AKP Ninh Binh វៀតណាម, ថ្ងៃទី៣០ ខែកញ្ញា ឆ្នាំ២០២៥--

លោក Bui Ngoc Quang សមាជិកគណៈកម្មាធិការបក្សខេត្ត Ninh Binh អគ្គនិពន្ធរងនៃកាសែត Ninh Binh វិទ្យុ និងទូរទស្សន៍បានផ្ដល់ទិដ្ឋភាពទូទៅដោយចែករំលែកលទ្ធផល និងបង្ហាញនូវបទពិសោធន៍មួយចំនួនលើការធ្វើបរិវត្តកម្មបច្ចេកវិទ្យាឌីជីថលក្នុងដំណើរការផលិតកម្មវិធីទូរទស្សន៍ វិទ្យុ និងកាសែត ក្នុងខេត្ត Ninh Binh។

ការបង្ហាញនេះ ក្នុងឱកាសជួបពិភាក្សាការងារជាមួយគណៈប្រតិភូសារព័ត៌មានកម្ពុជាដឹកនាំដោយ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា នាថ្ងៃទី២៩ ខែកញ្ញា ឆ្នាំ២០២៥ នៅប្រទេសវៀតណាមលោក Bui Ngoc Quang បានលើកឡើងថា កាសែត Ninh Binh វិទ្យុ និងទូរទស្សន៍ត្រូវបានបង្កើតឡើងដោយផ្អែកលើការច្របាច់បញ្ចូលគ្នា ៣ អង្គភាព (កាសែត Ninh Binh និងស្ថានីយ៍វិទ្យុ - ទូរទស្សន៍ កាសែត Ha Nam កាសែត Nam Dinh) និងដំណើរការលើវេទិកាជាច្រើន លើ ៤ ប្រភេទគឺ កាសែតបោះពុម្ព កាសែតអេឡិចត្រូនិក វិទ្យុ និងទូរទស្សន៍។ លោកអគ្គនិពន្ធរងបានបញ្ជាក់ថា កាសែតបោះពុម្ពចែកជា៣ប្រភេទគឺ ការបោះពុម្ពផ្សាយប្រចាំថ្ងៃ សប្តាហ៍ និង ប្រចាំខែ ខណៈកាសែតអេឡិចត្រូនិកត្រូវបានផ្សាយជាពីរភាសា គឺភាសាវៀតណាម និងភាសាអង់គ្លេស ដែលមាន Emagazine Podcast Infographic និង វីដេអូខ្លីៗ ធានាបាននូវមាតិកាសម្បូរបែប ទូលំទូលាយ ដែលបច្ចុប្បន្ននេះមានអ្នកទស្សនាប្រមាណ៤០ម៉ឺននាក់ក្នុងមួយថ្ងៃ និងទទួលបានចំណាត់ថ្នាក់ក្នុងចំណោមកាសែតដែលមានអ្នកចូលមើលច្រើនជាងគេបំផុតក្នុងប្រទេស។ ជាងនេះទៅទៀត ខេត្ត Ninh Binh ក៏មានការផ្សាយតាមរយៈ Youtube  Fanpage Tiktok និងកម្មវិធី App ផងដែរ។

លោក Bui Ngoc Quang បានបញ្ជាក់ទៀតថា ការអភិវឌ្ឍយ៉ាងខ្លាំងក្លានៃបច្ចេកវិទ្យាឌីជីថលបានជួយដល់ការផលិតកម្មវិធីផ្សាយមានភាពបត់បែន កាត់បន្ថយពេលវេលា និងមានប្រសិទ្ធភាព។ លោកបានជម្រាបជូនទៀតថា ដំណើរការផលិត និងការផ្សាយគឺស្វ័យប្រវត្តិក្នុងដំណាក់កាលជាច្រើន ដែលអនុញ្ញាតឱ្យធ្វើការពីចម្ងាយ ធានាបាននូវសុវត្ថិភាព និងសុវត្ថិភាពទិន្នន័យ ដោយរក្សាទុកនៅ Private Cloud។
ជាមួយគ្នានេះដែរ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មានកម្ពុជាបានថ្លែងកោតសរសើរពីការអភិវឌ្ឍលើបរិវត្តកម្មឌីជីថលនៃប្រព័ន្ធផ្សព្វផ្សាយរបស់វៀតណាម ក្នុងបរិបទដែលប្រព័ន្ធផ្សព្វផ្សាយកំពុងផ្លាស់ប្តូរយ៉ាងខ្លាំងឆ្ពោះទៅរកទំនើបភាវូបនីយកម្ម និងឌីជីថល។ ឯកឧត្តមអនុរដ្ឋលេខាធិការបានលើកឡើងថា នេះឱកាសដ៏មានតម្លៃសម្រាប់ភាគីទាំងពីរក្នុងការផ្លាស់ប្តូរបទពិសោធន៍គ្នាទៅវិញទៅមក លើការផ្លាស់ប្តូរឌីជីថលនៅក្នុងវិស័យព័ត៌មាន និងផ្សព្វផ្សាយ៕

ដោយ៖ ទូច វលក័្ខណ រូបថត៖ ខឹម សុវណ្ណារ៉ា