AKP សៀមរាប ថ្ងៃទី២១ ខែកញ្ញា ឆ្នាំ២០២៥ -- សម្រាប់ពិធីបុណ្យកាន់បិណ្ឌនិងភ្ជុំបិណ្ឌ គឺជាពិធីបុណ្យដ៏សំខាន់មួយសម្រាប់ប្រជាជនកម្ពុជា ដែលគោរពព្រះពុទ្ធសាសនា ដែលជាពេលវេលាមួយសម្រាប់ក្រុមគ្រួសារជួបជុំគ្នា និងឧទ្ទិសកុសលដល់វិញ្ញាណក្ខន្ធបុព្វការីជន។ 

ក្នុងអំឡុងពេលពិធីបុុណ្យភ្ជុំបិណ្ឌនេះ ជារៀងរាល់ឆ្នាំគ្រប់ទីកន្លែងពោរពេញ ទៅដោយបរិយាកាសសប្បាយរីករាយ។ ប៉ុន្តែសម្រាប់ឆ្នាំ២០២៥នេះ ស្របពេលដែលកម្ពុជា និងថៃ មានបញ្ហាជម្លោះព្រំដែនដោយសារតែ ភាគីថៃបានធ្វើសកម្មភាពរំលោភបំពានមកលើដែនអធិបតេយ្យរបស់កម្ពុជានោះ ការជួបជុំគ្រួសារ និងការទៅធ្វើបុណ្យធ្វើទាន នៅតាមវត្តអារាមនានាក្នុងខេត្តសៀមរាប ត្រូវបានមន្រ្តីជំនាញ នៃមន្ទីរធម្មការ និងសាសនាខេត្ត រួមជាមួយព្រះសង្ឃ នៅក្រុងសៀមរាប សង្គេតឃើញថា មានសកម្មភាពធម្មតា។ ជាមួយគ្នានេះ ពួកគាត់បង្ហាញពីក្តីបារម្ភរឿងព្រំដែនច្រើន និងតែងតែបានធ្វើបុណ្យឧទ្ទិសកុសលជូនវីរកងទ័ព ដែលបានពលីជីវិតក្នុងបុព្វហេតុជាតិ ការពារបូរណភាពទឹកដីផងដែរ។

លោក ធឿន វុឌ្ឍី មន្ត្រីនៃមន្ទីរធម្មការ និងសាសនាខេត្តសៀមរាប បានឱ្យដឹងថា ទោះបីជាប្រទេសកម្ពុជាកំពុងតែត្រូវបានសៀមធ្វើការឈ្លានពាន នៅតាមព្រំដែន ប៉ុន្តែសកម្មភាពទូទៅ នៅតាមវត្តអារាមនានាក្នុងខេត្តសៀមរាប នៅក្នុងឱកាសបុណ្យកាន់បិណ្ឌ និងភ្ជុំបិណ្យនេះ តាមការសង្គេតមើលរបស់លោកឃើញថា សកម្មភាពប្រជាពលរដ្ឋទៅធ្វើបុណ្យធ្វើទាន មានភាពធម្មតា ដោយវត្តខ្លះក៏មានពុទ្្ធបរិស័ទទៅបំពេញបុណ្យច្រើនជាងឆ្នាំមុន វត្តខ្លះក៏មានប្រជាពលរដ្ឋទៅបំពេញបុណ្យតិចជាងឆ្នាំមុន ។ លោកបន្តថា ប៉ុន្តែគ្រួសារខ្លះ ដែលពួកគាត់ជាគ្រួសារកងទ័ព ហើយមានលំនៅឋាន នៅជិតព្រំដែន ក៏មិនទាន់បានវិលត្រឡប់ទៅផ្ទះសម្បែងវិញ ដោយពួកគាត់ក៏អាច មិនបានទៅធ្វើបុណ្យធ្វើទាននៅវត្ត ព្រោះត្រូវស្នាក់នៅកន្លែងមានសុវត្ថិភាពសិន។

