AKP ព្រះសីហនុ ថ្ងៃទី៣០ ខែកញ្ញា ឆ្នាំ២០២៥-- លោកជំទាវ គីម សុភ័ក្រ្ត ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តព្រះសីហនុ អញ្ជើញបើកកិច្ចប្រជុំបុកសរុបលទ្ធផលការងារប្រចាំត្រីមាសទី៣ ឆ្នាំ២០២៥ នៅសាលប្រជុំសាលាខេត្តព្រះសីហនុ នាព្រឹកថ្ងៃអង្គាទី៣០ ខែកញ្ញា ឆ្នាំ២០២៥ ដោយមានការចូលរួមពីសមាជិក សមាជិកាសមាគមនារីមកពីក្រុង ស្រុកទាំង៦ ក្នុងខេត្តព្រះសីហនុ។

កិច្ចប្រជុំប្រចាំត្រីមាសទី៣ ឆ្នាំ២០២៥ របស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ មានរបៀបវារៈដូចជា៖ ១. មតិស្វាគម៍បើកកិច្ចប្រជុំ ២. បង្ហាញវីដេអូសកម្មភាព ៣. សកម្មភាពរបស់សមាគម ៤. របាយការណ៍លទ្ធផលការងារប្រចាំត្រីមាសទី៣ ៥. របាយការណ៍ហិរញ្ញវត្ថុ ៦. ការបណ្តុះបណ្តាលជំនាញសង្គ្រោះបឋម ដោយសាខាកាកបាទក្រហមកម្ពុជា ខេត្តព្រះសីហនុ ៧. ពិភាក្សា និងផ្សព្វផ្សាយផែនការសកម្មភាពត្រីមាសបន្ត និងបញ្ហាផ្សេងៗ។

បន្ទាប់ពីបានស្តាប់សេចក្តីរាយការ និងរបាយការណ៍រួចមក លោកជំទាវ គីម សុភ័ក្ត្រ ម៉ាង ស៊ីណេត ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ បានថ្លែងអំណគុណដល់សមាជិកសមាគមនារីកម្ពុជា ដើម្បីសន្តិភាព និងអភិ វឌ្ឍខេត្តព្រះសីហនុ បានខិតខំរួមគ្នាធ្វើការងារមនុស្សធម៌នៅតាមក្រុង ស្រុក ឆ្លើយតបទៅ នឹងលក្ខន្តិក:របស់សមាគមនារីទៅលើការងារមនុស្សធម៌ ជាពិសេសស្ត្រី កុមារ ជនចាស់ ជរាគ្មានទីពឹង និងគ្រួសារកងទ័ពជួរមុខរបស់យើង។

ទន្ទឹមនោះ លោកជំទាវ គីម សុភ័ក្រ្ត បានធ្វើការផ្តាំផ្ញើសួរសុខទុក្ខ និងសេចក្តីនឹករលឹក ពីសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ សម្តេចតែងតែជឿជាក់ និងលើកទឹកចិត្តដល់បងប្អូននារីជាសមាជិកានៃសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍គ្រប់លំដាប់ថ្នាក់ ដែលបានខិតខំប្រឹងប្រែងយកអស់ពីកម្លាំងកាយ ប្រាជ្ញា ស្មារតីក្នុងការបំពេញបេសកកម្មជូនសង្គមជាតិ និងមាតុភូមិ។

