AKP កំពង់ធំ ថ្ងៃទី២០ ខែកញ្ញា ឆ្នាំ២០២៥ -- មន្ទីរអភិវឌ្ឍន៍ខេត្តកំពង់ធំបានបើកកិច្ចប្រជុំបូកសរុបលទ្ធផលការងារប្រចាំត្រីមាសទី៣ និងលើកទិសដៅការងារប្រចាំត្រីមាសទី៤ឆ្នាំ២០២៥ ក្រោមអធិបតីភាពឯកឧត្តម អ៊ិន ចន្ថា រដ្ឋលេខាធិការតំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទដោយមានការចូលរួមពីឯកឧត្តម តេ យ៉ូស៊ូ សមាជិកក្រុមប្រឹក្សាខេត្ត លោក ព្រឹម រដ្ឋាអភិបាលរងខេត្តកំពង់ធំ ថ្នាក់ដឹកនាំមន្ត្រីរាជការមន្ទីរ ប្រធាន អនុប្រធានមន្ទីរពាក់ព័ន្ធ អភិបាលរងក្រុងស្រុក ប្រធានការិយាល័យអភិវឌ្ឍន៍ក្រុង ស្រុកនិងអង្គការដៃគូក្នុងខេត្តសរុបចំនួន៥០នាក់(ស្រី០៧នាក់) កាលពីរសៀលថ្ងៃទី១៩ ខែកញ្ញា ឆ្នាំ២០២៥។

បន្ទាប់ពីបានស្ដាប់នូវរបាយការណ៍បូកសរុបលទ្ធផលការងារដែលបានរាយការណ៍ដោយលោក លោក តាន់ វាសនាប្រធានមន្ទីរអភិវឌ្ឍន៍ជនបទខេត្តកំពង់ធំរួចមកលោកព្រឹម រដ្ឋាបានបញ្ចាក់ថាស្របតាមយុទ្ធសាស្ត្រនិងចក្ខុវិស័យរបស់រាជរដ្ឋាភិបាលក្រសួងអភិវឌ្ឍន៍ជនបទកំពុងចូលរួមយ៉ាងសកម្មតាមកម្មវិធីអាទិភាពសំខាន់ៗ ទាំង៥របស់ក្រសួងគឺ៖ ១. ការអភិវឌ្ឍហេដ្ឋារចនាសម្ព័ន្ធរូបវន្តនិងគមនាគមន៍ជនបទប្រកបដោយភាពធន់។ ២. ការលើកកម្ពស់ការទទួលបានទឹកស្អាតនិងអនាម័យជនបទ។ ៣. ការជំរុញអភិវឌ្ឍន៍សហគមន៍ជនបទនិងចលនាភូមិគម្រូ។ ៤. ការលើកកម្ពស់ការធ្វើពិពិធកម្មសេដ្ឋកិច្ចជនបទ និង៥. ការគ្រប់គ្រងស្ថាប័ននិងសេវាគាំទ្រទូទៅ។

ក្នុងឱកាសនោះ ឯកឧត្តម អ៊ិន ចន្ថារដ្ឋលេខាធិការក្រសួងអភិវឌ្ឍន៍ជនបទ បានពាំនាំប្រសាសន៍ផ្តាំផ្ញើសាកសួរសុខទុក្ខ ពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ជូនដល់អង្គពិធីទាំងមូល។ ដើម្បីបន្តពន្លឿនកិច្ចអភិវឌ្ឍនិងជំរុញការអនុវត្តឱ្យកាន់តែស៊ីជំរៅរាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណដំណាក់កាលទី១សម្រាប់នីតិកាលទី៧ នៃរដ្ឋសភាដោយផ្អែកលើបាវចនាចំនួន៥គឺ៖"កំណើន ការងារ  សមធម៌ ប្រសិទ្ធភាព និងចីរភាព"មានគោលដៅជាយុទ្ធសាស្ត្រចំនួន៥គឺ៖ ១-ធានាឱ្យបានកំណើនសេដ្ឋកិច្ចខ្ពស់,២-បង្កើតការងារឱ្យបានកាន់តែច្រើន, ៣-សម្រេចឱ្យបាននូវគោលដៅ,៤-កាត់បន្ថយភាពក្រីក្រ បន្តពង្រឹងសមត្ថភាពអភិបាលកិច្ចនិងលើកកម្ពស់គុណភាពស្ថាប័ន ៥-ការធានាឱ្យបាននូវចីរភាពនៃការអភិវឌ្ឍសេដ្ឋកិច្ចនិងសង្គម។

ឯកឧត្តម អ៊ិន ចន្ថា រដ្ឋលេខាធិការក្រសួងអភវឌ្ឍន៍ជនបទ បានបន្ថែមថា រាជរដ្ឋាភិបាលបានកំណត់យកវិស័យអាទិភាពគន្លឹះចំនួន៥រួមមាន÷ "មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល"ក្នុងគោលដៅប្រែក្លាយកម្ពុជា ទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០និងប្រទេសដែលមានប្រាក់ចំណូលកម្រិតខ្ពស់នៅឆ្នាំ២០៥០។ ស្របតាមយុទ្ធសាស្ត្ររបស់រាជរដ្ឋាភិបាល ក្រសួងអភិវឌ្ឍន៍ជនបទកំពុងចូលរួមយ៉ាងសកម្មក្នុងការលើកកម្ពស់គុណភាពនិងគុណតម្លៃនៃជីវិតប្រជាជននៅតំបន់ជនបទប្រកបដោយបរិយាប័ន្នទាំងផ្នែកសេដ្ឋកិច្ច សង្គមកិច្ចនិងវប្បធម៌ឱ្យកាន់តែរីកចម្រើនជាលំដាប់៕

ដោយ ស៊ុម វណ្ណា