លោកបានលើកឡើងថា៖ «ជារួមមក សកម្មភាពទូទៅ នៅតាមវត្តអារាមនានាក្នុងខេត្តសៀមរាបក្នុងឱកាសបុណ្យកាន់បិណ្ឌ និងភ្ជុំបិណ្យនេះ ប្រហាក់ហែលគ្នាទៅនឹងការធ្វើកាលពីឆ្នាំមុនដែរ»។

ពាក់ព័ន្ធនឹងការលើកឡើងនេះ ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក ក្រុងសៀមរាប ខេត្តសៀមរាបមានសង្ឃដីកាថា ដោយពិធីបុណ្យកាន់បិណ្ឌនិងភ្ជុំបិណ្ឌ ជាទំនៀមទម្លាប់ប្រពៃណីរបស់ខ្មែរ ប្រជាពុទ្ធបរិស័ទបានមកបំពេញបុណ្យធម្មតា ប៉ុន្តែពួកគាត់មិនសូវសប្បាយចិត្តប៉ុន្មានទេ ដោយសារពួកគាត់មានការបារម្ភពីរឿយោធាសៀមបានកំពុងតែធ្វើការឈ្លានពានលើទឹកដីរបស់កម្ពុជា។ ព្រះអង្គបន្តថា ប៉ុន្តែទោះជាយ៉ាងនេះក្តី ក៏ពុទ្ធបរិស័ទសម្រាប់នៅវត្តប្រាសាទគោកចក គឺគាត់បានមកធ្វើបុណ្យធ្វើទាន ទៅតាមទំនៀមទម្លាប់អ្នកគោរពព្រះពុទ្ធសាសនាធម្មតា ហើយពួកគាត់តែងតែបានធ្វើបុណ្យឧទ្ទិសកុសលជូនវីរកងទ័ពដែលបានពលីជីវិតក្នុងបុព្វហេតុជាតិ ការពារបូរណភាពទឹកដីផងដែរ។

ព្រះគ្រូវិចិត្រវង្សា ហែម គឹមសាន ក៏បានអំពាវនាឱ្យអន្តរជាតិជួយសម្របសម្រួលជាមួយភាគីសៀមឱ្យដោះលែងយោធាកម្ពុជា១៨នាក់ ដែលយោធាសៀមបានចាប់ក្រោយបទឈប់បាញមកវិញ ដើម្បីឱ្យពួកគាត់បានជួបប្រពន្ធ ជួបកូន ជួបជុំក្រុមគ្រួសាររបស់គេវិញ ជាពិសេសនៅក្នុងឱកាសបុណ្យភ្ជុំបិណ្ឌនេះ។

សូមបញ្ជាក់ថា បច្ចុប្បន្ននេះ នៅតាមវត្តអារាមក្លាយជាទីកន្លែងដ៏មានភាពអ៊ូអរ និងទាក់ទាញបំផុតក្នុងពិធីបុណ្យនេះ។ ប្រជាពលរដ្ឋគ្រប់ស្រទាប់វណ្ណៈ ទាំងចាស់ទាំងក្មេង បានស្លៀកពាក់យ៉ាងស្រស់ស្អាត  ក្នុងនោះ ក៏គេសង្គេតឃើញជនបរទេសក៏បានស្លៀកពាក់សំពតអាវប្រពៃណីខ្មែរ និងនាំគ្នាទៅវត្តដើម្បីធ្វើបុណ្យផងដែរ។ បងប្អូនប្រជាពលរដ្ឋបានវេចនំអន្សម នំគម និងម្ហូបជាច្រើនមុខផ្សេងទៀតទៅប្រគេនព្រះសង្ឃ ហើយបានចូលរួមក្នុងពិធីសាសនាដើម្បីឧទ្ទិសកុសលដល់ដូនតា៕

ដោយ៖ ឃុត សៅ