AKP ភ្នំពេញ ថ្ងៃទី២០ ខែកញ្ញា ឆ្នាំ២០២៥--ឆ្នាំនេះក៏ដូចរៀងរាល់ឆ្នាំ ប្រមុខរាជរដ្ឋាភិបាល តែងណែនាំឱ្យសាលារាជធានីភ្នំពេញ ត្រៀមរថយន្តក្រុងដឹកប្រជាពលរដ្ឋដែលស្នាក់អាស្រ័យធ្វើការក្នុងរាជធានីភ្នំពេញទៅលេងស្រុកកំ​ណើ​តក្នុងឱកាសបុណ្យទានធំៗ មានដូចជា៖ ភ្ជុំបិណ្ឌ និងចូលឆ្នាំខ្មែរជាដើម។ ការយកចិត្តទុកដាក់ និងផ្ដល់សេវាដ៏ប្រពៃនេះធ្វើឱ្យប្រជាពលរដ្ឋសម្តែងក្តីសប្បាយរីករាយព្រមទាំងបានអរគុណដល់រាជរដ្ឋាភិបាលដែលបានរៀបចំរថយន្តក្រុងសម្រាប់ដឹកប្រជាពលរដ្ឋទៅលេងស្រុកកំណើតដោយមិនគិតថ្លៃនៅថ្ងៃបុណ្យភ្ជុំបិណ្ឌប្រពៃណីជាតិខ្មែរ។

ក្នុងទឹកមុខញញឹមរីករាយដោយដៃកំពុងកាន់សម្ភារៈ មានសម្លៀកបំពាក់ និងរបស់របសម្រាប់ផ្ញើអ្នកស្រុក លោក រៀន ពិសី មានស្រុកកំណើតនៅខេត្ដបាត់ដំបងបាន និយាយថា លោក និង ក្រុមគ្រួ​សា​រ រួមទាំងឪពុកម្ដាយកំពុងរង់ចំាជិះរថយន្តក្រុងដែលរៀបចំដោយសាលារាជធានីភ្នំពេញដើម្បីធ្វើដំណើរទៅលេងស្រុកកំណើតនៅថ្ងៃភ្ជុំបិណ្ឌ ។ លោកពិសីបាន បញ្ជាក់ថា៖« រដ្ឋាភិបាលឱ្យពលរដ្ឋជិះអត់គិតលុយក្នុងរដូវបុណ្យទានអ៊ីចឹង ល្អណាស់ ព្រោះលោកបានសល់លុយខ្លះសម្រាប់ចំណាយចាយវាយផ្សេងៗ ពេលជួបជុំបងប្អូននៅស្រុកំណើត។ ខ្ញុំបានជិះរថយន្តក្រុងទៅស្រុកកំណើតដែលរៀបចំដោយសាលាក្រុងភ្នំពេញ២ឆ្នាំហើយ។ ជិះរថយន្តក្រុងនេះសុវត្ថិភាព ហើយស្រួល ទូលាយ មិនចង្អៀតដូច ជិះឡានឈ្នួលនោះទេ មិនតែប៉ុណ្ណោះមិនចំណាយលុយទៀត។

ជាមួយគ្នានោះដែរ លោកក៏បានអរគុណដល់រាជរដ្ឋាភិបាល ក៏ដូចជាថ្នាក់ដឹកនាំនានា ដែលតែងតែគិតគូរពីសុវត្ថិភាពប្រជាពលរដ្ឋ ពិសេសនោះ នៅរដូវបុណ្យប្រពៃណីជាតិធំៗជារៀងរាល់ឆ្នាំ។ ចំណែកលោក សែន ភារម្យ ជានិស្សិត មកពីខេត្តឧត្ដមានជ័យសិក្សានៅរាជធានីភ្នំពេញ បាននិយាយថា សម្រាប់លោកមករៀននៅភ្នំពេញ បានមកជិះរថយន្ដក្រុងអត់គិតលុយទៅស្រុកកំណើតអាចជួយកាត់បន្ថយចំណាយបានមួយកម្រិតដែរ ហើយលោកគិតថា ជិះរថយន្ដក្រុងមានសុវត្ថិភាពល្អផង។ និស្សិតរូបនេះក៏បានអរគុណដល់រាជរដ្ឋាភិបាលដែលបានរៀបចំរថយន្តក្រុងជូនប្រជាពលរដ្ឋសម្រាប់ធ្វើដំណើរទៅស្រុកជារៀងរាល់ឆ្នាំដោយមិនគិតប្រាក់។

លើសពីនេះនិស្សិតរូបនេះបាន ឱ្យដឹងថា ការជិះរថយន្តក្រុងនេះបានធ្វើឱ្យគាត់សល់លុយសម្រាប់ទិញសម្ភារៈសម្រាប់ផ្ញើអ្នកស្រុកផងដែរ។ កំពុងអង្គុយរង់ចាំឡើងរថយន្តក្រុងនោះដែរអ្នកស្រី កែវ រដ្ឋនា ជាកម្មការិនីកាត់ដេរ នៅរាជធានីភ្នំពេញ ដែលមានស្រុកកំណើតនៅខេត្ដកំពងធំ បានមកធ្វើដំណើរតាមរថយន្ដក្រុងនៅថ្ងៃនេះបានឱ្យដឹងថា ការរៀបចំឱ្យមានរថយន្ដក្រុងដឹកប្រជាពលរដ្ឋទៅស្រុកកំណើតដោយ ឥតគិតថ្លៃ ក្នុងឱកាសបុណ្យភ្ជុំបិណ្ឌនេះ គឺពិតជាល្អ អ្នកស្រីគិតថា នឹងបានចូលរួមកាត់បន្ថយការចំណាយដល់បងប្អូនក្នុងការធ្វើដំណើរទៅស្រុកកំណើត ហើ​យ​ត្រឡប់មកធ្វើការនៅភ្នំពេញវិញដោយសុខសុវត្ថិភាពផងដែរ។ អ្នកស្រីបានបញ្ជាក់ថា៖« ការជិះរថយន្ដក្រុងទៅស្រុកកំណើត ក្នុងពេលបុណ្យភ្ជុំបិណ្ឌនេះគឺបានកាត់បន្ថយការចំណាយថវិកាបានមួយផ្នែកធំ ដើម្បីយកលុយនេះទុកទៅជូនម៉ែ ពុក និងគ្រួសារនៅឯស្រុកនោះផងដែរ។

ការរៀបចំរថយន្ដក្រុងឱ្យបងប្អូនជិះដោយឥតគិតថ្លៃក្នុងពេលបុណ្យភ្ជុំបិណ្ឌនេះ គឺបង្ហាញពីការយកចិត្ដទុកដាក់របស់រាជរដ្ឋាភិបាលមកលើបងប្អូនប្រជាពលរដ្ឋនៅគ្រប់ខេត្ដទាំងអស់ ហើយអាចធ្វើដំណើរទាំងទៅទាំងមកដោយសុវត្ថិភាពទៀត។ អ្នកស្រី កែវ រដ្ឋនា ក៏បានថ្លែងអំណរគុណដល់អាជ្ញាធររាជធានីភ្នំពេញ និងរាជរដ្ឋាភិបាល ដែលតែងតែយកចិត្ដទុកដាក់ និងរៀបចំរថយន្ដក្រុងឱ្យបងប្អូនប្រជាពលរដ្ឋ ជិះមិនគិតថ្លៃក្នុងពេលបុណ្យភ្ជុំបិណ្ឌនេះ ដើម្បីឱ្យពួកគាត់បានទៅជួបជុំគ្រួសារ បងប្អូនសាច់ញាតិ និងធ្វើដំណើរតាមរថយន្ដត្រឡប់មកធ្វើការនៅភ្នំពេញវិញពេលចប់បុ​ណ្យ​ភ្ជុំបិណ្ឌថែមទៀតផង។ សូមជម្រាបថា ដើម្បីជួយសម្រួលបន្ទុកការចំណាយរបស់បងប្អូនប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ កម្មករ កម្មការិនី សិស្ស និស្សិតទាំងអស់ ដែលនឹងធ្វើដំណើរទៅលេងស្រុកកំណើត ក្នុងឱកាសពិធីបុណ្យភ្ជុំបិណ្ឌនេះ រដ្ឋបាលរាជធានីភ្នំពេញ បានបញ្ចេញរថយន្តក្រុងចំនួន៤៩៧គ្រឿង សម្រាប់ដឹកព​លរ​ដ្ឋ​ចេញទៅស្រុកកំណើតដោយ មិនគិតថ្លៃ រយៈពេល៦ថ្ងៃ ក្នុងឱកាសបុណ្យភ្ជុំបិណ្ឌចាប់ពីថ្ងៃទី២០-២៥ ខែកញ្ញា ឆ្នាំ២០២៥។ យោងតាម សេចក្ដីជូនដំណឹង របស់សាលារាជធានីភ្នំពេញ រថយន្តក្រុង១០០គ្រឿងសម្រាប់ដឹកពលរដ្ឋនៅរាជធានីភ្នំពេញ។ ដោយឡែក អ្នកដំណើរទៅតាមខេត្តវិញ សាលារាជធានីភ្នំពេញ នឹងប្រើប្រាស់រថយន្តចំនួន ៤៩៧ គ្រឿង សម្រាប់ដឹកអ្នកដំណើរត្រឡប់ទៅមក។

ចំពោះពេលវេលា នៃការចេញដំណើរពីភ្នំពេញ គឺចាប់ផ្ដើមពីម៉ោង៥៖៣០ព្រឹកថ្ងៃទី២០ ខែកញ្ញា ឆ្នាំ២០២៥ តាមគោលដៅសំខាន់ៗ ដែលកំណត់ចំនួន៧គោលដៅសំខាន់ៗ ដោយរដ្ឋបាលរាជធានីភ្នំពេញ។ ក្នុងពេលជូនដំណើរបងប្អូនប្រជាពលរដ្ឋកម្មករ កម្មការិនីឡើងជិះរថយន្តក្រុងដោយមិនគិតថ្លៃនៅទីលានប្រជាធិប តេយ្យ មុខឃ្លាំងសាំង ក្នុងខណ្ឌឬស្សីកែវ ឯកឧត្ដម ឃួង ស្រេង អភិបាលរាជធានីភ្នំពេញ បានមានប្រសាសន៍ថា «ក្រោមការដឹកនាំរបស់ស​ម្ដេ​ចមហាបវរធិបតី ហ៊ុន ម៉ាណែត អ្វីដែលជាការលំបាករបស់ប្រជាពលរដ្ឋ គឺជាការលំបាករបស់រាជរដ្ឋាភិបាល។ដូច្នេះ​ហើយទើបរាជរដ្ឋាភិបាល តែងតែយកចិត្តទុកដាក់ជាមួយបងប្អូនប្រជាពលរដ្ឋ។»

ជាក់ស្ដែង ជារៀងរាល់ឆ្នាំ រាជរដ្ឋាភិបាលតែងតែបង្កើតឱ្យមានសេវាកម្មនៃការដឹកជញ្ជូនប្រជាពរដ្ឋ ទៅលេងស្រុកកំ​ណើ​ត ដោយមិនគិតថ្លៃនៅក្នុងឱកាសបុណ្យជាតិធំៗម្តងៗ ដើម្បីជួយសម្រួលទៅដល់ជីវភាពរបស់ពួកគាត់។ ឯកឧត្ដម អភិបាលរាជធានីភ្នំពេញ បានឱ្យដឹងថា ពីមួយឆ្នាំទៅមួយឆ្នាំប្រជាពលរដ្ឋក៏ដូចជាបងប្អូនកម្មករកម្មការិនីរោង ចក្រ ដែលជិះរថយន្តក្រុងទៅលេងស្រុកកំណើតជួបជុំបងប្អូនក្នុងឱកាសបុណ្យជាតិធំៗ ដូចជា ពិធីបុណ្យចូលឆ្នាំថ្មី និង ពិធីបុណ្យភ្ជុំបិណ្ឌ ប្រពៃណីជាតិខ្មែរជាដើមនេះ មានកំណើនកើនឡើងជាលំដាប់។ ការកើនឡើងនូវចំនួនអ្នកជិះរថយន្តក្រុងនេះគឺដោយសារតែបងប្អូនប្រជាពលរដ្ឋ មានជំនឿជឿជាក់លើរាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ហើយម្យ៉ាងទៀត ការធ្វើដំណើរដោយរថយន្តក្រុងនេះ ពួកគាត់ទទួលបានសុវត្ថិភាពផងដែរ។

សម្រាប់ឆ្នាំ២០២៤កន្លងមកនេះ ប្រជាពលរដ្ឋ កម្មករ កម្មការិនីរោងចក្រ បានទទួលសេវារថយន្តក្រុងពីរដ្ឋបាលរាជធានីភ្នំពេញដោយមិនគិតថ្លៃប្រមាណជាជិត៨ម៉ឺននាក់ ដែលរាជរដ្ឋាភិបាលបានកាត់នូវការចំណាយជូនប្រជាពលរដ្ឋ ក្នុងការធ្វើដំណើរនេះប្រមាណជាជាងមួយលានពីរសែនដុល្លារ។ ជាមួយគ្នានេះដែរ ឯកឧត្ដម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និង ជាស្នងការនគរបាលរាជធានីភ្នំពេញ បានលើកឡើងថា៖ សម្រាប់បុណ្យកាន់បិណ្ឌ និងភ្ជុំបិណ្ឌឆ្នាំនេះ ស្នងការដ្ឋាននគរបាលរាជធានីភ្នំពេញ បានប្រើប្រាស់កម្លាំងប៉ូលិស សហការជាមួយ កងរាជអាវុធហត្ថរាជធានីភ្នំពេញ ការពារសន្តិសុខ សុវត្ថិភាព និងសម្រួលចរាចរ ជូនប្រជាពលរដ្ឋចំនួន១៦ថ្ងៃ។ ដោយឡែកសម្រាប់ពិធីបុណ្យកឋិនទាននៅខាងមុខ ដែលនឹងចាប់ផ្តើម ពីថ្ងៃទី៨ ខែតុលា ដល់ថ្ងៃទី០៨ វិច្ឆិកាឆ្នាំ២​០​២​៥ ដែលមានរយៈពេល២៩ថ្ងៃ ស្នងការដ្ឋាននគរបាលរាជធានីភ្នំពេញក៏បានត្រៀមកម្លាំងរួចរាល់ ទាំងការស​ម្រួ​ល​ច​រាចរ ការរៀបចំសណ្តាប់ធ្នាប់នៅតាមទីផ្សារនិងនៅតាមវត្តអារាម ជាមួយនិងការល្បាត ពិនិត្យអាវុធជាតិផ្ទុះជាប្រ​ចាំ​ដើម្បី សន្ដិសុខ សុវត្ថិភាព ជូនពលរដ្ឋទៅធ្វើបុណ្យ ទៅធ្វើទាន ប្រកបដោយភាពសុខសាន្ដផងដែរ។

ឆ្លៀតក្នុងឱកាសដ៏ប្រសើរថ្លៃថ្លានេះ រដ្ឋបាលរាជធានីភ្នំពេញ សូមអំពាវនាវដល់ម្ចាស់ក្រុមហ៊ុន ម្ចាស់អាជីវកម្ម និងម្ចាស់រថយន្តដឹកជញ្ជូនអ្នកដំណើរទាំងអស់ សូមផ្តល់កិច្ចសហការរក្សាតម្លៃដឹកជញ្ជូនឱ្យនៅដដែល ដោយពុំដំឡើងថ្លៃ ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ ដើម្បីរួមចំណែកជាមួយរាជរដ្ឋាភិបាល និងរដ្ឋបាលរាជធានីភ្នំពេ​ញ ក្នុងការជួយសម្រួលដល់ការចំណាយ និងជីវភាពរស់នៅរបស់បងប្អូនប្រជាពលរដ្ឋ៕

ដោយ៖ ប៊ុន រិទ្ធ និង សួស សំរិត