AKP  Quang Ninh វៀតណាម, ថ្ងៃទី០១ ខែតុលា ឆ្នាំ២០២៥ -- មជ្ឈមណ្ឌលបម្រើសេវាសាធារណៈខេត្ត Quang Ninh (Quang Ninh Provincial Public Administration Service Center - PAC) ជាកន្លែងដែលផ្តល់សេវារដ្ឋបាលរហូតដល់ទៅ ១៥ មន្ទីរ ហើយទទួលបានការគាំទ្រពីប្រជាជន និង អ្នកវិនិយោគ រោងចក្រសហគ្រាស ឧស្សាហកម្ម និងការធ្វើពាណិជ្ជកម្មមកពីខេត្ត ក្រុងនានា ដែលជាលទ្ធផលដ៏ប្រសើរពីការកែទម្រង់រដ្ឋបាលសាធារណៈរបស់ខេត្ត Quang Ninh សាធារណរដ្ឋសង្គមនិយមវៀតណាម។ នេះគឺជាការលើកឡើងរបស់លោក Nguyen Thanh Tung អនុប្រធានមន្ទីរវប្បធម៌ កីឡា និងទេសចរណ៍ខេត្ត Quang Ninh ក្នុងឳកាសគណៈប្រតិភូសារព័ត៌មានកម្ពុជាទស្សនកិច្ចមជ្ឈមណ្ឌលបម្រើសេវាសាធារណៈរបស់ខេត្ត Quang Ninh ច្រកចេញ-ចូលតែមួយរបស់ខេត្ត នារសៀលថ្ងៃទី០១ ខែតុលា ឆ្នាំ២០២៥។

លោក Nguyen Thanh Tung បានបញ្ជាក់ថា សេវារដ្ឋបាលសាធារណៈ គឺជាការិយាល័យរបស់ខេត្តដែលផ្តល់សេវាកម្មជាច្រើន ដែលអនុញ្ញាតឱ្យអតិថិជនចូលប្រើសេវាកម្មទាំងនោះ ប្រកបដោយគុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាព តាមរយៈការប្រមូលផ្តុំការផ្តល់សេវារដ្ឋបាលនានានៅកន្លែងតែមួយ។ លោកបានបន្តថា ក្នុងបរិបទ បរិវត្តកម្ម Digital បានធ្វើឳ្យមជ្ឈមណ្ឌលបម្រើសេវាសាធារណៈខេត្តមួយនេះ អាចផ្តល់នូវសេវាសាធារណៈសម្បូរបែប នីតិវិធីសាមញ្ញ មានភាពងាយស្រួលដល់អតិថិជន ក្នុងការដាក់ពាក្យស្នើសុំ បង់ប្រាក់កម្រៃ និងទទួលបានលទ្ធផលសម្រេចជាផ្លូវការ តាមប្រព័ន្ធអនឡាញ។ 

ក្នុងឱកាសនោះ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា និងជាប្រធានគណៈប្រតិភូមន្ត្រីព័ត៌មានកម្ពុជា បានមានស្រសាសន៍កោតសរសើរ និងវាយតម្លៃខ្ពស់ចំពោះការរីកចម្រើន និងអភិវឌ្ឍផ្នែកបច្ចេកវិទ្យាឌីជីថលដ៏ទំនើបរបស់រដ្ឋបាលខេត្ត Quang Ninh ក្នុងការពង្រីកសេវាកម្មសាធារណៈដល់ពលរដ្ឋកាន់តែងាយស្រួល ឆាប់រហ័ស និងមានប្រសិទ្ធភាព៕

ដោយ៖ ទូច វលក័្ខណ រូបថត៖ ខឹម សុវណ្ណារ៉ា