AKP ភ្នំពេញ ថ្ងៃទី០៦ ខែតុលា ឆ្នាំ២០២៥-- «យោងតាមអនុសាសន៍ណែនាំដ៏ខ្ពង់ខ្ពស់របស់សម្តេចបវរធិបតី ហ៊ុន ម៉ាណែត៖ ការអភិវឌ្ឍតំបន់ទេសចរណ៍ធម្មជាតិ ត្រូវគិតពីការផ្តល់ផលជូនប្រជាសហគមន៍ជាអាទិភាព មុនហៅអ្នកពីខាងក្រៅមកវិនិយោគ ជម្រើសនៃការអភិវឌ្ឍបែបនេះ គឺធានាបានការផ្តល់ប្រយោជន៍ដល់ប្រជាសហគមន៍» ដូចនេះ ប្រជាសហគមន៍ត្រូវក្តាប់ជោគវាសនារបស់ខ្លួន តាមរយៈសក្តានុពលដែលមានស្រាប់នៅសហគមន៍ ដើម្បីបង្កើនសេដ្ឋកិច្ចមូលដ្ឋាន និងកាត់បន្ថយសម្ពាធបរិស្ថាន។ នេះជាការលើកឡើងរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងឱកាសអនុញ្ញាតឱ្យលោក មួង សូនី ប្រធានសមាគម១០០រាត្រី និងក្រុមការងារ ចូលជួបរាយការណ៍វឌ្ឍនភាពការងារក្នុងការរួមចំណែកកិច្ចគាំពារបរិស្ថាន និងជំរុញកោះស្រឡៅជាកោះអព្យាក្រឹតកាបូន។

ក្នុងឱកាសនោះ ឯកឧត្តមបណ្ឌិតរដ្ឋមន្រ្តីបានផ្តល់អនុសាសន៍ថា ដើម្បីឱ្យសហគមន៍កោះស្រឡៅ ធានាបាននូវទេសភាពស្រស់ត្រកាល បរិស្ថាន ស្អាត និងបៃតង ឆ្ពោះទៅ«កោះអព្យាក្រឹតកាបូន»ក្រសួងបានរៀបចំផែនការជាជំហានយ៉ាងហ្មត់ចត់ និងជាក់លាក់ ផ្តើមជាដំបូងសូមឱ្យប្រជាសហគមន៍ និងអាជ្ញាធរពាក់ព័ន្ធរួមគ្នាសំអាតកោះស្រឡៅយើងឱ្យបានស្អាតសិន រៀបចំទុកដាក់បែងចែកសំរាមជាជីកំប៉ុស្តិ៍ និងឡដុតសំរាមសំណល់ប្លាស្ទិកដោយប្រើប្រាស់សូឡា ជំហានបន្ទាប់ការបំពាក់នូវហេដ្ឋារចនាសម្ពន្ធ័ផ្សេងៗបម្រើតម្រូវការចាំបាច់របស់ប្រជាសហគមន៍ដោយប្រើប្រាស់ថាមពលស្អាត និងជំហានចុងក្រោយ ជំរុញ និងលើកកម្ពស់ជីវភាពប្រជាសហគមន៍តាមរយៈអេកូទេសចរណ៍ធម្មជាតិ ការចិញ្ចឹមពូជក្តាមធម្មជាតិ ការការពារ និងដាំស្តារឡើងវិញព្រៃកោងកាង និងដើមក្រវាញ។

ឯកឧត្តមបណ្ឌិតរដ្ឋមន្រ្តីបន្តថា ជំហានទាំងអស់នេះគឺក្រសួងឆ្លើយតបទៅបំណងប្រាថ្នាដ៏ពិសិដ្ឋរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាដែលចង់ឃើញជីវភាពសហគមន៍យើងរីកចម្រើន និងចីរភាព។

គួរបញ្ជាក់ថា សហគមន៍កោះស្រឡៅ ស្ថិតក្នុងភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង ដែលហ៊ុមព័ទ្ធដោយព្រៃកោងកាង និងជាទីកន្លែងសម្បូរទៅដោយគ្រឿងសមុទ្រធម្មជាតិស្រស់ៗ ជីវៈចម្រុះជាច្រើនប្រភេទ និងមានប្រជាសហគមន៍អាស្រ័យផលប្រមាណ៣០០គ្រួសារ៕

ដោយ ទេស ច័ន្ទសុធារី (ប្រភព៖ ក្រសួងបរិស្ថាន)