AKP ភ្នំពេញ ថ្ងៃទី៣០ ខែកញ្ញា ឆ្នាំ ២០២៥ --
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិបានបញ្ជាក់សាជាថ្មីពីការគាំទ្ររបស់កម្ពុជាចំពោះការធ្វើកំណែទម្រង់របស់អង្គការសហប្រជាជាតិ ដើម្បីបង្កើនវិធានការការទូត ពង្រឹងតួនាទីរបស់មហាសន្និបាតអង្គការសហប្រជាជាតិ ពង្រីកសមាជិកភាពនៃក្រុមប្រឹក្សាសន្តិសុខ និងជំរុញប្រតិបត្តិការថែរក្សាសន្តិភាព។ នេះបើយោងតាមសេចក្ដីប្រកាសព័ត៌មានស្ដីពីលទ្ធផលនៃការអញ្ជើញចូលរួមរបស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី ការបរទេស និងសហប្រតិបត្តិការអន្តរជាតិដឹកនាំគណៈប្រតិភូជាន់ខ្ពស់កម្ពុជាក្នុងកិច្ចពិភាក្សាទូទៅ នៃមហាសន្និបាតអង្គការសហប្រជាជាតិលើកទី៨០ ដែលប្រព្រឹត្តទៅនៅថ្ងៃទី២៣-២៩ ខែកញ្ញា ឆ្នាំ២០២៥ នៅទីក្រុងញូវយ៉ក សហរដ្ឋអាមេរិក ក្រោមមូលបទ «រួមគ្នាដើម្បីភាពប្រសើរឡើង៖ ៨០ឆ្នាំ និងច្រើនឆ្នាំទៀត ដើម្បីសន្តិភាព ការអភិវឌ្ឍ និងសិទ្ធិមនុស្ស»។

ក្នុងឱកាសនោះ ឯកឧត្តមឧបនាយករដ្ឋមន្រ្ដី ប្រាក់ សុខុន បានធ្វើការអំពាវនាវឱ្យប្រទេសទាំងអស់គោរពចក្ខុវិស័យដំបូងរបស់អង្គការសហប្រជាជាតិ ដោយជ្រើសរើសកិច្ចសហប្រតិបត្តិការ កិច្ចសន្ទនា និងសេចក្តីសង្ឃឹម ជំនួសឱ្យជម្លោះ និងការបែងចែក។
ក្នុងឱកាសខួបលើកទី៨០ នៃការបង្កើតអង្គការសហប្រជាជាតិ កិច្ចពិភាក្សាទូទៅនៃមហាសន្និបាតអង្គការសហប្រជាជាតិ បានទទួលការអំពាវនាវយ៉ាងច្រើនលើសលុបពីបណ្តាប្រមុខរដ្ឋ/រដ្ឋាភិបាល ឱ្យពង្រឹងយន្តការពហុភាគីនិយម និងចូលរួមប្តេជ្ញាចិត្តរួមគ្នាឡើងវិញក្នុងការដោះស្រាយបញ្ហាប្រឈមជាសកល។ បណ្តាថ្នាក់ដឹកនាំបានសង្កត់ធ្ងន់ លើតួនាទីដ៏សំខាន់របស់ អ.ស.ប. សម្រាប់កិច្ចសហប្រតិបត្តិការរវាងរដ្ឋនិងរដ្ឋ និងបានគូសបញ្ជាក់ពីអាទិភាពសំខាន់ៗ រួមមាន៖ ការរក្សាសន្តិភាព និងសន្តិសុខសកល, ការបញ្ចប់សង្គ្រាម និងអស្ថិរភាព, ការជំរុញការកែ ទម្រង់ប្រព័ន្ធ អ.ស.ប., ការរៀបចំលិខិតបទដ្ឋានគ្រប់គ្រងបញ្ញាសិប្បនិមិត្ត, ការជំរុញការសម្រេចបានការអភិវឌ្ឍប្រកបដោយចីរភាព, ការធ្វើសកម្មភាពជាក់លាក់ដើម្បីដោះស្រាយការប្រែប្រួលអាកាសធាតុ និង ការធានាថាការជ្រើសតាំងអគ្គលេខាធិការអ.ស.ប.ថ្មី សម្រាប់អាណត្តិបន្ទាប់ប្រកបដោយសមភាពយេនឌ័រ។ 

ជាមួយគ្នានេះ បណ្តាថ្នាក់ដឹកនាំកំពូលក៏បានគូសបញ្ជាក់ពីភាពចាំបាច់នៃការពង្រឹងសាមគ្គីភាព ក្នុងការឆ្លើយតបទៅនឹងវិបត្តិមនុស្សធម៌, ការលើកកម្ពស់សិទ្ធិមនុស្ស និងការដោះស្រាយចំណោទដ៏ស្មុគស្មាញនៃបច្ចេកវិទ្យាទំនើបថ្មីៗ។
ស្របពេលដែលកម្ពុជាបានប្រែក្លាយពីប្រទេសដែលទទួល ទៅជាអ្នកផ្តល់សន្តិភាព និងស្ថិរភាព ឯកឧត្តមឧបនាយករដ្ឋមន្ត្រី ប្រាក់ សុខុន បានសម្តែងនូវក្តីបារម្ភយ៉ាងជ្រាលជ្រៅចំពោះភាពតានតឹងដែលកំពុងបន្តនៅតាម ព្រំដែនជាមួយប្រទេសថៃ ដោយបានប្រកាសប្រឆាំងនឹងការរំលោភអធិបតេយ្យ និងអំពាវនាវឱ្យគោរពយ៉ាង ម៉ឺងម៉ាត់លើបទឈប់បាញ់ កិច្ចសន្ទនា និងដំណោះស្រាយដោយសន្តិវិធី ស្របតាមច្បាប់អន្តរជាតិ។ ឯកឧត្ដមឧបនាយករដ្ឋមន្រ្ដីក៏បានសង្កត់ធ្ងន់ថា៖ «កម្ពុជាបាន អំពាវនាវឱ្យមានការគាំទ្រពីអាស៊ាន អង្គការសហប្រជាជាតិ និងសហគមន៍អន្តរជាតិឱ្យជួយបន្ធូរបន្ថយភាព តានតឹង និងស្តារឡើងវិញនូវជំនឿទុកចិត្តរវាងប្រទេសទាំងពីរ៕

ដោយ៖ មករា