AKP ភ្នំពេញ ថ្ងៃទី០៤ ខែតុលា ឆ្នាំ២០២៥--

គ្រូបង្វឹក គ្រូជំនួយ កីឡាករ កីឡាការិនីជម្រើសជាតិកម្ពុជាក្រោមអាយុ១៨ឆ្នាំ សរុប ១២៨នាក់លើ១៣ប្រភេទកីឡាបានឆ្លងកាត់វគ្គសិក្ខាសាលាស្ដីពីវិន័យ និងក្រមសីលធម៌ ដើម្បីកិត្តិយស មោទនភាពជាតិ មុនចូលរួមប្រកួតកីឡាយុវជន អាស៊ី លើកទី៣ នៅប្រទេសបារ៉ែន ដែលគ្រោងនឹងធ្វើឡើងពីថ្ងៃទី២២-៣១ ខែតុលា ឆ្នាំ២០២៥។

ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំយុវជន និងកីឡា និងជាអគ្គលេខាធិការ គណៈកម្មាធិកាជាតិអូឡាំពិកកម្ពុជាបានណែនាំដល់គ្រូបង្វឹក កីឡាករ កីឡាការិនីយុវជនកម្ពុជាទាំងអស់ត្រូវគោរពឱ្យបាននូវវិន័យ ក្រមសីលធម៌ សេចក្តីថ្លៃថ្នូរឱ្យបានខ្ជាប់ខ្ជួន ព្រមទាំងពង្រឹងគុណភាពបច្ចេកទេសក្នុងការហ្វឹកហាត់ និងការប្រកួតឱ្យបានល្អប្រសើរ ដើម្បីកិត្តិយស មោទនភាពជាតិ នៅក្នុងការចូលរួមជាលើកដំបូងរបស់កម្ពុជាជាប្រវត្តិសាស្ត្រ នៅក្នុងការប្រកួតកីឡាយុវជនអាស៊ី លើកទី៣ នៅប្រទេសបារ៉ែន ក្នុងខែតុលា ២០២៥នេះ។

ឯកឧត្តមរដ្ឋលេខាធិការក៏បានជំរុញឱ្យប្រតិភូកីឡា អត្តពលិកកម្ពុជាវ័យក្មេងទាំងអស់ត្រូវយកការប្រកួតនៅប្រទេសបារ៉ែន លើកនេះជាការប្រកួតដ៏សំខាន់ ក្នុងន័យបើកការស្វាគមន៍ប្រកបដោយភាពកក់ក្តៅចំពោះប្រតិភូកីឡាទាំង៤៥ប្រទេសក្នុងទ្វីបអាស៊ី ឆ្ពោះមកកម្ពុជា ដែលត្រៀមទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៤ នាឆ្នាំ២០២៩ ខាងមុខ។ ក្រៅពីការចូលរួមប្រកួតប្រជែង ប្រតិភូកីឡាកម្ពុជានឹងទទួលទង់បន្តវេនធ្វើម្ចាស់ផ្ទះ សម្រាប់ឆ្នាំ២០២៩ ពីម្ចាស់ផ្ទះ បារ៉ែន នៅក្នុងពិធីបិទការប្រកួតជាផ្លូវការ។

លោក យាន គីស៊ីវត្ថា ប្រធានមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡាបានជម្រាបជូនថា មជ្ឈមណ្ឌលជាតិហ្វឹកហ្វឺនកីឡាបានរៀបចំស្តីវគ្គសិក្ខាសាលាស្តីពី វិន័យ និងក្រមសីលធម៌ មុនចូលរួមប្រកួតកីឡាយុវជនអាស៊ីលើក ទី៣ នៅព្រះរាជាណាចក្រប៉ារ៉ន នៅថ្ងៃទី២២-៣១ ខែតុលា ឆ្នាំ២០២៥។ វគ្គសិក្ខសាលានេះធ្វើឡើងចំនួនពីរថ្ងៃ ចាប់ពីថ្ងៃទី០២-០៣ ខែតុលា ឆ្នាំ២០២៥ មានគ្រូឧទ្ទេសចំនួន០៥នាក់ ក្នុងនោះមានចំនួន១៣ប្រភេទកីឡាចូលរួមប្រកួតរួមមាន កីឡាហែលទឹក អត្តពលកម្ម វាយសី បាល់បោះ៣x៣ យូដូ ជីជីតស៊ូ គុនចម្រុះ វាយកូនឃ្លីលើតុ តេក្វាន់ដូWT ចំបាប់ លើកទម្ងន់ បាល់ទាត់លើតុ  គុនខ្មែរ សិក្ខាកាមចំនួន១២៨នាក់ គឺផ្ដោតសំខាន់លើប្រតិភូកីឡា គ្រូបង្វឹក គ្រូជំនួយ កីឡាករ កីឡាការិនី ក្រុមកីឡាជម្រើសជាតិថ្នាលត្រៀមចូលរួមប្រកួតកីឡាយុវជនអាស៊ី លើកទី៣ ឆ្នាំ២០២៥ នៅបារ៉ែន។

លោកប្រធានមជ្ឈមណ្ឌលជាតិហ្វឹកហ្វឺនកីឡាបានបន្ថែមថា គោលបំណងនៃការរៀបចំវគ្គសិក្ខាសាលានេះ គឺធ្វើឡើងដើម្បីពង្រឹងបន្ថែមពីលើចំណេះដឹង និងចែករម្លែកបទពិសោធដល់ប្រតិភូកីឡា គ្រូបង្វឹក គ្រូជំនួយ កីឡាករកីឡាការិនី មុនពេលចេញដំណើរទៅចូលរួមប្រកួតកីឡាយុវជនអាស៊ី ឆ្នាំ២០២៥ នៅបារ៉ែន ក្នុងការធ្វើដំណើរទាំងទៅទាំងមក ហូបចុក ស្នាក់នៅ និងការថែទាំសុខភាព ក្នុងកំឡុងពេលស្នាក់នៅ និងហាត់ហ្វឹកហ្វឺន ត្រៀមប្រកួតនៅព្រះរាជាណាចក្របារ៉ែន។ ក្នុងន័យនេះ លោកប្រធានសង្ឃឹមថា លោកគ្រូ អ្នកគ្រូនឹងទទួលបានចំណេះដឹងបទពិសោធន៍ថ្មីៗពីវគ្គសិក្ខាសាលានេះទៅដឹកនាំកីឡាករ កីឡាការិនី ប្រកបដោយសុវត្ថិភាព ជាពិសេសដណ្តើមមេដាយជូនជាតិផងដែរ។

គួរបញ្ជាក់ថា នៅថ្ងៃទី១៣ ខែតុលា ឆ្នាំ២០២៥ ប្រតិភូ អត្តពលិកកម្ពុជាទាំងអស់នឹងជួបជុំគ្នា ដើម្បីទទួលអនុសាសន៍ណែនាំពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ហើយនៅថ្ងៃទី១៦ ខែតុលាខាងមុខនេះ ប្រភេទកីឡាកម្ពុជានឹងត្រូវចាប់ផ្តើមចេញដំណើរជាបន្តបន្ទាប់ ទៅកាន់ប្រទេសបារ៉ែន៕ ដោយ ហេង ណាលីន