AKP ហាណូយ វៀតណាម, ថ្ងៃទី០៣ ខែតុលា ឆ្នាំ២០២៥ -- លោក Nguyen Van Ba និពន្ធនាយកកាសែត VietNam Net បានលើកឡើង និងធ្វើបទបង្ហាញពាក់ព័ន្ធនឹងការវិវឌ្ឍរបស់កាសែត VietNam Net ក្នុងដំណើរការបរិវត្តកម្មឌីជីថលប្រកបដោយជោគជ័យ និងទទួលបានចំណាត់ថ្នាក់ក្រុមកាសែតកំពូលទី៥ របស់ប្រទេសវៀតណាម។ ការលើកឡើងបែបនេះ ក្នុងឱកាសធ្វើបទបង្ហាញជូន  គណៈប្រតិភូអ្នកសារព័ត៌មានកម្ពុជាដឹកនាំដោយ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាន នៅការិយាល័យកណ្តាលនៃកាសែត VietNam Net នាព្រឹកថ្ងៃទី០៣ ខែតុលា ឆ្នាំ២០២៥ ទីក្រុងហាណូយ សាធារណរដ្ឋសង្គមនិយមវៀតណាម។

លោក Nguyen Van Ba បានបញ្ជាក់ថា កាសែត VietNam Net ត្រូវបានបង្កើតឡើងក្នុងឆ្នាំ១៩៩៧ ហើយរយៈពេលជិត៣០ឆ្នាំមកនេះ កាសែត VietNam Net បានខិតខំអភិវឌ្ឍន៍ខ្លួនក្លាយជាកាសែតអេឡិចត្រូនិកដ៏ល្បី និងទទួលបានចំណាត់ថ្នាក់ក្រុមកាសែតកំពូលទី៥ របស់ប្រទេសវៀតណាម។ លោកនិពន្ធនាយកបានគូសបញ្ជាក់ទៀតថា ដើម្បីបន្តបេសកកម្មយ៉ាងខ្ជាប់ខ្ជួនក្នុងការកសាងកាសែតជាទីទុកចិត្ត ទំនួលខុសត្រូវ  និងការច្នៃប្រឌិត លឿន ត្រឹមត្រូវ មានខ្លឹមសារ និងស្តង់ដារ VietNam Net បានធ្វើបរិវត្តកម្មរឌីជីថលប្រកបដោយជោគជ័យ ផ្តើមចេញពីការកែប្រែផ្នត់គំនិត ទៅជាសកម្មភាពជាក់ស្តែង ដោយផ្តោតលើចំណុចគន្លឹះមួយចំនួន ដូចជា ការពង្រឹងមាតិកា ទិន្នន័យ (Data-driven Content)ដោយដាក់ចេញនូវគោលការណ៍ពង្រឹងគុណភាព និងភាពសម្បូរបែបនៃមាតិកាព័ត៌មានរបស់ខ្លួន ដោយប្រើប្រាស់ប្រព័ន្ធគ្រប់គ្រងទិន្នន័យដើម្បីវិភាគ និងយល់ដឹងពីចំណូលចិត្តអ្នកអាន និងនិន្នាការទីផ្សារ។

នៅក្នុងបទបង្ហាញស្តីពីការផ្លាស់ប្តូរឌីជីថលនេះដែរ លោកស្រី Vũ Linh ប្រធានមជ្ឈមណ្ឌលទីផ្សារ និងបច្ចេកទេសនៃ VietNam Net បានឱ្យដឹងថា ទំនើបភាវូបនីយកម្មដោយប្រើប្រាស់បច្ចេកវិទ្យាទំនើបក្នុងការផលិត ផ្សព្វផ្សាយ និងគ្រប់គ្រងព័ត៌មាន គឺជាគន្លឹះក្នុងការបង្កើនប្រសិទ្ធភាពការងារ តម្លាភាព និងការធានាបាននូវសុវត្ថិភាពព័ត៌មាន ដើម្បីផ្តល់បទពិសោធន៍កាន់តែប្រសើរដល់សាធារណជន។ លោកស្រីបន្តថា VietNamNet បានប្រើប្រាស់បច្ចេកវិទ្យាទំនើប ដូចជាប្រព័ន្ធគ្រប់គ្រងមាតិកា (CMS) គឺជាកម្មវិធីដែលជួយបង្កើត គ្រប់គ្រង រក្សាទុក និងកែប្រែមាតិកាឌីជីថល អាចឱ្យយើងរក្សាទុកមាតិកា ដូចជាកម្មវិធី រូបភាព និងគេហទំព័រ អាចឱ្យយើងធ្វើការផ្លាស់ប្ដូរបានតាមតម្រូវការរបស់ស្ថាប័ន។ ជាងនេះទៅទៀត VietNamNetណ ក៏ប្រើប្រាស់នូវប្រព័ន្ធគ្រប់គ្រងវីដេអូ (VMS) ដែលអាចត្រួតពិនិត្យព្រឹត្តិការណ៍ដោយស្វ័យប្រវត្តិថែមទៀតផង។

ក្នុងឱកាសនោះដែរ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាន និងជាប្រធានប្រតិភូអ្នកសារព័ត៌មានកម្ពុជាបានថ្លែងកោតសរសើរចំពោះវឌ្ឍនភាពលើវិស័យសារព័ត៌មានក្នុងបរិបទទំនើបភាវូបនីយកម្មរបស់កាសែត VietNam Net ដែលបានចែករំលែកបទពិសោធន៍ដ៏ល្អៗ  សម្រាប់ជាចំណេះដឹង បង្កើនសមត្ថភាព និងការឈ្វេងយល់បន្ថែមទៀតដល់អ្នកសារព័ត៌មានកម្ពុជា៕

ដោយ៖ ទូច វលក័្ខណ, រូបថត៖ ខឹម សុវណ្ណារ៉ា