AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៥--ក្នុងដំណើរទស្សនកិច្ចការងារចូលរួមពិព័រណ៍ទេសចរណ៍ជប៉ុន ២០២៥ និងកិច្ចប្រជុំតុមូលថ្នាក់រដ្ឋមន្ត្រីទេសចរណ៍នៅប្រទេសជប៉ុន ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងវិស័យឯកជន នារសៀលថ្ងៃទី២៤ ខែកញ្ញា ឆ្នាំ២០២៥ បានជួបពិភាក្សាការងារជាមួយឯកឧត្តម Hideaki Ōmura  អភិបាលខេត្តអៃឈិ ដោយផ្តោតលើការបង្កើតកិច្ចសហប្រតិបត្តិការទេសចរណ៍ថ្មីៗបន្ថែមទៀតរវាងប្រទេសកម្ពុជា និងខេត្តអៃឈិ ក្រោមការរំពឹងថា  ការធ្វើពិពិធកម្មទីផ្សារទេសចរណ៍ថ្មីបន្ថែមរវាងប្រទេសកម្ពុជា និងខេត្តអៃឈិ ប្រទេសជប៉ុន នឹងជួយឱ្យមានកំណើនភ្ញៀវទេសចររវាងប្រទេសទាំងពីរកម្ពុជា-ជប៉ុន។

បើតាមក្រសួងទេសចរណ៍បានឱ្យដឹងថា ក្នុងជំនួបពិភាក្សាការងារដ៏មានសារៈសំខាន់ និងប្រកបដោយផ្លែផ្កានេះភាគីទាំងពីរមានទស្សនៈរួមគ្នាថា ប្រទេសកម្ពុជាគឺជាតារាទើបនឹងរះពោរពេញដោយកាលានុវត្តភាព រីឯខេត្តអៃឈិ មានសេដ្ឋកិច្ចនាំមុខគេមួយផងដែរក្នុងប្រទេសជប៉ុន ហើយសុទ្ធតែមានសក្តានុពលទេសចរណ៍ និងបេតិកភណ្ឌពិភពលោកដូចៗគ្នា ប្រពៃណីទំនៀមទំលាប់គួរឱ្យចាប់អារម្មណ៍ ព្រមទាំងទំនាក់ទំនងការទូតរវាងកម្ពុជា និងជប៉ុនជាង៧០ឆ្នាំ ដែលត្រូវបានដំឡើងកម្រិតទៅជាដៃគូយុទ្ធសាស្រ្តគ្រប់ជ្រុងជ្រោយគឺពិតជាកត្តាជួយបំពេញបន្ថែមគ្នាទៅវិញទៅមក ដើម្បីរួមគ្នាជំរុញវិស័យទេស ចរណ៍រវាងប្រទេសទាំងពីរកម្ពុជា-ជប៉ុន  និងរវាងកម្ពុជា និងខេត្តអៃឈិ រួមមាន ការផ្សព្វផ្សាយសក្តានុពលទេសចរណ៍ដល់ប្រជាជននៃគោលដៅទេសចរណ៍ទាំងពីរ ការពិនិត្យលទ្ធភាពរៀបចំព្រឹត្តការណ៍ជំរុញទេសចរណ៍ ការជំរុញជើងហោះហើរត្រង់ដើម្បីធ្វើឱ្យមានកំណើនភ្ញៀវទេសចរកើនឡើងជាលំដាប់ពីមួយឆ្នាំទៅមួយឆ្នាំ៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)