‎AKP កំពង់ស្ពឺ ថ្ងៃទី០១ ខែតុលា ឆ្នាំ២០២៥-- ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារចុះមូលដ្ឋានខេត្តកំពង់ស្ពឺ នាព្រឹកថ្ងៃទី០១ ខែតុលា ឆ្នាំ២០២៥ បានអញ្ជើញសំណេះសំណាល និងថ្លែងអំណរគុណលោកគ្រូ អ្នកគ្រូបង្រៀនវគ្គបំប៉នស្ម័គ្រចិត្ត និងអបអរសាទរចំពោះសិស្សនិទ្ទេស A ប្រឡងសញ្ញាបត្រមធ្យមសិក្សាទុតិយភូមិ ក្នុងឆ្នាំសិក្សា២០២៤-២០២៥ នាសម័យប្រឡង ២៨ សីហា ២០២៥ ដោយមានការអញ្ជើញចូលរួមពីឯកឧត្តមបណ្ឌិតអភិបាលខេត្ត ប្រធានយុវជន ស.ស.យ.ក អភិបាលក្រុង-ស្រុក នាយកសាលា លោកគ្រូ អ្នកគ្រូ និងសិស្សានុសិស្ស ជាច្រើនទៀត នៅសាលប្រជុំបណ្ណាល័យកំពង់ស្ពឺ។

‎ក្នុងឱកាសនោះដែរ ឯកឧត្តម ឧបនាយករដ្ឋមន្ត្រី ហ៊ុន ម៉ានី  បានធ្វើការកោតសរសើរដល់ប្អូនៗដែលទទួលបាននិទ្ទេសA ថ្ងៃនេះ ដែលសមិទ្ធផលនេះគឺកើតឡើងចេញពីឆន្ទៈដ៏មោះមុតរបស់ប្អូនៗ ក្នុងការកំណត់ គោលដៅច្បាស់លាស់ ជម្នះពុះពារឧបសគ្គ ខិតខំប្រឹងប្រែងតស៊ូរៀនសូត្រ ធ្វើយ៉ាងណាសម្រេចឱ្យបានជោគជ័យក្នុងការសិក្សារបស់ខ្លួន និងសម្រេចឱ្យបាននូវគោលដៅដែលខ្លួន និងលោកគ្រូ អ្នកគ្រូ ជាពិសេសអាណាព្យាបាល ប៉ងប្រាថ្នា ដែលចង់ឃើញកូនៗរបស់ខ្លួនទទួលបានភាពជោគជ័យនាពេលបច្ចុប្បន្ន និងនាពេលអនាគតបន្តទៀត។

‎ឯកឧត្តមបានបន្តថា ក្រោមការដឹកនាំប្រកបដោយភាពវៃឆ្លាតរបស់សម្ដេចធិបតី ហ៊ុន ម៉ាណែត ជានាយករដ្ឋមន្ត្រី បាននិងកំពុងយកចិត្តទុកដាក់យ៉ាងខ្លាំងលើវិស័យអប់រំ ជាក់ស្តែងសម្តេចបានណែនាំឱ្យក្រសួងអប់រំ និងកម្មវិធីអប់រំដើម្បីកសាងធនធានមនុស្សឱ្យឆ្លើយតបទៅនឹងតម្រូវការទីផ្សារការងារក្នុងយុគសម័យឌីជីថល និងសេដ្ឋកិច្ចប្រកបដោយជំនាញ។

