AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៥ -- ប្រធានាធិបតីកូរ៉េខាងត្បូង លោក លី ជែម្យុង (Lee Jae Myung) និងនាយករដ្ឋមន្ត្រីជប៉ុន លោក ស៊ីកេរុ អ៊ីស៊ីបា (Shigeru Ishiba) គ្រោងនឹងជួបប្រជុំគ្នានៅទីក្រុងប៊ូសានរបស់ប្រទេសកូរ៉េខាងត្បូងនៅថ្ងៃអង្គារនេះ ក្នុងរយៈពេលត្រឹមតែមួយខែប៉ុណ្ណោះបន្ទាប់ពីដំណើរទស្សនកិច្ចរបស់លោក លី ទៅកាន់ទីក្រុងតូក្យូកាលពីចុងខែសីហា។

កិច្ចប្រជុំនេះនឹងបង្ហាញពីការប៉ុនប៉ងដើម្បីពង្រឹង និងរៀបចំឡើងវិញនូវ «កិច្ចការងារការទូត« ដែលនៅក្នុងភាសាកូរ៉េសំដៅទៅលើដំណើរទស្សនកិច្ចផ្លូវរដ្ឋទ្វេភាគី ដែលត្រូវបានផ្តួចផ្តើមឡើងកាលពីក្នុងឆ្នាំ២០០៤ ដោយលោកប្រធានាធិបតី រ៉ូ មូយុន (Roh Moo-hyun) ជាមួយសមភាគីជប៉ុន លោក ជូនីជីរ៉ូ កូអ៊ីហ្ស៊ូមី (Junichiro Koizumi)។

បន្ទាប់​ពី​ការ​អាក់ខានអស់​រយៈពេល​មួយ​ទសវត្សរ៍​ដែល​បង្ក​ឡើង​ដោយ​ជម្លោះ​ជា​ប្រវត្តិសាស្ត្រ ការអនុវត្ត​ត្រូវ​បាន​រស់​ឡើង​វិញ​ក្នុង​ឆ្នាំ២០២៣ ក្រោម​ការ​ដឹកនាំ​របស់​លោក យូន ស៊ុកយុល (Yoon Suk Yeol) ដែល​កាល​នោះ​ជា​ប្រធានាធិបតីកូរ៉េខាងត្បូង។ រដ្ឋបាលរបស់លោកដោយផ្តល់អាទិភាពដល់ការរួបរួមមួយទៅលើបញ្ហាសន្តិសុខ និងសេដ្ឋកិច្ចជុំវិញការសោកស្ដាយជាប្រវត្តិសាស្ត្រ ដោយបានចាត់វិធានការយ៉ាងម៉ឺងម៉ាត់ដើម្បីចាប់ផ្តើមកិច្ចសន្ទនាកម្រិតខ្ពស់ជាមួយប្រទេសជប៉ុនឡើងវិញ។

ការិយាល័យប្រធានាធិបតីបាននិយាយកាលពីថ្ងៃចន្ទថា កិច្ចប្រជុំកំពូលនៅទីក្រុងប៊ូសានត្រូវបានរៀបចំឡើងតាមការអញ្ជើញរបស់លោក លី ដោយនាយករដ្ឋមន្ត្រីជប៉ុនជិតផុតអាណត្តិ។ កិច្ចប្រជុំនេះត្រូវបានគេរំពឹងថានឹងផ្តោតសំខាន់ទៅលើការពង្រីកកិច្ចសហប្រតិបត្តិការកូរ៉េ-ជប៉ុន និងការពង្រឹងទំនាក់ទំនងជាមួយសហរដ្ឋអាមេរិកក្នុងក្របខ័ណ្ឌត្រីភាគី៕

ដោយ៖ យា ចិន្តាខន្តី (ប្រភព៖ កូរ៉េថាមស៍)