AKP បន្ទាយមានជ័យ ថ្ងៃទី២២ ខែកញ្ញា ឆ្នាំ២០២៥-- ក្នុងឱកាសពិធីបុណ្យភ្ជុំបុិណ្ឌដែលជាពិធីបុណ្យប្រពៃណីដ៏សំខាន់របស់ខ្មែរ ក្រុមអ្នកសារព័ត៌មានយ៉ាងច្រើនកុះករបានចូលរួមធ្វើបុណ្យជាមួយនឹងប្រជាពលរដ្ឋនៅវត្តពុទ្ធិសីមារាម ហៅ វត្តជោគជ័យ ដែលស្ថិតនៅជិតព្រំដែនកម្ពុជា-ថៃ ក្នុងខេត្តបន្ទាយមានជ័យ។ ការចូលរួមនេះធ្វើឡើងស្របពេលមានភាពតានតឹងនៅតំបន់ព្រំដែន ហើយវត្តនេះក៏ជាទីតាំងដែលប្រជាពលរដ្ឋកំពុងការពារទឹកដីរបស់ខ្លួនផងដែរ។

ដឹកនាំដោយលោកជំទាវ ធន សយនារីរ័ត្ន ទីប្រឹក្សារដ្ឋមន្ត្រីក្រសួងព័ត៌មាន លោក នេត្រ ភក្ត្រា ក្រុមអ្នកសារព័ត៌មានបាននាំយកទេយ្យទានមានដូចជា ភេសជ្ជៈ និងបច្ច័យមួយចំនួន ទៅប្រគេនព្រះសង្ឃដែលគង់នៅវត្តជោគជ័យ ក្នុងឃុំអូរបីជាន់ ស្រុកអូរជ្រៅ។ វត្តមានរបស់ក្រុមអ្នកសារព័ត៌មាននៅទីនោះ គឺស្របពេលដែលពួកគេកំពុងបំពេញបេសកកម្មយកព័ត៌មាន និងរូបភាពនៅតំបន់ជិតព្រំដែន ដែលកំពុងមានភាពតានតឹងនេះ។

នៅថ្ងៃភ្ជុំបិណ្ឌទី១៥ ដែលត្រូវនឹងថ្ងៃទី២២ ខែកញ្ញា ឆ្នាំ២០២៥ មានពុទ្ធបរិស័ទនិងប្រជាពលរដ្ឋយ៉ាងច្រើនកុះករបានទៅវត្តជោគជ័យ ទោះបីជាពួកគាត់រវល់ក្នុងការការពារព្រំដែនជាមួយកម្លាំងសមត្ថកិច្ចក៏ដោយ។ វត្តជោគជ័យមានចម្ងាយត្រឹមតែប្រមាណ ៥០០ម៉ែត្រពីទីតាំងដែលយោធាថៃបានរាយលួសបន្លាចូលមកឈ្លានពាន និងហ៊ុមព័ទ្ធដីភូមិស្រែចម្ការរបស់ប្រជាពលរដ្ឋ។

ព្រះចៅអធិការវត្តជោគជ័យបានមានសង្ឃដីកាថា មិនធ្លាប់មានពុទ្ធបរិស័ទទៅវត្តច្រើនកុះករបែបនេះពីមុនមកទេ។ ព្រះអង្គក៏បានអំពាវនាវដល់ប្រជាពលរដ្ឋឱ្យបន្តចូលរួមវត្តឱ្យបានច្រើនដូចថ្ងៃនេះ និងរួមគ្នារក្សាតំបន់ភូមិជោគជ័យដើម្បីជាកម្លាំងដេញយោធាថៃមិនឱ្យចូលឈ្លានពានទឹកដីកម្ពុជា។

ក្រោយពីបានធ្វើបុណ្យនៅវត្ត យុវតី ឡោះ សុលី អាយុ ១៧ឆ្នាំ រស់នៅក្នុងភូមិជោគជ័យ បានចូលទៅមើលទីតាំងដែលមានការឈ្លានពាន។ យុវតីរូបនេះបានបង្ហាញពីបំណងប្រាថ្នាចង់បានសន្តិភាព និងបួងសួងកុំឱ្យមានការឈ្លានពានពីសំណាក់យោធាថៃតទៅទៀត។

ពិធីបុណ្យភ្ជុំបិណ្ឌគឺជាពិធីបុណ្យមួយដែលផ្តល់ឱកាសឱ្យសាច់ញាតិជួបជុំគ្នាធ្វើម្ហូបអាហារ បាយសម្ល ដើម្បីប្រគេនព្រះសង្ឃ ដែលជាប្រពៃណីដ៏ល្អផូរផង់របស់ជាតិខ្មែរតាំងពីបុរាណកាលមក។ ការចូលរួមធ្វើបុណ្យនៅតំបន់មានបញ្ហាដូចវត្តជោគជ័យនេះ មិនត្រឹមតែបង្ហាញពីជំនឿសាសនារបស់ប្រជាជនខ្មែរប៉ុណ្ណោះទេ ថែមទាំងបានបង្ហាញពីទឹកចិត្តស្រឡាញ់ជាតិ និងការរួបរួមគ្នារបស់ពួកគេក្នុងការការពារបូរណភាពទឹកដីផងដែរ៕

ដោយ ឈុន សារ៉ាត