AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៥-- ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា បានគូសបញ្ជាក់ថា ការប្រើប្រាស់បញ្ញាសិប្បនិម្មិត (AI) និងការអភិវឌ្ឍក្នុងវិស័យអប់រំ គឺស្របទៅនឹងគោលដៅយុទ្ធសាស្ត្ររបស់រាជរដ្ឋាភិបាលកម្ពុជាក្នុងការធ្វើទំនើបកម្មវិស័យអប់រំ និងពង្រឹងបន្ថែមទៀតសម្រាប់ការប្រកួតប្រជែងក្នុងតំបន់។ ការគូសបញ្ជាក់របស់ឯកឧត្តមបណ្ឌិត អ៊ុម រម្យណី យ៉ាងដូច្នេះធ្វើឡើងក្នុងពិធីបើកសិក្ខាសាលាស្តីពីការរួមបញ្ចូលបញ្ញាសិប្បនិម្មិត ដើម្បីធ្វើឱ្យវិធីសាស្ត្របង្រៀនកាន់តែសម្បូរបែប និងបំពេញតម្រូវការរបស់អ្នកសិក្សាកាន់តែប្រសើរ នៅខេត្តកំពត នាថ្ងៃទី២៩ ខែកញ្ញា ឆ្នាំ២០២៥ ក្រោមការរៀបចំដោយទីភ្នាក់ងារឧត្ដមសិក្សាប្រើប្រាស់ភាសាបារាំង  ដោយមានការគាំទ្រពីស្ថានទូតបារាំងប្រចាំនៅកម្ពុជា។

ឯកឧត្តមបណ្ឌិតរដ្ឋលេខាធិការបានថ្លែងថា គោលបំណងជាអាទិភាពសំខាន់ៗនៃការប្រើប្រាស់បញ្ញាសិប្បនិម្មិតក្នុងវិស័យអប់រំ រួមមាន៖ ១. ការបំពាក់នូវជំនាញឌីជីថលរឹងមាំសម្រាប់គ្រូបង្រៀន និងសិស្សា នុសិស្ស។ ២. ការលើកកម្ពស់ការច្នៃប្រឌិតគរុកោសល្យថ្មី និង ៣. ការរួមបញ្ចូលបច្ចេកវិទ្យាសំខាន់ៗ ដើម្បីឆ្លើយតបទៅនឹងការប្រកួតប្រជែងនានានៅក្នុងសង្គមនាពេលខាងមុខ។ ឯកឧត្តមថា សិក្ខាសាលាស្តីពីការរួមបញ្ចូលបញ្ញាសិប្បនិម្មិត ដើម្បីធ្វើឱ្យវិធីសាស្ត្របង្រៀនកាន់តែសម្បូរបែប និងបំពេញតម្រូវការរបស់អ្នកសិក្សាកាន់តែប្រសើរនាពេលនេះ គឺជាចក្ខុវិស័យមួយយ៉ាងល្អប្រសើរ ដែលអនុញ្ញាតឱ្យគ្រូបង្រៀនភាសាបារាំងទទួលបាននូវចំណេះដឹង និងវិធីសាស្ត្របង្រៀនប្រកបដោយភាពច្នៃប្រឌិតក្នុងការបង្រៀនភាសាបារាំង ចំណេះដឹង វប្បធម៌ និងកិច្ចសហប្រតិបត្តិការផងដែរ។ បន្ថែមលើនេះ ការបញ្ចូលបញ្ញាសិប្បនិម្មិតទៅក្នុងការអប់រំ (AI) អាចជួយសម្រួលដល់សិស្សានុសិស្សនូវបទពិសោធន៍នៃការសិក្សាឱ្យកាន់តែមានគុណភាពល្អប្រសើរថែមទៀត។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិត អ៊ុម រម្យណី បានថ្លែងអំណរគុណដល់ទីភ្នាក់ងារឧត្តមសិក្សាប្រើប្រាស់ភាសាបារាំង និងស្ថានទូតបារាំងប្រចាំនៅកម្ពុជា ដែលបានរៀបចំកម្មវិធីសិក្ខាសាលានេះឡើង ដើម្បីរួមចំណែកក្នុងការបណ្តុះបណ្ដាលចំណេះដឹងបន្ថែមទៀតដល់គ្រូបង្រៀនភាសាបារាំង និងអ្នកពាក់ព័ន្ធតាមរយៈបទពិសោធន៍ និងវិធីសាស្ត្របង្រៀនថ្មីដោយប្រើប្រាស់បច្ចេកវិទ្យាបញ្ញាសិប្បនិមិ្មត ដែលជាចលករជំរុញគុណភាពអប់រំឱ្យកាន់តែល្អប្រសើរបន្ថែមទៀត៕

ដោយ៖ ចាន់ សុភឿន (ប្រភព៖ ក្រសួងអប់រំ)