអភិវឌ្ឍជាមួយអាជ្ញាធរស្រុក ជាពិសេសលោកបានកៀរគរមិត្តភក្តិបរទេសរបស់លោកដែលជាក្រុមគ្រូពេទ្យមកពិនិត្យ និងព្យាបាលជំងឺជូនប្រជាពលរដ្ឋនៅពេលនេះ។ សកម្មភាពទាំងនេះជាការចូលរួមចំណែកជាមួយរាជរដ្ឋាភិបាលកម្ពុជា ដែលបាន និងកំពុងតែយកចិត្តទុកដាក់យ៉ាងខ្លាំងចំពោះសុខុមាលភាពរបស់ប្រជាពលរដ្ឋ និងជួយសម្រួលនូវបន្ទុកសេវាចំណាយរបស់ពួកគាត់បានមួយកម្រិត។

លោកអភិបាលស្រុកក៏បានសំណូមពរឱ្យប្រជាពលរដ្ឋទៅរកសេវាសុខភាពនៅមណ្ឌលសុខភាពដែលក្បែរផ្ទះ ព្រោះអាចកាត់បន្ថយនូវការចំណាយលើសេវាឯកជន។ ម្យ៉ាងទៀតតាមមណ្ឌលសុខភាពមានសម្ភារគ្រប់គ្រាន់ មានថ្នាំល្អៗ និងក្រុមគ្រូពេទ្យមានវិជ្ជាជីវៈត្រឹមត្រូវ និងបានផ្តាំផ្ញើឱ្យប្រជាពលរដ្ឋត្រូវចេះថែរក្សាសុខភាពពិសេសចេះអនាម័យខ្លួនប្រាណហូបទឹកស្អាត។

សូមបញ្ជាក់ថា ការពិនិត្យ និងព្យាបាលជំងឺជូនដល់ប្រជាពលរដ្ឋដោយឥតគិតថ្លៃនេះធ្វើឡើងរយៈពេល១ថ្ងៃពេញគឺចាប់ពីម៉ោង៨៖០០នាទីព្រឹក រហូតដល់ម៉ោង៥៖០០ល្ងាច ដោយមានក្រុមគ្រូពេទ្យសហរដ្ឋអាមេរិកចំនួន៦០នាក់ ពេទ្យឯកទេសចំនួន៣០នាក់ ដោយបានពិនិត្យ និងព្យាបាលជំងឺជូនប្រជាពលរដ្ឋបានចំនួន៤៣៣នាក់ (ជំងឺទូទៅ២៥៤នាក់ ជំងឺភ្នែកចំនួន១៥៤នាក់ និងជំងឺមាត់ធ្មេញ២៥នាក់)៕

ដោយ ស៊ុម វណ្ណា