AKP កំពង់ស្ពឺ ថ្ងៃទី២០ ខែកញ្ញា ឆ្នាំ២០២៥ -- ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ អញ្ជើញចូលរួមប្រកាសបើកលទ្ធផលប្រឡងសញ្ញាបត្រ មធ្យមសិក្សាទុតិយភូមិ (បាក់ឌុប) ឆ្នាំសិក្សា ២០២៤-២០២៥ សម័យប្រឡង៖ ២៤ សីហា ២០២៥ នៅវិទ្យាល័យកំពង់ស្ពឺ ស្ថិតនៅក្នុងក្រុងច្បារមន នាព្រឹកថ្ងៃទី២០ ខែកញ្ញា ឆ្នាំ២០២៥ នេះ។

ជាលទ្ធផល ខេត្តកំពង់ស្ពឺស្ថិតក្នុងចំណោមខេត្តកំពូលទាំង១០ (Top 10) នៅទូទាំងប្រទេសដែលមានបេក្ខជនប្រឡងបាក់ឌុបជាប់ច្រើនជាងគេ ដែលនៅក្នុងនោះ មានសិស្សស្រី ៥.០៣៨នាក់ និងសិស្បប្រុស ៣.០១៤នាក់។ ក្នុងចំណោមសិស្សានុសិស្សដែលប្រឡងជាប់នោះ សិស្សដែលទទួលបាននិទ្ទេស A មានចំនូន ៧៩នាក់ និទ្ទេស B មានចំនួន ៣៣៧នាក់ និទ្ទេស C មានចំនូន ១.២២៤នាក់ និទ្ទេស D មានចំនូន ២.០១០នាក់ និងនិទ្ទេស E មានចំនូន ២.៣៨៨នាក់ ហើយក្នុងនោះ វិទ្យាល័យកំពង់ស្ពឺ ជាវិទ្យាល័យគម្រូដែលសិស្សទទួលបាននិទ្ទេស A ច្រើនជាងគេ។

ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ  បានចូលរួមអបអរសាទរជាមួយនឹងក្មួយៗដែលបានប្រឡងជាប់សញ្ញាបត្រមធ្យមសិក្សាទុតិយភូមិ ព្រមទាំងកោតសរសើរដល់ក្មួយៗ ដែលបានខិតខំប្រឹងប្រែងរៀនសូត្ររហូតប្រឡងជាប់និទ្ទេស A ជាច្រើនរូប ដែលនាំមកនូវកេរ្តិ៍ឈ្មោះ កិត្តិយសសម្រាប់ខ្លួនយើង ក្រុមគ្រួសារយើង សម្រាប់សាលារៀន ក៏ដូចជាខេត្តកំពង់ស្ពឺយើងផងដែរ។

ឯកឧត្តមបណ្ឌិតអភិបាលខេត្តមានប្រសាសន៍បន្ថែមថា នាពេលខាងមុខនេះ ក្មួយៗត្រូវទៅបន្តការសិក្សានៅតាមសាកលវិទ្យាល័យ សូមក្មួយៗខិតខំប្រឹងប្រែងរៀនសូត្រ ដើម្បីយកចំណេះវិជ្ជា មកចូលរួមអភិវឌ្ឍន៍គ្រួសារ សហគមន៍ និងសង្គមជាតិ៕

ដោយ: លឹម សាន្ត