‎AKP កំពង់ធំ ថ្ងៃទី០១ ខែតុលា ឆ្នាំ២០២៥-- លោក អ៊ុង វុទ្ធី អភិបាលរងខេត្តកំពង់ធំ នាព្រឹកថ្ងៃទី០១ ខែតុលា ឆ្នាំ២០២៥ បានជួបសំណេះសំណាលជាមួយមន្ត្រីសុខាភិបាល និងពិនិត្យស្ថានភាពក្នុងការពិនិត្យព្យាបាលនៅមន្ទីរពេទ្យបង្អែកបារាយណ៍-សន្ទុក ដោយមានការចូលរួមអមដំណើរដោយលោកវេជ្ជបណ្ឌិត ប៉ឹក គឹមសាន អនុប្រធានមន្ទីរសុខាភិបាលខេត្តកំពង់ធំ លោកវេជ្ជបណ្ឌិត ញ៉ែម ពីង ប្រធានការិយាល័យសុខាភិបាលស្រុកប្រតិបត្តិបារាយណ៍-សន្ទុក ប្រធានមន្ទីរពេទ្យបង្អែកបារាយណ៍-សន្ទុក និងប្រធានមណ្ឌលសុខភាពទាំង២២នៅស្រុកតាំងគោក ស្រុកបារាយណ៍ និងស្រុកសន្ទុក។

លោកវេជ្ជបណ្ឌិត ញ៉ែម ពីង បានលើកឡើងអំពីស្ថានភាពទូទៅនៃការិយាល័យសុខាភិបាលស្រុកប្រតិបត្តិបារាយណ៍-សន្ទុកគឺ÷ ១.គ្របដណ្តប់មន្ទីរពេទ្យបង្អែកកម្រិតCPA2 ២. មណ្ឌលសុខភាពចំនួន២២ ៣. ប៉ុស្តិ៍សុខភាពចំនួន០៣ ៤. គ្របដណ្តប់ឃុំរដ្ឋបាលចំនួន២៦ និងភូមិ២៦៦ភូមិ និងកំពុងដំណើរការសាងសង់មណ្ឌលសុខភាពចំនួន០៣បន្ថែមទៀតនៅឃុំក្រយា ឃុំបាក់ស្នា និងឃុំបឹងល្វា ស្រុកសន្ទុក ខេត្តកំពង់ធំ។

លោកវេជ្ជបណ្ឌិត ប៉ឹក គឹមសាន បានលើកឡើងពីស្ថានភាពភូមិសាស្ត្រគ្របដណ្តប់សុខាភិបាលនៅខេត្តកំពង់ធំរួមមាន៖ មន្ទីរពេទ្យបង្អែកចំនួន៣ និងមណ្ឌលសុខភាព៥៦ និងប៉ុស្តិ៍សុខភាពចំនួន៥។ នៅមុនឆ្នាំ១៩៩២ មានមណ្ឌលសុខភាពតែ៤៨មណ្ឌលសុខភាព តែបច្ចុប្បន្នមាន៨មណ្ឌលសុខភាពបន្ថែមទៀត និងកំពុងដំណើរការសាងសង់បន្ថែមទៀតដើម្បីបំពេញតម្រូវការរបស់ប្រជាពលរដ្ឋក៍ដូចជារួមចំណែកជាមួយរដ្ឋាភិបាលក្នុងការបង្កើនប្រសិទ្ធភាព គុណភាពសុខភាពរបស់ប្រជាពលរដ្ឋ និងកាត់បន្ថយការធ្វើដំណើររបស់បងប្អូនប្រជាពលរដ្ឋ។

លោក អ៊ុង វុទ្ធី បានណែនាំឱ្យលោកគ្រូ អ្នកគ្រូជាមន្ត្រីសុខាភិបាល យកចិត្តទុកដាក់បម្រើសុខភាពប្រជាពលរដ្ឋឱ្យកាន់តែល្អប្រសើរ។ វិជ្ជាជីវៈវេជ្ជសាស្រ្តគឺជាវិជ្ជាជីវៈដែលត្រូវដាក់ផលប្រយោជន៍អ្នកជំងឺលើសផលប្រយោជន៍ផ្ទាល់ខ្លួន។ គ្រូពេទ្យត្រូវមានកាតព្វកិច្ចចំពោះអ្នកជំងឺ វិជ្ជាជីវៈនិងសង្គមត្រូវធ្វើការងារប្រកបដោយក្រមសីលធម៌ ក្តីស្មោះត្រង់ កិត្តិយស និងភាពថ្លៃថ្នូរព្រមទាំងត្រូវអភិវឌ្ឍខ្លួនជាបន្តបន្ទាប់ដើម្បីបង្កើនចំណេះដឹង ជំនាញ និងគុណភាពថែទាំអ្នកជំងឺឱ្យកាន់តែប្រសើរឡើង៕

ដោយ ស៊ុម វណ្ណា