AKP ភ្នំពេញ ថ្ងៃទី២៣ ខែកញ្ញា ឆ្នាំ២០២៥-- ក្នុងឱកាសនៃពិធីបុណ្យភ្ជុំបិណ្ឌឆ្នាំ២០២៥នេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានផ្ញើជូនសារថ្លែងអំណរគុណដល់អង្គទូត និងដៃគូអភិវឌ្ឍន៍អន្តរជាតិចំពោះកិច្ចសហប្រតិបត្តិការដ៏ល្អរហូតមក ព្រមទាំងបានផ្ញើជូននំអន្សម នំគម និងនំស្លឹកស្រស់ដែលជានំខ្មែរដល់អង្គទូត និងដៃគូអភិវឌ្ឍន៍អន្តរជាតិ ដើម្បីបង្ហាញពីប្រពៃណីទំនៀមទម្លាប់ពីការប្រារព្ធពិធីបុណ្យភ្ជុំបិណ្ឌ និងការវេចនំអន្សមក្នុងពិធីនេះ។

សូមជម្រាបជូនថា ក្នុងឱកាសនៃពិធីបុណ្យភ្ជុំបិណ្ឌឆ្នាំ២០២៥ដែលទើបបានបញ្ចប់ទៅនេះមានស្ថានទូតនៃប្រទេសជាមិត្តមួយចំនួនបានធ្វើការជូនពរដល់ប្រជាជនកម្ពុជា ក្នុងនោះមានស្ថានទូតកាណាដាជាដើម ដោយសូមឱ្យការប្រារព្ធពិធីបុណ្យភ្ជុំបិណ្ឌរបស់ប្រជាជនកម្ពុជាប្រកបដោយភាពរីករាយ និងការធ្វើដំណើរប្រកបដោយសុវត្ថិភាព ខណៈដែលលោក Christof Weigelmeier អនុប្រធានបេសកកម្មថ្មីនៃស្ថានទូតអាល្លឺម៉ង់ និងជាប្រធានផ្នែកកិច្ចសហប្រតិបត្តិការអភិវឌ្ឍន៍ប្រចាំស្ថានទូតអាល្លឺម៉ង់ប្រចាំកម្ពុជា ដែលទើបមកដល់ប្រទេសកម្ពុជានៅមុនពិធីបុណ្យភ្ជុំបិណ្ឌ លោកបានចូលរួមជាមួយក្រុមការងារស្ថានទូតអាល្លឺម៉ង់ទៅវត្តមួយក្នុងប្រទេសកម្ពុជានាឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ ដើម្បីស្វែងយល់បន្ថែមអំពីប្រពៃណីដ៏សំខាន់មួយនេះ។ 

លោក Christof Weigelmeier បានលើកឡើងថា លោកមានសំណាងដែលបានមកដល់ប្រទេសកម្ពុជាក្នុងពេលបុណ្យភ្ជុំបិណ្ឌ ជាពេលវេលាមួយដែលគ្រួសារខ្មែរជួបជុំគ្នាដើម្បីធ្វើបុណ្យឧទ្ទិសដល់សាច់ញាតិដែលបានចែកឋាន។ លោក និងបុគ្គលិកស្ថានទូតអាល្លឺម៉ង់ប្រចាំកម្ពុជាបានទៅវត្តជាមួយគ្នា ហើយពេលដែលបានទៅដល់វត្តលោកពិតជាទទួលបានអារម្មណ៍កក់ក្តៅនឹងជំនឿសាសនានៃប្រពៃណីវប្បធម៌ខ្មែរជាខ្លាំង៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)