AKP កំពង់ធំ ថ្ងៃទី០៧ ខែតុលា ឆ្នាំ២០២៥-- លោក សាយ គឹមឡម អភិបាលស្រុកស្ទោង កាលពីថ្ងៃទី០៦ ខែតុលា ឆ្នាំ២០២៥ បានប្រកាសគាំទ្រយ៉ាងពេញទំហឹងចំពោះប្រសាសន៍របស់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលបានអំពាវនាវឱ្យពលរដ្ឋឈប់ប្រើប្រាស់ប្រាក់បាតថៃ និងប្ដូរទៅប្រើប្រាស់ប្រាក់រៀលឬដុល្លារដើម្បីពង្រឹងឥទ្ធិពលរូបិយវត្ថុជាតិ សេដ្ឋកិច្ចនិងកាត់បន្ថយហានិភ័យខាតបង់ក្នុងពេលអនាគត។

លោកអភិបាលស្រុកបានបញ្ជាក់ថា រដ្ឋបាលស្រុកស្ទោងនឹងសហការជាមួយអាជ្ញាធរពាក់ព័ន្ធក្នុងការផ្សព្វផ្សាយយុទ្ធនាការជាតិប្រាក់រៀលតាមទីផ្សារ សហគមន៍ និងបណ្តាញសង្គម។ សម្របសម្រួលការប្តូរប្រាក់តាមផ្លូវការណ៍ជាមួយធនាគារ និងភ្នាក់ងារប្តូរប្រាក់ដែលមានអាជ្ញាប័ណ្ណ ដើម្បីឱ្យប្រជាពលរដ្ឋបម្លែងប្រាក់បាតបានងាយស្រួល និងមានសុវត្ថិភាព។ ណែនាំអាជីវកម្មក្នុងស្រុកឱ្យបង្ហាញ និងទូទាត់តម្លៃជាប្រាក់រៀលក្នុងប្រតិបត្តិការប្រចាំថ្ងៃ។ តាមដានការចម្លងព័ត៌មានក្លែងក្លាយនិងរារាំងសកម្មភាពអរិភាពផ្នែករូបិយប័ណ្ណដែលអាចប៉ះពាល់ដល់ស្ថេរភាពទីផ្សារ។

លោក សាយ គឹមឡម ក៏បានអំពាវនាវទៅកាន់ប្រជាពលរដ្ឋ និងពាណិជ្ជករប្រើប្រាស់បណ្តាញទំនាក់ទំនងសង្គមផ្លូវការក្នុងការប្ដូរប្រាក់ រក្សាអធិបតេយ្យភាពរូបិយវត្ថុជាតិ និងកុំអនុវត្តសកម្មភាពប៉ះពាល់ដល់សន្តិសុខសង្គម សេដ្ឋកិច្ច ហើយបានលើកទឹកចិត្តឱ្យគោរពសិទ្ធិនិងសន្តិវិធីក្នុងការអន្តរកម្មជាមួយភាគីជិតខាង ដោយផ្តោតលើផលប្រយោជន៍សេដ្ឋកិច្ចរួមរបស់សហគមន៍។

សកម្មភាពនេះបង្ហាញពីការចូលរួមរបស់រដ្ឋបាលមូលដ្ឋានក្នុងការគាំទ្រគោលនយោបាយរូបិយវត្ថុរបស់ប្រទេសនិងការពង្រឹងការប្រើប្រាស់ប្រាក់រៀលឱ្យកាន់តែទូលំទូលាយ ក្នុងគោលបំណងរក្សាស្ថិរភាពសេដ្ឋកិច្ចនិងការពារផលប្រយោជន៍រយៈពេលវែងរបស់ប្រជាពលរដ្ឋ៕

ដោយ ស៊ុម វណ្ណា