AKP កំពង់ធំ ថ្ងៃទី២០ ខែកញ្ញា ឆ្នាំ២០២៥ -- ឯកឧត្តម នួន ផារ័ត្ន អភិបាលខេត្តកំពង់ធំ និងជាប្រធានគណ:កម្មាធិការគ្រប់គ្រងគ្រោះមហន្តរាយខេត្តកាលពីរសៀលថ្ងៃទី១៩ ខែកញ្ញា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាត្រៀមបង្ការ និងដោះស្រាយស្ថានភាពទឹកជំនន់ ក្នុងភូមិសាស្ត្រខេត្តកំពង់ធំ នៅក្នុងដូវវស្សានេះនៅសាលប្រជុំប្រាសាទយាយព័ន្ធ នៃសាលាខេត្តកំពង់ធំ។

ឯកឧត្តម នួន ផារ័ត្ន ថ្លែងថា នៅក្នុងរដូវវស្សាឆ្នាំនេះ ស្ថានភាពទឹកជំនន់នៅក្នុងភូមិសាស្ត្រខេត្ត ស្ថិតនៅក្នុងស្ថានភាពមួយដែលយើងមិនទាន់មានការប្រកាសអាសន្ននោះទេ។ ទោះបីស្ថានភាពទឹកជំនន់នៅក្នុងភូមិសាស្ត្រខេត្តកំពង់ធំនៅមិនទាន់មានការប្រកាសអាសន្នក៏ដោយ យើងត្រូវជូនដំណឹងអំពីស្ថានភាពទឹកជំនន់ឱ្យបានជាប់ជាប្រចាំ និងត្រៀមវិធានការបម្រុងទុកជាមុន ដើម្បីដោះស្រាយបញ្ហាប្រឈមនៅពេលកើតមានឡើងបានទាន់ពេលវេលា។

ទន្ទឹមនឹងនេះ ឯកឧត្តម នួន ផារ័ត្ន បានជំរុញមន្ទីរអង្គភាពជំនាញពាក់ព័ន្ធ ជាពិសេសមន្ទីរកិសកម្ម រុក្ខាប្រមាញ់ និងនេសាទ ត្រូវសិក្សា និងផ្តល់ព័ត៌មានទីតាំងដែលមានការលិចដំណាំស្រូវជាប្រចាំ ដើម្បីចាត់វិធានការឆ្លើយតបឱ្យបានទាន់ពេលវេលា។ រដ្ឋបាលក្រុង ស្រុក ត្រូវផ្តល់ព័ត៌មាន វាយតម្លៃសភាពការណ៍និងធ្វើរបាយការណ៍ឱ្យបានទាន់ពេលវេលា នៅពេលមានគ្រោះមហន្តរាយកើតឡើង។ កម្លាំងមានសមត្ថកិច្ច មន្ទីរ អង្គភាព រដ្ឋបាលក្រុង ស្រុក ត្រូវសហការគ្នាក្នុងការយកចិត្តទុកដាក់តាមដានបញ្ហាគ្រោះមហន្តរាយ និងឆ្លើយតបឱ្យបានទាន់ពេលវេលា។ លេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្តនឹងបូកសរុបបញ្ហាប្រឈមនានា ហើយចុះតាមដាន ឆ្លើយតប និងដោះស្រាយបញ្ហានានាឱ្យមានប្រសិទ្ធភាព៕

ដោយ ស៊ុម វណ្ណា (ប្រភព៖ រដ្ឋបាលខេត្តកំពង់ធំ)