AKP ភ្នំពេញ ថ្ងៃទី០៧ ខែតុលា ឆ្នាំ២០២៥-- ឯកឧត្តម អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា បានថ្លែងអំណរគុណដល់លេខាធិការដ្ឋាន SEAMEO អង្គការយូនីសេហ្វ និងនាយកដ្ឋអធិការកិច្ចគុណភាពអប់រំ ដែលបានរួមចំណែកលើកកម្ពស់វប្បធម៌ប្រើប្រាស់លទ្ធផលផ្អែកលើភស្តុតាង តាមរយៈលទ្ធផលរង្វាយតម្លៃលទ្ធផលសិក្សារបស់សិស្ស ដើម្បីអភិវឌ្ឍគោលនយោបាយអប់រំ និងពង្រឹងគុណភាពអប់រំនៅប្រទេសកម្ពុជា។ ការថ្លែងអំណរគុណរបស់ឯកឧត្តម អ៊ុង បូរាត យ៉ាងដូច្នេះក្នុងឱកាសនៃការថ្លែងបើកសិក្ខាសាលាថ្នាក់តំបន់ទី២ ស្តីពីការផ្សារភ្ជាប់លទ្ធផលទៅនឹងគោលនយោបាយពន្លឿនកំណែទម្រង់ និងអនុវត្តសកម្មភាពផ្អែកលើភស្តុតាង ក្រោមការសហការរៀបចំដោយនាយកដ្ឋានអធិការកិច្ចគុណភាពអប់រំនៃក្រសួងអប់រំ យុវជន និងកីឡា ជាមួយលេខាធិការដ្ឋាន SEA-PLM ថ្នាក់តំបន់ នាថ្ងៃទី០៦ ខែតុលា ឆ្នាំ២០២៥។

ឯកឧត្តម អ៊ុង បូរាត បានថ្លែងថា បញ្ហាប្រឈមដ៏ចម្បងរបស់យើងនាបច្ចុប្បន្ន មិនមែនត្រឹមតែជាការប្រមូលភស្តុតាងប៉ុណ្ណោះទេ ប៉ុន្តែថែមទាំងប្រែក្លាយភស្តុតាងទាំងនោះទៅជាគោលនយោបាយប្រកបដោយប្រសិទ្ធភាព និងសកម្មភាពជាក់លាក់ដើម្បីជាប្រយោជន៍ដល់គ្រប់ថ្នាក់រៀន និងកុមារទាំងអស់ផងដែរ។

ក្នុងឱកាសនោះ ឯកឧត្តមរដ្ឋលេខាធិការបានផ្តល់អនុសាសន៍ណែនាំបន្ថែមមួយចំនួន រួមមាន៖ ១.  ពង្រឹងការប្រើប្រាស់លទ្ធផលដោយកសាងប្រព័ន្ធរង្វាយតម្លៃថ្នាក់ជាតិ និងការវិភាគទិន្នន័យឱ្យបានរឹងមាំដើម្បីធានាថាលទ្ធផលដែលបានពីរង្វាយតម្លៃលទ្ធផលសិក្សារបស់សិស្សថ្នាក់តំបន់ SEA-PLM ថ្នាក់ជាតិ និងកម្រិតថ្នាក់រៀនឆ្លើយតបនឹងកំណែទម្រង់កម្មវិធីសិក្សា ការបណ្តុះបណ្តាលគ្រូបង្រៀន និងបែងចែកធនធាន។ ២. ពង្រឹងសមត្ថភាពគ្រូពង្រៀន និងវិធីសាស្ត្របង្រៀន និង ៣. ជំរុញការទទួលខុសត្រូវរបស់សាលារៀន និងការគាំទ្រដល់សាលារៀន។ ឯកឧត្តមសង្ឃឹម និងជឿជាក់ថា សិក្ខាសាលារយ:ពេល៤ថ្ងៃនេះនឹងសម្រេចបាននូវលទ្ធផលតាមការរំពឹងទុកប្រកបដោយគុណភាព និងប្រសិទ្ធភាពប្រសើឡើង៕

ដោយ៖ ចាន់ សុភឿន (ប្រភព៖ ក្រសួងអប់រំ)