‎AKP ព្រះសីហនុ ថ្ងៃទី០១ ខែតុលា ឆ្នាំ២០២៥-- ឯកឧត្តម ម៉ាង ស៊ីណេត ប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ បានជួបសំណេះសំណាលជាមួយប្រជាពលរដ្ឋរងគ្រោះដោយខ្យល់កន្ត្រាក់ចំនួន ១២គ្រួសារ ស្ថិតភូមិព្រែក៣ ឃុំទំនប់រលក ស្រុកស្ទឹងហាវ ខេត្តព្រះសីហនុ នាព្រឹកថ្ងៃពុធ ទី០១ ខែតុលា ឆ្នាំ២០២៥។

ឯកឧត្តមប្រធានបានធ្វើការសំណេះសំណាលជាមួយប្រជាពលរដ្ឋរងគ្រោះធម្មជាតិខ្យល់កន្ត្រាក់ចំនួន១២គ្រួសារ ព្រមទាំងបានពាំនាំការផ្តាំផ្ញើសួសុខទុក្ខ និងសេចក្តីនឹករលឹកពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រោះសម្តេចបានធ្វើការណែនាំមកដល់សាខាឱ្យយកចិត្តទុកដាក់ចំពោះប្រជាពលរដ្ឋរងគ្រោះ ចាស់ជរា ក្មេងកំព្រា មិនប្រកាន់វណ្ណៈ ពូជសាសាន៍ ឬនិន្នាការនយោ ដោយធ្វើយ៉ាងណាត្រូវដឹងអំពីសុខទុក្ខ និងការលំបាកខ្វះខាតរបស់ប្រជាពលដ្ឋនៅមូលដ្ឋានដោយមិនទុកឱ្យប្រជាពលរដ្ឋរបស់យើងណាម្នាក់ខ្វះខាតស្បៀងដោយយើងមិនបានដឹងនោះទេ ព្រោះទីណាមានការលំបាកទីនោះមានកាកបាទក្រហមនៅជាមួយបងប្អូនជានិច្ច។

ឯកឧត្តមក៏បានធ្វើការណែនាំដល់អាជ្ញាធរ និងអ្នកស្ម័គ្រចិត្តនៅតាមមូលដ្ឋានត្រូវស្វែងយល់អំពីសុខទុក្ខប្រជាពលរដ្ឋរបស់ខ្លួន ព្រោះរាជរដ្ឋាភិបាលបានយកចិត្តទុកដាក់ចំពោះគ្រួសារ ប្រជាពលរដ្ឋរបស់យើង ជាពិសេសបញ្ហាសុខុមាលភាពប្រជាពលរដ្ឋ។ ចំពោះប្រជាពលរដ្ឋមានបណ្ណសមធម៌ ឬបណ្ណ ប.ស.ស ចំពោះស្រ្តីដែលមានផ្ទៃពោះត្រូវទៅពិនិត្យសុខភាពឱ្យបាន ៤ដងមុនពេលសម្រាល និងក្រោយសម្រាលចំនួន ១០ដង ហើយការទៅពិនិត្យផ្ទៃពោះ និងរហូតទារកអាយុ ២ឆ្នាំ និងទទួលបានថវិកាពីរាជរដ្ឋាភិបាល ម្យ៉ាងទៀតរាជរដ្ឋាភិបាលចង់ឱ្យកូនចៅរបស់យើងដែលកើតមកមានសុខភាពល្អ មិនមានពិការភាព ព្រោះបច្ចុប្បន្ននេះរាជរដ្ឋាភិបាលបានដាក់ចេញនូវគោលនយោបាយ ប្រាក់សោធនិវត្តន៍សម្រាប់មន្ត្រីរាជការ ក៏ដូចជាកម្មករ និយោជិត នៅពេលចូលនិវត្តនឹងទទួលបាននូវអត្ថប្រយោជន៍ពីបណ្ណ ប.ស.ស និងសូមជូនពរឱ្យបងប្អូនយើងទទួលបានសុខភាពល្អ ទទួលបានជោគជ័យក្នុងក្រុមគ្រួសារ។

សូមជម្រាបជូនថា អំណោយមនុស្សធម៌របស់សាខាកាកបាទក្រហមខេត្តព្រះសីហនុ ចែកជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន១២គ្រួសារ ក្នុងមួយគ្រួសារទទួលបានអង្ករ២៥គីឡូក្រាម  មី១កេស ត្រីខ១យួរ ទឹកត្រី១យួរ កន្ទេល១ ឃីត១កញ្ចប់ (មុង១ ភួយ១ ក្រមា១ សារុង១) និងថវិកា១០ម៉ឺនរៀល៕

ដោយ ងូ សុមុនី