AKP ភ្នំពេញ ថ្ងៃទី០១ ខែតុលា  ឆ្នាំ២០២៥-- ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងសហការី បានអញ្ជើញចូលរួមកិច្ចប្រជុំរដ្ឋមន្រ្តីកសិកម្មនិងព្រៃឈើអាស៊ាន លើកទី៤៧ (47th AMAF) ដែលប្រព្រឹត្តទៅនៅរដ្ឋធានីម៉ានីល ប្រទេសហ្វីលីពីន នាថ្ងៃទី០១ ខែតុលា ឆ្នាំ២០២៥ ។

ឯកឧត្តមរដ្ឋមន្រ្តី បានធ្វើបទអន្តរាគមន៍គាំទ្រ និងឯកភាពអនុម័តលើឯកសារគោលនយោបាយសំខាន់ៗ រួមមាន៖ ផែនការយុទ្ធសាស្រ្តវិស័យស្បៀង កសិកម្ម និងព្រៃឈើអាស៊ានឆ្នាំ២០២៦-២០៣០ និងសេចក្តីថ្លែងការរបស់ថ្នាក់ដឹកនាំកំពូលអាស៊ាន ស្តីពីចក្ខុវិស័យស្បៀង កសិកម្ម និងព្រៃឈើអាស៊ានឆ្ពោះទៅកាន់ឆ្នាំ២០៤៥ រួមជាមួយក្របខ័ណ្ឌសហប្រតិបត្តិការ ដែលផ្តល់ជាចក្ខុវិស័យនិងបដិវត្តកម្មវែងឆ្ងាយក្នុងតំបន់អាស៊ាន។

ឯកឧត្តមរដ្ឋមន្រ្តីបានគាំទ្រសមិទ្ធផលអាទិភាពសេដ្ឋកិច្ច(PEDs) របស់ប្រធានអាស៊ានប្តូរវេនហ្វីលីពីនដែលរួមមាន៖ ១-ផែនការប្រតិបត្តិសម្រាប់ប្រព័ន្ធកសិកម្មប្រកបដោយបុនភាវកម្ម(Regenerative) និងភាពធន់ និង២-គំនិតផ្តួចផ្តើមអាស៊ានក្នុងការអនុវត្តកម្មវិធីដាំឈើមួយពាន់លានដើម។

ឯកឧត្តមរដ្ឋមន្រ្តីបានកោតសរសើរចំពោះកិច្ចខិតខំប្រឹងប្រែងរបស់ក្រុមការងារអាស៊ានតាមវិស័យដែលបានធ្វើសុខុដមនីយកម្មស្តង់ដារ និងស្នើឱ្យក្រុមការងារយកចិត្តទុកដាក់បង្កើតសេចក្តីណែនាំដែលមានលក្ខណៈវិទ្យាសាស្ត្រ អាចអនុវត្តបានសំដៅលើកកម្ពស់ទីផ្សារ និងពង្រឹងពាណិជ្ជកម្មក្នុងនិងក្រៅតំបន់អាស៊ាន ព្រមទាំងលើកកម្ពស់ការប្រកួតប្រជែងអន្តរជាតិនៃផលិតផលកសិ-ស្បៀងអាហារអាស៊ានផងដែរ៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)