AKP ភ្នំពេញ ថ្ងៃទី០៤ ខែតុលា ឆ្នាំ២០២៥--

វគ្គបណ្តុះបណ្តាលគ្រូបង្វឹកតេក្វាន់ដូ WT ថ្នាក់មូលដ្ឋាន ប្រចាំឆ្នាំ២០២៥ត្រូវបានមន្ត្រីជំនាញខេមរសហព័ន្ធតេក្វាន់ដូចាត់ទុកថាជាការពង្រឹងគុណភាពដល់គ្រូបង្វឹក ក្នុងការបន្តចែករំលែកចំណេះដឹងវិជ្ជាជីវៈដល់កីឡាករ កីឡាការិនីនៅតាមបណ្តាក្លឹបនានាឱ្យកាន់តែសម្បូរបែប និងគុណភាពកាន់តែល្អប្រសើរបន្ថែមទៀត។

នៅក្នុងឱកាសបិទបញ្ចប់ដោយជោគជ័យនូវវគ្គបណ្តុះបណ្តាល ដែលបានធ្វើកាលពីព្រលប់ថ្ងៃទី០៣ ខែតុលា ឆ្នាំ២០២៥ នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ លោក ជាតិ ខេមរា អគ្គហេរញ្ញឹកខេមរសហព័ន្ធតេក្វាន់ដូជម្រាបជូនថា វគ្គបណ្តុះបណ្តាលគ្រូបង្វឹកតេក្វាន់ដូ WT ថ្នាក់មូលដ្ឋានប្រចាំឆ្នាំ២០២៥ រយៈពេល៥ថ្ងៃនេះ មានសិក្ខាកាមមកពីបណ្តាក្លិបកីឡាតេក្វាន់ដូ WT រាជធានីភ្នំពេញ និងខេត្តកណ្តាល សរុបចំនួន ៣២នាក់ (ស្រី ១១នាក់) ក្នុងនោះមកពី រាជធានីភ្នំពេញ ៣០នាក់ (ស្រី ១០នាក់) និងខេត្តកណ្តាល ០២នាក់ (ស្រី ០១នាក់)។

ជាលទ្ធផលបញ្ចប់វគ្គ រួមមាននិទ្ទេសល្អ៦នាក់ (ស្រី២នាក់) ស្មើនឹង ១៩ ភាគរយ ល្អបង្គួរ ១២នាក់ (ស្រី៤នាក់) ស្មើនឹង ៣៧,៥ ភាគរយ និងមធ្យមចំនួន១៤នាក់ (ស្រី៥នាក់) ស្មើនឹង ៤៣,៥ ភាគរយ។ វគ្គបណ្តុះបណ្តាលគ្រូបង្វឹកតេក្វាន់ដូ WT ថ្នាក់មូលដ្ឋាន ឆ្នាំ២០២៥ អាចដំណើរការទៅបាន   ដោយសារមានការគាំទ្រពី ក្រសួងអប់រំ យុវជន និងកីឡា តាមរយៈថវិកាគ្រាំទ្រជួយពន្លឿនដល់ការអភិវឌ្ឍរបស់ខេមរសហព័ន្ធតេក្វាន់ដូប្រចាំឆ្នាំ២០២៥ បានទាន់ពេលវេលា ដោយផ្តល់ឱកាសដល់សិក្ខាកាមទាំងអស់បានក្រេបយកចំណេះដឹង និងទទួលបាននូវបទពិសោធន៍ថ្មីៗ ក្នុងការ   ត្រៀមខ្លួនបង្ហាត់នៅតាមបណ្តាលក្លិបនានា។

លោក គង់ សក្ខិដា អគ្គលេខាធិការរង ខេមរសហព័ន្ធតេក្វាន់ដូ តំណាងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធតេក្វាន់ដូបានគូសបញ្ជាក់ថា ក្នុងនាមតំណាងឯកឧត្តមបណ្ឌិតសភាចារ្យ ហង់ជួន ណារ៉ុន លោកថ្លែងអំណរគុណយ៉ាងជ្រាលជ្រៅដល់គណៈកម្មាធិការប្រតិបត្តិសហព័ន្ធ ដែលបានរៀបចំវគ្គបណ្តុះបណ្តាលគ្រូបង្វឹកតេក្វាន់ដូ WT ថ្នាក់មូលដ្ឋាន ប្រចាំឆ្នាំ២០២៥ ដោយរក្សាបាននូវសុវត្ថិភាព សុខភាពដល់សិក្ខាកាមទាំងអស់ និងលោកគ្រូ CHOI YONGSOK និងលោកគ្រូ CHEON SAMYEONG ជាគ្រូឧទ្ទេស ជំនួយការ និងអ្នកសម្របសម្រួល ប្រព្រឹត្តទៅបានរលូន។

អគ្គលេខាធិការងបន្ថែមថា តាមរបាយការណ៍លទ្ធផលឃើញថា សិក្ខាកាមភាគច្រើនការបង្ហាត់នៅមានកម្រិត ដូច្នេះសូមលោកគ្រូអ្នកគ្រូ ព្យាយាមអនុវត្តខ្លួនឯងឱ្យបានខ្ជាប់ខ្ជួន ព្រោះពាក្យថា«គ្រូ» គឺជាគំរូ និងប្រកបដោយក្រមសីលធម៌វិជ្ជាជីវៈ ក្នុងការបង្ហាត់សិស្ស។ ការរៀបចំវគ្គបណ្តុះបណ្តាលគ្រូបង្វឹកតេក្វាន់ដូ WT ថ្នាក់មូលដ្ឋាន ឆ្នាំ២០២៥ នាពេលនេះគោលដៅ គឺចង់ឱ្យលោកគ្រូអ្នកគ្រូជាសិក្ខាកាមទាំងអស់យកទៅបង្ហាត់ និងអនុវត្តបន្ថែម នៅតាមទីតាំងរៀងៗខ្លួន សម្រាប់ត្រៀមចូលរួមកម្មវិធីប្រកួតតេក្វាន់ដូ WT នានា ទាំងថ្នាក់ជាតិ និងអន្តរជាតិ៕ ដោយ ហេង ណាលីន