AKP កណ្ដាល ថ្ងៃទី០៣ ខែតុលា ឆ្នាំ២០២៥-- ផ្លូវក្រាលខ្សាច់សចំនួន២ខ្សែ ប្រវែង ៩ ៧០០ម៉ែត្រ ទទឹងខ្នងលើ៤,៥ម៉ែត្រ និង៥ម៉ែត្រ ស្ថិតនៅស្រុកអង្គស្នួល ខេត្តកណ្តាល ដែលអនុវត្តដោយមន្ទីរអភិវឌ្ឍន៍ជនបទខេត្តកណ្តាល ត្រូវបានក្រុមការងារអន្តរក្រសួងដឹកនាំដោយឯកឧត្តម ប៉ែន ពេជ្រសាលី រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម ដោយមានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ លោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្ត និងអ្នកពាក់ព័ន្ធ ចុះត្រួតពិនិត្យ និងវាយតម្លៃលទ្ធផលសម្រេចបាន១០០ភាគរយ ការងារថែទាំផ្លូវជាលក្ខណៈខួប នាព្រឹកថ្ងៃទី០៣ ខែតុលា ឆ្នាំ២០២៥។ 

ក្នុងឱកាសចុះពិនិត្យ និងវាយតម្លៃ ឯកឧត្តម ប៉ែន ពេជ្រសាលី រដ្ឋលេខាធិការក្រសួងអភិវឌ្ឍន៍ជនបទ បានឱ្យដឹងថា រាជរដ្ឋាភិបាល បាន និងកំពុងខិតខំអភិវឌ្ឍប្រទេសជាតិលើគ្រប់វិស័យឱ្យកាន់តែមានភាពរីកចម្រើនទៅមុខបន្ថែមទៀត ដោយបានដាក់ចេញនូវ “យុទ្ធសាស្ត្របញ្ចកោណ” ដំណាក់កាលទី១ ដែលបានកំណត់អាទិភាពគន្លឹះ ៥គឺ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ក្រោមបាវចនាដើម្បីកំណើន ការងារ សមធម៌ ប្រសិទ្ធភាព និងចីរភាព ក្នុងគោលដៅអភិវឌ្ឍប្រទេសឈានឆ្ពោះទៅសម្រេចចក្ខុវិស័យ "កម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ ២០៥០"។

ទន្ទឹមនឹងនោះ ឯកឧត្តមរដ្ឋលេខាធិការបានបញ្ជាក់បន្ថែមផងដែរថាដើម្បីបន្តពន្លឿនកិច្ចអភិវឌ្ឍ បាន និងកំពុងជំរុញការអនុវត្តនូវយុទ្ធសាស្ដ្រសំខាន់ៗរបស់ក្រសួង ដែលរួមមានការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រទាក់ក្រឡា ដោយការខិតខំលើកកម្ពស់កម្រិតគុណភាពផ្លូវពីផ្លូវដីស និងផ្លូវដីល្បាយក្រួស ទៅជាផ្លូវក្រាលកៅស៊ូពីរជាន់ និងផ្លូវបេតុង។ កែលម្អលក្ខខណ្ឌនៃការរស់នៅរបស់សហគមន៍ជនបទតាមរយៈ ការជំរុញអាត្រាគ្របដណ្ដប់នៃការផ្គត់ផ្គង់ទឹកស្អាត និងអនាម័យជនបទ ១០០% នៅឆ្នាំ ២០៣០។ ការធ្វើពិពិធកម្មសកម្មភាពសេដ្ឋកិច្ចជនបទ តាមរយៈការបណ្តុះបណ្តាលជំនាញមូលដ្ឋាន បំណិនជីវិត ដើម្បីបង្កើតការងារ និងមុខរបរ ដើម្បីបង្កើនប្រាក់ចំណូលបន្ថែម ក្នុងគោលដៅលើកកម្ពស់ជីវភាព និងសេដ្ឋកិច្ចនៅជនបទឱ្យមានការរីកចម្រើន ជាពិសេសការពង្រឹងតួនាទី ភារកិច្ចរបស់គណៈកម្មការអភិវឌ្ឍន៍ភូមិ ដើម្បីជំរុញការអភិវឌ្ឍភូមិគំរូ។ ការពង្រឹងស្ថាប័ន និងកិច្ចការ តាមរយៈបណ្ដុះបណ្ដាល ពង្រឹងសមត្ថភាពមន្ដ្រីរាជការគ្រប់លំដាប់ថ្នាក់, ការរៀបចំសណ្ដាប់ធ្នាប់ និងការពង្រឹងសាមគ្គីភាព ដើម្បីចូលរួមចំណែកអនុវត្តការងារប្រកបដោយប្រសិទ្ធភាព និងការទទួលខុសត្រូវ។

ឯកឧត្តមរដ្ឋលេខាធិការ បានបញ្ជាក់ថា នៅក្នុងឆ្នាំ២០២៥ មន្ទីរអភិវឌ្ឍន៍ជនបទខេត្តកណ្តាលបានទទួលថវិកា សម្រាប់អនុវត្តការងារថែទាំផ្លូវជាលក្ខណៈខួបចំនួន០២ខ្សែ ប្រវែងសរុប៩៧០០ម៉ែត្រ ទទឹងខ្នងលើ៤,៥ម៉ែត្រ និង៥ម៉ែត្រ ក្រាលកម្រាលខ្សាច់ស ស្ថិតនៅឃុំទួលព្រេជ និងឃុំសំរោងលើ ស្រុកអង្គស្នួល ខេត្តកណ្តាល សម្រាប់ផែនការឆ្នាំ២០២៥ គម្រោង DRR-PM- 2025-No 008 បច្ចុប្បន្នមន្ទីរអភិវឌ្ឍន៍ជនបទខេត្តកណ្តាល បានអនុវត្តការងារសម្រេចលទ្ធផល ១០០ភាគរយ។ ជាលទ្ធផលគណៈកម្មាធិការអន្តរក្រសួង បានសម្រេចឯកភាពការវាយតម្លៃបញ្ចប់ការងារ១០០ភាគរយលើគម្រោងថែទាំខួបផ្លូវក្រាលកម្រាលខ្សាច់ស ចំនួន២ខ្សែនេះ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)