ជាមួយគ្នានេះដែរ លោកជំទាវ ក៏បានថ្លែងអំណរគុណសមាជិក សមាជិការសាខាសមា គមនារីខេត្ត និងអនុសាខា សមាគមនារីក្រុង ស្រុកបានចូលរួមយ៉ាងសកម្មទាំងស្មារតី កម្លាំងកាយចិត្ត និងថវិកាក្នុងការងារមនុស្សធម៌ ដើម្បីជួយដល់ស្រ្តី កុមារ ជនងាយរងគ្រោះ និងចាស់ជរាគ្មានទីពឹងប្រកបដោយសមធម៌ និងបរិយាប័ន្ន ទោះបីការជួយឧបត្ថម្ភថវិកា និងសម្ភារដល់សមាគមនារីកម្ពុជារបស់យើងមានចំនួនតិចតួច ក៏ប៉ុន្តែនេះជាទឹកចិត្តអាណិតអាសូរ និងជាការស្រលាញ់ចំពោះមនុស្សនៅជុំវិញខ្លួនយើង ជាពិសេសអ្នកដែលកំពុងជួបការលំបាកនៅក្នុងសហគមន៍។ ក្នុងនាមជាប្រធានកិត្តិយសសាខាសមាគមនារី ដើម្បីសន្តិភាព និងអភិវឌ្ឍន៍ខេត្តព្រះសីហនុ សូមអំពាវនាវដល់សមាជិក សមាជិកាគ្រប់រូបចូលរួមធ្វើសកម្មភាពមនុស្សធម៌ រួមគ្នាទទួលខុសត្រូវឱ្យកាន់តែរីកចម្រើនទៅមុខ។ បន្តពង្រឹងសាមគ្គីភាពផ្ទៃក្នុងបង្កើតភាពស្និទ្ធស្នាលដោយធ្វើការចែករំលែកនូវព័ត៌មានឱ្យគ្នាទៅវិញទៅមក បន្តស្វែងរក និងកៀគរហិរញ្ញវត្ថុ និងធនធានពីសប្បុរសជន ដៃគូអភិវឌ្ឍន៍ ដើម្បីគាំទ្រគ្រប់សកម្មភាពរបស់សមាគមនារីខេត្តព្រះសីហនុ។ បន្តសហការ និងចូលរួមយ៉ាងសកម្មក្នុងសកម្មភាពសមាគមនារីឪ្យក្លាយជាស្ថាប័នមួយក្នុងការចូលរួមចំណែកអភិវឌ្ឍន៍សង្គម និងការកាត់បន្ថយភាពក្រីក្រ ដើម្បីរួមចំណែកដល់ការគាំទ្រយុទ្ធសាស្ត្រជាតិ និងគោលនយោបាយរបស់រាជរដ្ឋាភិបាល ដើម្បីលើកកម្ពស់សិទ្ធិស្រ្តី កុមារ និងការផ្តល់សេវាសាធារណៈប្រកបដោយគុណភាព សមធម៌ និងបរិយាបន្ន ឈានទៅសម្រេចចក្ខុវិស័យឆ្នាំ២០៥០ កម្ពុជាជាប្រទេសមានចំណូលខ្ពស់។

លោក គាំ សុខុម នាយកសាខាកាកបាទក្រហមកម្ពុជាខេត្តព្រះសីហនុ ក៏បានធ្វើការបង្ហាញពីវិជ្ជាសង្គ្រោះបឋមជូនដល់សមាជិកសាខាសមាគមនារី ដើម្បីសន្តិភាព និងអភិវឌ្ឍន៍ខេត្តព្រះសីហនុ ដោយគូសបញ្ជាក់ថា ក្នុងការសង្គ្រោះបឋមមានដូចជា ជំងឺគាំងបេះដូង ស្លាក់ រលាកភ្លើង ឬទឹកក្តៅ និងការហូរឈាមជាដើម ទី១. ការពារ ពិនិត្យស្ថានភាពនៅជុំវិញ ២. ពិនិត្យស្នាមរបួស ហូរឈាម ពិនិត្យស្មារតី ពិនិត្យដង្ហើម ៣. ប្រកាសអាសន្ន ឬរកជំនួយ ទូរស័ព្ទហៅឡានពេទ្យ និងយកម៉ាស៊ីនវាយតម្លៃដំណើរការបេះដូង ៤. សង្គ្រោះបឋម គឺការដាក់ដំណេកសុវត្ថិភាព និងមេរៀនសំខានមួយចំនួនទៀតមានដូចជា ១. ការយល់ដឹងពីកាកបាទក្រហម (ប្រវត្តិគំនិត សមាសភាគរបស់ចលនា បដិរូប និងសញ្ញាសម្គាល់ គោលការណ៍គ្រឹះរបស់ចលនា ប្រវត្តិ និងសកម្មភាពរបស់កាកបាទក្រហមកម្ពុជា ច្បាប់មនុស្សធម៌អន្តរជាតិ) ២. វិជ្ជាសង្គ្រោះបឋម (តួនាទីអ្នកសង្រ្គោះ គោលការណ៍គ្រឹះ សភាពស្ហុក សន្លប់បាត់ស្មារតី ការដាក់ដំណេកសុវត្ថិភាព សន្លប់បាត់ដង្ហើម ការធ្វើ CPR ស្លាក់ របួសស្រាល ធ្ងន់ ការហូរឈាម បាក់ឆ្អឹង និងការដឹកជញ្ជូនជនរងគ្រោះទៅកាន់មន្ទីរពេទ្យ)៕

ដោយ ងូ សុមុនី