AKP ខេត្ត Ninh Binh , វៀតណាម ថ្ងៃទី២៩ ខែកញ្ញា ឆ្នាំ២០១៥ -- ថ្នាក់ដឹកនាំ និងមន្ត្រីក្រសួងព័ត៌មានបានចុះបំពេញទស្សនកិច្ចការងារដល់ ខេត្ត Ninh Binh ដែលជាតំបន់សម្បូរទៅដោយ ប្រពៃណី វប្បធម៌ ប្រវត្តិសាស្រ្ត និងមានសក្តានុពលវិស័យទេសចរណ៍នៃសាធារណរដ្ឋសង្គមនិយមវៀតណាម នាតសៀលថ្ងៃទី២៩ ខែកញ្ញា ឆ្នាំ២០២៥។ តាមរយៈដំណើរទស្សនកិច្ចនេះ លោក Bui Ngoc Quang សមាជិកគណៈកម្មាធិការបក្សខេត្ត អគ្គនិពន្ធនាយករងកាសែត និងវិទ្យុ-ទូរទស្សន៍ ខេត្ត Ninh Binh នៃប្រទេសវៀតណាម និងឯកឧត្តម អ៊ិន ឆាយ អនុរដ្ឋលេខាក្រសួងព័ត៌មានកម្ពុជាបានវាយតម្លៃខ្ពស់ចំពោះការចែករំលែក និងផ្លាស់ប្តូរបទពិសោធន៍ការងារលើវិស័យព័ត៌មានរវាងប្រទេសទាំងពីរ។

ក្នុងកម្មវិធីស្វាគមន៍ និងផ្លាស់ប្តូរបទពិសោធន៍ការងារលើវិស័យព័ត៌មាននៃប្រទេសទាំងពីរ លោក Bui Ngoc Quang សមាជិកគណៈកម្មាធិការបក្សខេត្ត អគ្គនិពន្ធនាយករងកាសែត និងវិទ្យុ-ទូរទស្សន៍ ខេត្ត Ninh Binh បានធ្វើបទបង្ហាញស្វាគមន៍ និងចែករំលែកបទពិសោធន៍ក្នុងការអនុវត្តការងារសារព័ត៌មាននៅមូលដ្ឋានខេត្ត Ninh Binh ដល់គណៈប្រតិភូអ្នកសារព័ត៌មានកម្ពុជាដែលដឹកនាំដោយ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា។

លោក Bui Ngoc Quang បានមានប្រសាសន៍ថា ការទស្សនកិច្ចការងាររបស់គណៈប្រតិភូអ្នកសារព័ត៌មានកម្ពុជាមកកាន់ទឹកដីខេត្ត Ninh Binh នៅពេលនេះគឺជាសក្ខីភាពមួយបង្ហាញពីស្មារតីសាមគ្គីភាព និងមិត្តភាពរវាងប្រទេសទាំងពីរ ព្រមទាំងជាឱកាសនៃកិច្ចសហប្រតិបត្តិការថ្មីក្នុងបរិបទដែលសារព័ត៌មាននិងប្រព័ន្ធផ្សព្វផ្សាយកំពុងមានការផ្លាស់ប្ដូរយ៉ាងខ្លាំងក្លាតាមទិសដៅទំនើប Digital ដោយផ្សារភ្ជាប់នឹងការអភិវឌ្ឍសេដ្ឋកិច្ចសង្គមប្រកបដោយចីរភាព។ លោកសមាជិកគណៈកម្មាធិការបក្សខេត្តក៏បានបន្ថែមថា លើសពីនេះទៅទៀតក៏ជាឱកាសដើម្បីភាគីទាំងពីរចែករំលែកបទពិសោធន៍ក្នុងការងារផ្លាស់ប្ដូរ Digital ក្នុងវិស័យព័ត៌មាន ផ្សព្វផ្សាយរូបភាព ទឹកដី វប្បធម៌ និងមនុស្ស នៃប្រទេសនីមួយៗ ព្រមទាំងឧទ្ទេសនាមអំពីសក្តានុពលនៃការអភិវឌ្ឍ វិស័យទេសចរណ៍ វិទ្យាសាស្រ្ត បច្ចេកវិទ្យា និងការអនុវត្ត Digital ក្នុងការងារគ្រប់គ្រងរដ្ឋក្នុងមូលដ្ឋាន។

ជាមួយគ្នានេះដែរ ឯកឧត្តម អ៊ិន ឆាយ មានប្រសាសន៍ថ្លែងអំណរគុណដល់រដ្ឋាភិបាលប្រទេសវៀតណាម ក៏ដូចជាគណៈកម្មាធិការបក្សខេត្ត Ninh Binh ដែលបានទទួលស្វាគមន៍យ៉ាងកក់ក្តៅ។ ឯកឧត្តមសង្ឃឹមថា មន្ត្រីព័ត៌មាននៃក្រសួងព័ត៌មាននឹងបានការយល់ដឹង និងបានផ្លាស់ប្តូរបទពិសោធន៍គ្នាទៅវិញទៅមកពីបញ្ហា Digital  ដែលកំពុងតែវិវត្តន៍យ៉ាងខ្លាំងនាពេលបច្ចុប្បន្ននេះ៕

ដោយ៖ ទូច វលក័្ខណ រូបថត៖ ខឹម សុវណ្ណារ៉ា