AKP ភ្នំពេញ ថ្ងៃទី០៦ ខែតុលា ឆ្នាំ២០២៥--វគ្គបណ្តុះបណ្តាលសាមគ្គីអូឡាំពិក ស្តីពីគ្រូបង្វឹកកីឡាទ្រីយ៉ាត្លុងកម្រិត១ បានបិទបញ្ចប់ដោយជោគជ័យ កាលពីល្ងាចថ្ងៃទី០៥ ខែតុលា ឆ្នាំ២០២៥ នៅទីស្នាក់ការ NOCC ខណៈវគ្គដ៏សំខាន់នេះត្រូវបានចាត់ទុកថាជាចំណែកដ៏សំខាន់ ក្នុងការអភិវឌ្ឍធនធានគ្រូបង្វឹក និងអត្តពលិកប្រភេទកីឡាអូឡាំពិកមួយនេះឱ្យកាន់តែសម្បូរបែប និងគុណភាពបន្ថែម។

ឯកឧត្តម ណយ ផាណា ទីប្រឹក្សាគណៈកម្មាធិការជាតិអូឡាំពិកកម្ពុជា (NOCC) តំណាងដ៏ខ្ពង់ខ្ពស់ឯកឧត្តមបណ្ឌិតទេសរដ្ឋមន្ត្រី ថោង ខុន ប្រធាន NOC បានគូសបញ្ជាក់ថា នេះជាវគ្គបណ្តុះបណ្តាលដ៏មានសារៈសំខាន់ ដែលបានចែករំលែកចំណេះដឹងពីគ្រូឧទ្ទេសអន្តរជាតិពីររូបជូនដល់សិក្ខាកាមជាគ្រូបង្វឹកកីឡាទ្រីយ៉ាត្លុងកម្ពុជា និងសិក្ខាកាមមកពីប្រទេសវៀតណាម៥នាក់ សរុប២៥នាក់។ ឯកឧត្តមទីប្រឹក្សា NOCC ជឿជាក់ថា សិក្ខាកាមជាគ្រូបង្វឹកទាំងអស់នឹងយកចំណេះដឹងពីវគ្គបណ្តុះបណ្តាលសាមគ្គីអូឡាំពិក ស្តីពីគ្រូបង្វឹកកីឡាទ្រីយ៉ាត្លុងកម្រិត១នេះទៅបង្ហាត់បង្រៀនដល់កីឡាករ កីឡាការិនីរបស់ខ្លួនឱ្យមានគុណភាពល្អប្រសើរ ក្រោយដំណើរការអស់រយៈពេល ៥ថ្ងៃ។

បន្ថែមពីលើនេះ ឯកឧត្តម ណយ ផាណា ក៏ឱ្យសិក្ខាកាមទាំងអស់ស្វែងយល់បន្ថែមឱ្យបានស៊ីជម្រៅអំពីការប្រើប្រាស់សារធាតុហាមឃាត់ក្នុងវិស័យកីឡា ដូពីង ដែលពិភពលោកកំពុងយកចិត្តទុកដាក់ខ្ពស់ ដោយកាលណា កីឡាករ ឬកីឡាការិនីណាម្នាក់ប្រើប្រាស់សារធាតុហាមឃាត់ នោះកីឡាករ ឬកីឡាការិនីរូបនោះនឹងរងផលប៉ះពាល់យ៉ាងធ្ងន់ធ្ងរដល់ខ្លួនឯង ក្រុមគ្រូសារ និងកិត្តិយសជាតិជាដើម រហូតដល់អន្តរជាតិដកមេដាយវិញ និងត្រូវបានដាក់ទណ្ឌកម្មទៀត។ ជាមួយគ្នានេះ ក្នុងនាមតំណាងដ៏ខ្ពង់ខ្ពស់ឯកឧត្តមបណ្ឌិតទេសរដ្ឋមន្ត្រីប្រធានNOCC ឯកឧត្តមបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងចែករំលែកចំណេះជំនាញពីគ្រូឧទ្ទេសទាំងពីររូប និងការប្រឹងប្រែងក្រេបជញ្ជក់ចំណេះដឹងរបស់សិក្ខាកាមទាំងអស់ផងដែរ។

