AKP បន្ទាយមានជ័យ ថ្ងៃទី២១ ខែកញ្ញាឆ្នាំ២០២៥ -- ក្នុងឱកាសបុណ្យកាន់បិណ្ឌ និងភ្ជុំបិណ្ឌ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវ ពេជ ចន្ទមុន្នី ហ៊ុន ម៉ាណែត បានប្រគេនអង្ករជាទ័យទានដ៏ថ្លៃថ្លាជូនដល់ព្រះសង្ឃចំនួន៧៧វត្ត ក្នុងខេត្តបន្ទាយមានជ័យ ដែលគង់ចាំព្រះវស្សាអស់កាលត្រីមាស។ ពិធីដ៏មានអត្ថន័យនេះ ត្រូវបានរៀបចំឡើងនារសៀលថ្ងៃសៅរ៍ ទី២០ ខែកញ្ញា ឆ្នាំ២០២៥នេះក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហ៊ឹម វិបុលឫទ្ធិ រដ្ឋលេខាធិការក្រសួងធម្មការ និងសាសនា ដែលជាតំណាងដ៏ខ្ពង់ខ្ពស់របស់ ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា។

ការប្រគេនអង្ករនេះ គឺដើម្បីចូលរួមចំណែកសម្រួលដល់ជីវភាពរបស់ព្រះសង្ឃក្នុងរដូវកាលបុណ្យកាន់បិណ្ឌ និងភ្ជុំបិណ្ឌ ហើយក៏ជាការបង្ហាញនូវការយកចិត្តទុកដាក់ និងការគោរពដ៏ជ្រាលជ្រៅរបស់ សម្តេចធិបតី និងលោកជំទាវ ចំពោះវិស័យព្រះពុទ្ធសាសនា ដែលជាសាសនារបស់រដ្ឋ។

ក្នុងឱកាសនោះដែរ ឯកឧត្តម ហ៊ឹម វិបុលឫទ្ធិ បានមានប្រសាសន៍បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជាប្រគេនដល់ព្រះមន្ត្រីសង្ឃ និងពុទ្ធបរិស័ទទាំងអស់ ដោយក្តីនឹករលឹក។ រាជរដ្ឋាភិបាលអាណត្តិទី៧ ក្រោមការដឹកនាំប្រកបដោយភាពប្រាកដនិយមរបស់ សម្តេចមហាបវរធិបតី ហ៊ុន ម៉ាណែត ដែល តែងតែគិតគូរដល់ជីវភាពរស់នៅ របស់ប្រជាជន ជាពិសេសព្រះសង្ឃ និងពុទ្ធបរិស័ទ។

ឯកឧត្តមបន្តថា ព្រះពុទ្ធសាសនាបានដើរតួនាទីយ៉ាងសំខាន់ ក្នុងការអប់រំ និងចូលរួមចំណែកអភិវឌ្ឍ សង្គមជាតិជាមួយរាជរដ្ឋាភិបាលកម្ពុជា ជំរុញឱ្យប្រជាពលរដ្ឋប្រកាន់ភ្ជាប់នូវ សីលធម៌ ចរិយាធម៌ និងគុណធម៌ដ៏ល្អ។ នាពេលកន្លងមក គណៈសង្ឃនាយកទាំងពីរគណៈ ព្រះមន្ត្រីសង្ឃ និងពុទ្ធបរិស័ទ បានចូលរួមយ៉ាងសកម្ម ជាមួយរាជរដ្ឋាភិបាលក្នុងការជួយឧបត្ថម្ភគាំទ្រ គ្រឿងឧបភោគបរិភោគ ដល់វីរកងទ័ពជួរមុខ និងបងប្អូនភៀសសឹក ទន្ទឹមនោះព្រះសង្ឃក៏បានចូលរួមអនុវត្ត អភិក្រម  របស់ក្រសួងធម្មការនិងសាសនា គឺវត្តស្អាត វត្តស្វាង និងវត្តស្ងប់។

ជាមួយគ្នានោះ ឯកឧត្តមរដ្ឋលេខាធិការក្រសួងធម្មការ និងសាសនា បានប្រគេននូវទេយ្យទានដល់វត្តចំនួន ៧៧វត្ត នៅក្នុងមូលដ្ឋានខេត្តបន្ទាយមានជ័យដោយក្នុង១វត្ត ទទួលបានអង្ករចំនួន៣០០គីឡូក្រាម ដែលជា សទ្ធាជ្រះថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

តំណាងព្រះមន្ត្រីសង្ឃនិងពុទ្ធបរិស័ទ ទាំង៧៧វត្ត មានក្តីរីករាយ និងបានសម្តែងនូវការដឹងគុណយ៉ាងជ្រាលជ្រៅ ចំពោះសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែ គិតគូរពីសុខទុក្ខព្រះសង្ឃ និងប្រជាជន។ ហើយបានបួងសួងវត្ថុសក្តិសិទ្ធក្នុងលោក តាមជួយបីបាច់ថែរក្សា ប្រសិទ្ធពរជ័យ សិរីមង្គល វិបុលសុខ បវរមហាប្រសើរ ជូនដល់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងក្រុមគ្រួសារទាំងមូល ក្នុងឱកាសបុណ្យកាន់បិណ្ឌ និងភ្ជុំបិណ្ឌ៕

ដោយ ឈុន សារ៉ាត