‎ឯកឧត្តមសូមសំណូមពរដល់ថ្នាក់ដឹកនាំមន្ទីរអប់រំ យុវជន និងកីឡា លោកនាយក នាយិកាវិទ្យាល័យទាំង២៦ លោកគ្រូ អ្នកគ្រូ និងអាជ្ញាធរក្រុង ស្រុកទាំងអស់ សូមបន្តលើកទឹកចិត្តដល់ប្អូនៗ ដែលមិនបានជាប់ឆ្នាំនេះ កុំឱ្យមានការបាក់ទឹកចិត្ត និងបន្តជំរុញពួកគាត់ឱ្យខិតខំប្រឹងប្រែងរៀនសូត្រ បន្ថែមទៀត ដើម្បីបានប្រឡងជាប់នៅឆ្នាំក្រោយ ឬអាចជួយជំរុញឱ្យពួកគាត់ សិក្សាជំនាញបច្ចេកទេសនានាបាន តាមរយៈមន្ទីរការងារ និងបណ្តុះបណ្តាល វិជ្ជាជីវៈ និងស្ថាប័នពាក់ព័ន្ធ ដើម្បីចាប់យកជំនាញណាមួយឱ្យបានច្បាស់លាស់ ងាយស្រួលស្វែងរកការងារធ្វើ  និងបន្តប្រឹងប្រែងទៅមុខទៀត ដើម្បីមានអាជីពការងារមួយច្បាស់លាស់ទៅថ្ងៃ អនាគត ដែលអាចជួយជ្រោមជ្រែងដល់គ្រួសារ ឪពុកម្តាយ និងត្រូវធ្វើជា កូនល្អ សិស្សល្អ យុវជនល្អសម្រាប់ប្រទេសជាតិ។ មួយទៀតបើអាច សូមជួយ ចែករំលែកនូវភាពជោគជ័យនេះដល់ប្អូនៗយើងជំនាន់ក្រោយជាបន្តទៀតផងដែរ។

ក្នុងឱកាសនោះ ‎ឯកឧត្តមបណ្ឌិត ជាម ច័ន្ទសោភ័ណ បានមានប្រសាសន៍ថា កាប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ ខេត្តកំពង់ស្ពឺមានបេក្ខជនប្រឡងសរុប ៥,៧៧២នាក់ ស្រី ៣,២៩០នាក់ ជាប់សរុប ៥,០៣៨នាក់ ស្រី ៣,០១៤នាក់ ស្មើនឹង ៨៧.២៨។‎ក្នុងនោះ និទ្ទេស A ចំនួន ៧៩នាក់ ស្រី ៥០នាក់ (ស្រុកគងពិសី ១២នាក់, ក្រុងច្បារមន ២៣នាក់, ស្រុកបសេដ្ឋ ៨នាក់, ស្រុកភ្នំស្រួច ៨នាក់, ស្រុកសំរោងទង ១៦នាក់ និងក្រុងឧដុង្គម៉ែជ័យ១២នាក់) ដោយក្នុងឆ្នាំ២០២៥នេះ សិស្សនិទ្ទេស A ក្នុងខេត្តកំពង់ស្ពឺ មានការកើនឡើងគួរឱ្យកត់សម្គាល់ (ឆ្នាំ២០២៤ មានសិស្សនិទ្ទេស A ៤៧នាក់ តែឆ្នាំ២០២៥ កើនឡើងរហូតដល់ ៧៩នាក់) លទ្ធផលនេះគឺបានជួយលើកកិត្តិយស ដល់ប្អូនៗផ្ទាល់ ក្រុមគ្រួសារ និងសាលារៀន ព្រមទាំងមូលដ្ឋានក្រុង ស្រុក ហើយជាពិសេសទៅទៀតនោះ គឺមុខមាត់របស់ខេត្តកំពង់ស្ពឺយើងទាំងមូលតែម្តង។ ‎សូមបញ្ជាក់ថា ឯកឧត្តមឧបនាយកផ្ដល់នូវថវិកាឧបត្ថម្ភលើកទឹកចិត្តដល់សិស្សានុសិស្សប្រឡងជាប់និទ្ទេសA ចំនួន៧៩នាក់ ក្នុង១នាក់ទទួលបានកុំព្យូទ័រ១គ្រឿង៕

ដោយ លឹម សាន្ត