AKP កំពង់ធំ  ថ្ងៃទី0២ ខែតុលា ឆ្នាំ២០២៥

ក្រុមការងារអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនដឹកនាំដោយឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀន និងក្រុមការងារក្រសួងទេសចរណ៍ដឹកនាំដោយឯកឧត្តម ឡោ សុវិជ្ជា នាព្រឹកថ្ងៃទី០២ ខែតុលា ឆ្នាំ២០២៥ បានជួបប្រជាសហគមន៍ទេសចរណ៍សំបូរព្រៃគុក ដើម្បីបញ្ជ្រាបការអប់រំពីបញ្ហាគ្រឿងញៀននិងជំរុញការប្រើប្រាស់ App NoDrug ដើម្បីទទួលចំណេះដឹង និងរាយការណ៍យកបញ្ហាគ្រឿងញៀនចេញពីសហគមន៍ក៏ដូចជាមូលដ្ឋាន។ 

ឯកឧត្ដម ឧត្តមសេនីយ៍ឯក លឹម តុងហួត បានថ្លែងអំណរគុណដល់សហគមន៍និងបានលើកយកបញ្ហាគ្រឿងញៀន និងអត្ថប្រយោជន៍ក៏ដូចជាមុខងារនានាដែលមានបំពាក់ក្នុង App NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀន ដែលរួមមាន៖ កម្សាន្តអប់រំ ព័ត៌មាន មេរៀន ការស្វែងរកការព្យាបាល និងមុខងាររាយការណ៍សម្រាប់ស្វែងរកអន្តរាគមន៍ដោះស្រាយបញ្ហាគ្រឿងញៀនក្នុងសហគមន៍។ 
ក្នុងឱកាសនោះដែរ  ឯកឧត្តម ឡោ សុវិជ្ជា បានថ្លែងថា ប្រជាសហគមន៍នានាដើរតួយ៉ាងសំខាន់ក្នុងការជួយផ្សព្វផ្សាយនូវបញ្ហាគ្រឿងញៀនក៏ដូចជា App NoDrug ដល់សមាជិកប្រជាសហគមន៍ ក្រុមគ្រួសារ ក្នុងគោលបំណងរួមគ្នាគឺសុវត្ថិភាពសហគមន៍ពីបញ្ហាផ្សេងៗក្នុងនោះមានបញ្ហាគ្រឿងញៀនជាចម្បង។ 

ជាមួយគ្នានេះ លោកស្រី ឃី ភារម្យ  ប្រធានភូមិអូរគ្រូកែ និងលោកស្រី គ្រួច សុដានី  អនុប្រធានសហគមន៍ទេសចរណ៍សំបូរព្រៃគុកពួកគាត់សម្ដែងនូវការសប្បាយរីករាយដោយទទួលបានព័ត៌មាន ចំណេះដឹងពាក់ព័ន្ធនឹងបញ្ហាគ្រឿងញៀនពិសេសអត្ថប្រយោជន៍នៃ App NoDrug ហើយពួកគាត់នឹងផ្សព្វផ្សាយពីការយល់ដឹងនេះបន្តដើម្បីការពារប្រជាពលរដ្ឋ-ប្រជាសហគមន៍និងក្រុមគ្រួសាររបស់ពួកគាត់។
លោកអនុសេនីយ៍ឯក ម៉េង សេរីរត្ន នគរបាលទេសចរណ៍បានសម្ដែងនូវការរំភើបរីករាយ និងបានសន្យាចូលរួមជួយបង្កើតមាតិកាផ្សព្វផ្សាយ App NoDrug ដើម្បីបង្ការទប់ស្កាត់បញ្ហាគ្រឿងញៀន ការពារអ្នកទេសចរណ៍ ដែលមកកម្សាន្ដនៅរមណីយដ្ឋានប្រាសាទសំបូរព្រៃគុក។ លោកអនុសេនីយ៍ឯកក៏បានសំណូមពរឱ្យប្រជាពលរដ្ឋដែលបានទៅទស្សនារមណីយដ្ឋានវប្បធម៌ប្រវត្តិសាស្ត្រប្រាសាទសំបូរព្រៃគុកដែលគួរជាទីរមនាសម្រាប់ភ្ញៀវទេសចរណ៍ជាតិនិងអន្តរជាតិ៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន