AKP កំពង់ធំ ថ្ងៃទី២០ ខែកញ្ញា ឆ្នាំ២០២៥ -- នាព្រឹកថ្ងៃទី២០ ខែកញ្ញា ឆ្នាំ២០២៥ នេះ ឯកឧត្តម នួន ផារ័ត្ន អភិបាលខេត្តកំពង់ធំ បានអញ្ជើញបើកកញ្ចប់បញ្ជីលទ្ធផលប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)សម័យប្រឡង ២៨ សីហា ២០២៥ នៅវិទ្យាល័យកំពង់ធំ និងដើម្បីធ្វើការប្រគល់ជូនដល់មណ្ឌលប្រឡងទាំង ១១មណ្ឌលក្នុងខេត្តកំពង់ធំដើម្បីបិទផ្សាយជូនបេក្ខជន។

ឯកឧត្តម នួន ផារ័ត្ន សូមចូលរួមអបអរសាទរដល់ក្មួយៗជាបេក្ខជនទាំងអស់គ្នា ដែលទទួលបានលទ្ធផលជោគជ័យក្នុងការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២៨  សីហា ២០២៥ នៅខេត្តកំពង់ធំ ដែលជាប់និទ្ទេស A ចំនួន ៨២នាក់ ព្រមទាំងលើកទឹកចិត្តដល់ក្មួយៗ ដែលមិនទាន់ទទួលបានលទ្ធផលដូចបំណង សូមកុំមានការបាក់ទឹកចិត្ត និងបន្តខិតខំព្យាយាមសិក្សាបន្ថែមទៀត និងអាចរៀនជំនាញបន្ថែមនៅសាលាពហុបច្ចេកទេសបណ្ដុះបណ្ដាលវិជ្ជាជីវៈខេត្តកំពង់ធំដែលមានជំនាញជាច្រើនស្របតាមតម្រូវការទីផ្សារបច្ចុប្បន្ន។

ឯកឧត្តម នួន ផារ័ត្ន បានបន្ថែមទៀតថា ចំពោះការកើនឡើងនៃការប្រឡងជាប់សញ្ញាបត្រមធ្យមសិក្សាទុតិយភូមិនៅពេលនេះ មិនមែនដោយសារវិញ្ញាសាស្រួលនោះទេ គឺដោយសារការខិតខំប្រឹងប្រែងរៀនសូត្ររបស់ក្មួយៗបានល្អប្រសើរជាងមុន ហើយចំពោះប្អូនៗដែលនឹងត្រូវចូលសិក្សាថ្នាក់ទី១២ ត្រូវខិតខំរៀនសូត្រ ដើម្បីទទួលបានលទ្ធផលល្អ ប្រឡងជាប់គ្រប់ៗគ្នា ដើម្បីសម្រេចជោគវាសនារបស់ខ្លួន។

ជាលទ្ធផល ការប្រឡងសញ្ញាបត្រមធ្យមសិក្សាទុតិយភូមិនៅខេត្តកំពង់ធំមាមបេក្ខជនជាប់និទ្ទេស A ចំនួន ៨២នាក់ (ស្រី ៥៤នាក់) និទ្ទេស B ចំនួន ៣៣១នាក់ (ស្រី ២០៧នាក់) និទ្ទេស C ចំនួន ១.២៧៤នាក់ (ស្រី ៨២៥នាក់) និទ្ទេស D ចំនួន ២.០៤៦នាក់ (ស្រី ១.២៤៩នាក់) និងនិទ្ទេស E ចំនួន ១.៤០០នាក់ (ស្រី ៧០២នាក់)៕

ដោយ: ស៊ុម វណ្ណា