AKP ភ្នំពេញ ថ្ងៃទី០១ ខែតុលា ឆ្នាំ ២០២៥–មន្រ្តីនៃក្រសួងព័ត៌មាន អ្នកសារព័ត៌មាន និងអ្នកផ្សព្វផ្សាយតាមបណ្តាញសង្គមប្រមាណ១៦០នាក់បានទទួលការបណ្តុះបណ្តាលជនបង្គោលសម្រាប់ការផ្សព្វផ្សាយអប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀន នៅ ទីស្តីការក្រសួងព័ត៌មាន។
       ថ្លែងក្នុងពិធីបើកវគ្គបណ្តុះបណ្តាល នា ព្រឹកថ្ងៃទី០១ ខែតុលា ឆ្នាំ២០២៥ នៃ ទីស្តីការក្រសួងព័ត៌មាន ឯកឧត្តម ថុង គន្ធយុឡេង នាយករងខុទ្ទកាល័យ ឯកឧត្តម រដ្ឋមន្ត្រីក្រសួងព័ត៌មាន និងជាអនុប្រធានអចិន្ត្រៃយ៍លេខាធិការដ្ឋាននៃគណៈកម្មការទទួល បន្ទុកផ្សព្វផ្សាយអប់រំ ឱ្យដឹងថាតាមរយៈការបណ្តុះបណ្តាលដល់មន្ត្រីទទួលបន្ទុកនៃកិច្ចការងារព័ត៌មានចំណុះក្រសួងព័ត៌មាន អ្នកសារព័ត៌មាន ពិធីករ ពិធីការិនី សិល្បៈករ សិល្បៈការិនី និងអ្នកបង្កើតមាតិកាលើបណ្តាញទំនាក់ទំនងសង្គម នឹងប្រែក្លាយខ្លួនជាអ្នកនាំសារល្អសុច្ឆនៈ ដែលជាបង្គោល និងត្រូវបានចងក្រងជាក្រុមស្នូលមួយសម្រាប់ការងារផ្សព្វផ្សាយអប់រំជាបន្តទៀត ដែលជាកិច្ចការអាទិភាព ក្នុងចំណោមកិច្ចការងារសំខាន់ផ្សេងទៀតនៅក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល។

ឯកឧត្តម អនុប្រធានអចិន្ត្រៃយ៍លេខាធិការដ្ឋាននៃគណៈកម្មការទទួល បន្ទុកផ្សព្វផ្សាយអប់រំ បានធ្វើការគូសបញ្ជាក់អំពីតួនាទី និងភារកិច្ចរបស់ក្រសួងព័ត៌មាន ថាតើមានអ្វីខ្លះ និងបានធ្វើអ្វីខ្លះ សម្រាប់កិច្ចការងារអប់រំ និងផ្សព្វផ្សាយ ស្តីពីបញ្ហាគ្រឿងញៀន ក្រៅពីមុខងារស្នូលរបស់ខ្លួន។ ក្រៅពីដើរតួនាទីជាស្ថាប័នទំនាក់ទំនងសាធារណៈរបស់រាជរដ្ឋាភិបាល និងស្ថាប័នគ្រប់គ្រប់វិស័យព័ត៌មាន និងសោតទស្សន៍នៅកម្ពុជា ក្រសួងព័ត៌មានបានអនុវត្តដោយសកម្ម បុរេសកម្ម និងអន្តរសកម្ម ក្នុងការ គ្រប់គ្រងសាធារណមតិជាតិ និងអន្តរជាតិ ជាពិសេសធានាឱ្យបាននូវសន្តិសុខព័ត៌មាននៅកម្ពុជា តួយ៉ាង ធានាបាននូវការទទួលបាននូវព័ត៌មានដោយមិនមានការរើសអើង ព័ត៌មានដែលមានគុណភាព និងព័ត៌មានពិត។
     ឯកឧត្តម នាយឧត្តមសេនីយ៍ មាស វិ រិទ្ធ អគ្គលេខាធិការ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងបញ្ជាក់ឱ្យដឹងថា៖ការបណ្តុះបណ្តាលដល់អ្នកសារព័ត៌មាននេះជាផ្នែកមួយយ៉ាងសំខាន់ថែមទៀតសម្រាប់ផ្តល់នូវចំណេះដឹងក្នុងការចូលរួមផ្សព្វផ្សាយនៃការប្រយុទ្ធប្រឆាំងគ្រឿងញៀន។

      អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងដោយបញ្ជាក់ដែរថា៖បញ្ហាគ្រឿងញៀនជារឿងស្មុគស្មាញ ហើយយើងនឹងរួមគ្នាដោះស្រាយបន្តិចម្តងៗរហូតទាល់តែទទួលបានជោគជ័យ។
      គួរបញ្ជាក់ថាសម្រាប់វគ្គបណ្តុះបណ្តាលនាឱកាសនេះ មានរយៈពេល ២ថ្ងៃ ចាប់ពីថ្ងៃទី០១ ដល់ទី០២ តុលា ឆ្នាំ២០២៥ ដែលមានសិក្ខាកាមចូលរួមសរុបទាំងអស់ចំនួន ១៦០រូប ដែលជាមន្ត្រីទទួលបន្ទុកកិច្ចការងារព័ត៌មាននៃអង្គភាពចំណុះក្រសួងព័ត៌មាន ចំនួន ៩៣រូប អ្នកសារព័ត៌មានចំនួន ១៨រូប (មកពីអង្គភាពចំនួន ១០) ពិធីករ-ពិធីការិនី ចំនួន ២១រូប (មកពីស្ថានីយ៍ទូរទស្សន៍និងវិទ្យុ ចំនួន៦) សិល្បៈករ-សិល្បៈការិនី ចំនួន ១០រូប និងអ្នកបង្កើតមាតិកាដែលមានប្រជាប្រិយភាពលើបណ្តាញ ទំនាក់ទនងសង្គម (ក្នុងនោះរួមមានអ្នកផលិតមាតិកាពាក់ព័ន្ធនឹងចំណេះដឹងទូទៅ សុខភាព កីឡា ម្ហូប អាហារជាដើម-ល-) មានចំនួន ១៨រូប៕

ដោយ៖ មករា