AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៥–អតីតថ្នាក់ដឹកនាំចលនាតស៊ូសេរីការជាតិកម្ពុជា បណ្តោយព្រំដែនកម្ពុជា-ថៃ នាយឧត្តមសេនីយ៍ ញឹក ប៊ុនឆៃ នៅថ្ងៃទី ២៥ ខែ កញ្ញា ឆ្នាំ ២០២៥ បានចេញសេចក្តីថ្លែងការណ៍ទាក់ទិនទៅនឹងបញ្ហាព្រំដែនរវាងកម្ពុជា-ថៃ ដែលឯកឧត្តមលើកមកបង្ហាញពីការឈ្លានពានរបស់កងទ័ពថៃមកលើទឹកដីកម្ពុជា។
     ក្នុងសេចក្តីថ្លែងការណ៍នាយឧត្តមសេនីយ៍ ញឹក ប៊ុនឆៃ បានបញ្ជាក់ថា”ខ្ញុំសូមជម្រាបជូនដល់មតិជាតិ អន្តរជាតិ ព្រមទាំងបងប្អូនជនរួមជាតិខ្មែរនៅក្នុងប្រទេស និងក្រៅ ប្រទេសទាំងអស់មេត្តាជ្រាបថាខ្ញុំបានស្គាល់ទីតាំងបង្គោលឡាក់ព្រំដែនខ្មែរ-ថៃ ច្បាស់លាស់ចាប់ពីបង្គោលឡាក់លេខ៤១ នៅភូមិ ចំការគរ រហូតដល់បង្គោលឡាក់លេខ៤៩ នៅក្បែរស្ពានប៉ោយប៉ែត និងបង្គោលឡាក់មួយចំនួនទៀតផងដែរ។
    អតីតថ្នាក់ដឹកនាំចលនាតស៊ូសេរីការជាតិកម្ពុជា បណ្តោយព្រំដែនកម្ពុជា-ថៃ នាយឧត្តមសេនីយ៍ ញឹក ប៊ុនឆៃ
បានបញ្ជាក់ថា”តាមការសង្កេតរបស់ខ្ញុំ តាំងពីដើមមកយោធាថៃ បានរំលោភបំពានលើបូរណភាពទឹកដីកម្ពុជា ដោយប្រើ ប្រាស់ផែនទីខ្នាត១/៥០.០០០ ដែលគូសដោយឯកតោភាគី មករំលោភយកទឹកដីកម្ពុជាជាច្រើនកន្លែង តាមបណ្តោយព្រំដែនខ្មែរ-ថៃ ជាបន្តបន្ទាប់មករហូតពេលសព្វថ្ងៃនេះ”៕

ដោយ៖មករា