ជាមួយគ្នានេះ លោក ងិន សុខបញ្ញា អគ្គលេខាធិការ សហព័ន្ធកីឡាទ្រីយ៉ាត្លុងកម្ពុជាបានជម្រាបជូនថា វគ្គបណ្តុះបណ្តាលសាមគ្គីអូឡាំពិក ស្តីពីគ្រូបង្វឹកកីឡាទ្រីយ៉ាត្លុងកម្រិត ១ បានធ្វើឡើងចាប់ពីថ្ងៃទី០១-០៥ ខែតុលា ឆ្នាំ២០២៥ នៅរាជធានីភ្នំពេញ។ ផ្អែកតាមផែនការប្រចាំឆ្នាំ២០២៥របស់ NOCC និងសហព័ន្ធកីឡាទ្រីយ៉ាត្លុងកម្ពុជាបានបើកវគ្គបណ្តុះបណ្តាលសាមគ្គីអូឡាំពិក ស្តីពី គ្រូបង្វឹកកីឡាទ្រីយ៉ាត្លុងកម្រិត១ តាមរយៈគម្រោង Olympic Solidarity និង World Triathlon។ វគ្គបណ្តុះបណ្តាលនេះ មានការចូលរួមរបស់លោកគ្រូអ្នកគ្រូចំនួន  ២៥នាក់ (ស្រី៧នាក់) ក្នុងនោះមានលោកគ្រូអ្នកគ្រូអញ្ជើញមកពីប្រទេសវៀតណាម ៥នាក់។

អគ្គលេខាធិការរូបនេះបន្ថែមថា វគ្គនេះមានគ្រូឧទ្ទេស ២រូប បញ្ជូនមកពីសហព័ន្ធកីឡាទ្រីយ៉ាត្លុងពិភពលោក(World Triathlon) រួមមាន៖ លោក ANTHONY LOZADA ជនជាតិហ្វឺហ្វីពីន និងលោកស្រី PHAM THUY VI ជនជាតិវៀតណាម។ គ្រូបង្វឹកកីឡាទ្រីយ៉ាត្លុងកម្រិត១នេះត្រូវបានរចនាឡើងសម្រាប់បុគ្គល ដែលមានចំណង់ចំណូលចិត្តចង់សិក្សាស្វែងយល់ និងរួមចំណែកចែករំលែកចំណេះដឹងថ្មីៗ ដើម្បីការរីកលូតលាស់នៃកីឡាទ្រីយ៉ាត្លុងនៅតាមក្លឹបសមាគមរបស់ពួកគេ។ គ្រូបង្វឹកដែលបញ្ចប់ការសិក្សានឹងអាចរៀបចំផែនការហ្វឹកហាត់ កម្មវិធីហ្វឹកហាត់ និងពិនិត្យលើវគ្គមូលដ្ឋានបន្ត ដែលជារឿយៗធ្វើតាមការណែនាំរបស់គ្រូបង្វឹកដែលមានបទពិសោធន៍កាន់តែច្រើននៅពេលពួកគេធ្វើការអភិវឌ្ឍ។ ចំពោះការអនុវត្តជាក់ស្តែង គឺហ្វឹកហាត់បច្ចេកទេសហែលទឹក បច្ចេកទេសជិះកង់ និងរត់ប្រណាំង នៅក្នុងពហុកីឡដ្ឋានជាតិអូឡាំពិក។

លោក ងិន សុខបញ្ញា បានលើករបាយការណ៍វាយតម្លៃថា ឆ្លងកាត់វគ្គសិក្សានេះបានជួយពង្រឹងសមត្ថភាពដល់គ្រូបង្វឹក និងបង្កើនបានធនធានមនុស្សច្រើនបន្ថែមទៀត ពិសេសទទួលបានបច្ចេកទេសថ្មីៗបន្ថែម ដើម្បីដើរឱ្យទាន់សភាពការណ៍សកលលោក បច្ចុប្បន្ន។ លោកចាត់ទុកថា វគ្គបណ្តុះបណ្តាលដ៏មានសារៈសំខាន់នាពេលនេះនឹងក្លាយជាប្រយោជន៍ ក្នុងការពង្រឹងគុណភាពធនធានមនុស្សរបស់កម្ពុជាទាំងគ្រូបង្វឹក និងកីឡាករ កីឡាការិនីទ្រីយ៉ាត្លុងកម្ពុជាឆ្ពោះទៅចូលរួមប្រកួតអន្តរជាតិជាបន្តបន្ទាប់ ជាពិសេសក្នុងដំណើរត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ២០២៩ ដែលជាប្រវត្តិសាស្ត្រថ្មីមួយទៀត ដែលមានការចូលរួមពីប្រតិភូ អត្តពលិកវ័យក្មេង មកពី៤៥ប្រទេសនៃទ្វីបអាស៊ី ក្រោយការធ្វើម្ចាស់ផ្ទះថ្នាក់តំបន់ ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងប្រកបដោយភាពជោគជ័យដ៏ត្រចះត្រចង់៕

ដោយ ហេង ណាលីន