AKP ភ្នំពេញ ថ្ងៃទី០១ ខែតុលា ឆ្នាំ២០២៥-- ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ បានលើកឡើងថា ការងារនៅប្រទេសយើងគឺមានច្រើនណាស់ បងប្អូនអាចចូលធ្វើដោយគ្មានហានិភ័យនិងគ្មានការរើសអើងដូចធ្វើនៅក្រៅប្រទេសនោះទេ។ ការលើកឡើងដូច្នេះបានធ្វើឡើងក្នុងឱកាសដែលឯកឧត្តមជួបសំណេះសំណាលជាមួយបងប្អូនអតីតពលករចំណាកស្រុកដែលកំពុងបម្រើការនៅក្នុងរោងចក្រស៊ីគ្លូ ខេត្តកំពង់ស្ពឺ នាថ្ងៃទី០១ ខែតុលា ឆ្នាំ២0២៥។

ឯកឧត្តមឧបនាយករដ្ឋមន្ត្រីបានមានប្រសាសន៍បន្តថា រាជរដ្ឋាភិបាលបានយកចិត្តទុកដាក់ដល់បងប្អូនទាំងអស់ដែលបានវិលត្រឡប់មកវិញ ជាពិសេសបានខិតខំប្រឹងប្រែងស្វែងរកឱកាសការងារក្នុងស្រុកជូនដល់បងប្អូន។ បន្ថែមពីលើនេះ សម្តេចមហាបវរធិបតីក៏បានណែនាំដល់ក្រសួងមហាផ្ទៃ និងរដ្ឋបាលរាជធានី-ខេត្តឱ្យជួយសម្រួលដល់ការធ្វើអត្តសញ្ញណបណ្ណថ្មីដល់បងប្អូនដែលអត្តសញ្ញាណប័ណ្ណផុតសុពលភាព ឬមិនទាន់មានអត្តសញ្ញាណប័ណ្ណឱ្យបានឆាប់រហ័សផងដែរ។

‎ឯកឧត្តមបានគូសបញ្ជាក់ថា កម្ពុជាបច្ចុប្បន្ន មិនដូចកម្ពុជាកាលពី២០ឆ្នាំមុននោះទេ បើនិយាយពីប្រាក់ឈ្នួល គឺមានការកើនឡើងជាបន្តបន្ទាប់ ជាមួយនឹងអត្តប្រយោជន៍ផ្សេងៗជាច្រើនទៀត ខណៈដែលការងារនៅជិតផ្ទះ មានភាពកក់ក្តៅជាងការងារនៅឆ្ងាយពីក្រុមគ្រួសារ។ហើយចំពោះវត្តមាននៃការវិលត្រឡប់មកវិញរបស់ពលករខ្មែរ រាជរដ្ឋាភិបាលក៏ដូចអាជ្ញាធរខេត្ត ក្រុងបានយកចិត្តទុកដាក់និងសម្របសម្រួលគ្រប់បែបយ៉ាងធ្វើយ៉ាងឱ្យបងប្អូនទទួលបានការងារដោយមិនចាំបាច់វិលត្រឡប់ទៅវិញ ដែលអាចប្រឈមនូវហានិភ័យ និងការមើលងាយពីពួកក្រុមជ្រុលនិយមថៃទៀតនោះទេ។យ៉ាងណាម៉ិញចំពោះប្រាក់ឈ្នួលនាពេលបច្ចុប្បន្នក៏មិនចាញ់ប្រទេសថៃនោះដែរ ហើយកាន់តែពិសេសគឺមួយខែបងប្អូនអាចបើកបានរហូតដល់ទៅ២ដង។

ទន្ទឹមនោះ ឯកឧត្តមឧបនាយករដ្ឋមន្ត្រី ហ៊ុន ម៉ានី ក៏បានជំរុញឱ្យអាជ្ញាធរ និងមន្ទីរជំនាញជួយសម្របសម្រួលរាល់ឯកសារផ្សេងៗដល់បងប្អូនដើម្បីផ្តល់ភាពងាយស្រួលក្នុងការស្នាក់នៅនិងរកការងារធ្វើ។

បងប្អូនដែលបានត្រឡប់មកវិញបានបង្ហាញនូវក្តីសប្បាយរីករាយដែលបានវិលត្រឡប់មកស្រុកកំណើតវិញ ហើយមានការងារធ្វើសមរម្យដោយសន្យាថាមិនវិលត្រឡប់ទៅធ្វើការនៅប្រទេសថៃទៀតទេ៕

ដោយ លឹម សាន្ត