AKP ភ្នំពេញ ថ្ងៃទី២០ ខែកញ្ញា ឆ្នាំ២០២៥ -- ឯកឧត្តម ហេង សុខចំរើន អនុរដ្ឋលេខាធិការ តំណាងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានថ្លែងបញ្ជាក់ថា អនាគតនៃវិស័យទេសចរណ៍កម្ពុជា គឺមិនអាចកាត់ផ្ដាច់ពីការស្រូបទាញកំណើននៃលំហូរទេសចរ និងវិនិយោគិនចិនបានឡើយ ហើយថាកម្ពុជាបានត្រៀមលក្ខណៈសម្បត្តិគ្រប់គ្រាន់ក្នុងការទទួលភ្ញៀវទេសចរ និងវិនិយោគិនអន្តរជាតិ ជាពិសេសជនជាតិចិន តាមរយៈការសម្រួលបរិយាកាស និងការទទួលស្វាគមន៍យ៉ាងកក់ក្តៅដល់ទេសចរ និងវិនិយោគិនទាំងអស់នៅកម្ពុជា។ ការគូសបញ្ជាក់របស់ ឯកឧត្តម ហេង សុខចំរើន  យ៉ាងដូច្នេះធ្វើឡើងក្នុងកម្មវិធី “ស៊ីនជាំងជាទីកន្លែងដ៏ស្រស់ស្អាត” ដែលបានប្រារព្ធឡើងនៅសណ្ឋាគារសូហ្វីតែល ភូគីត្រា នាថ្ងៃទី១៩ ខែកញ្ញា ឆ្នាំ២០២៥។

ឯកឧត្តមអនុរដ្ឋលេខាធិការបានបន្តថា កំណើនទេសចរចិន គឺជាកាលានុវត្តដ៏សំខាន់ដែលនឹងជំរុញការអភិវឌ្ឍវិស័យទេសចរណ៍ និងបង្កើតឱកាសវិនិយោគក្នុងវិស័យផ្សេងៗជាលក្ខណៈប្រព័ន្ធដែលកម្ពុជាបានចាត់ទុកចិនជាដៃគូយុទ្ធសាស្ត្រ និងជាប្រភពទីផ្សារដ៏សំខាន់បំផុតសម្រាប់មូលដ្ឋាននៃកំណើនសេដ្ឋកិច្ច និងការអភិវឌ្ឍប្រទេសជាតិ។ ឯកឧត្តមថា ការរៀបចំកម្មវិធី “ស៊ីនជាំងជាទីកន្លែងដ៏ស្រស់ស្អាត” នាពេលនេះ ពិតជាមានសារៈសំខាន់ណាស់ ដែលបានឆ្លុះបញ្ចាំងឱ្យឃើញនូវការយកចិត្តទុកដាក់ខ្ពស់របស់ប្រមុខរដ្ឋាភិបាលនៃប្រទេសទាំងពីរ ជាពិសេសកិច្ចសហការដ៏ល្អរវាងក្រសួងទេសចរណ៍កម្ពុជា និងស្ថានទូតនៃសាធារណរដ្ឋប្រជាមានិតចិនប្រចាំកម្ពុជាក្នុងការពង្រឹង និងពង្រីកចំណងមិត្តភាពកម្ពុជា-ចិន ស្របតាមស្មារតីមិត្តដែកថែប សហគមន៍ជោគវាសនារួមកម្ពុជា-ចិន និងកិច្ចសហប្រតិបត្តិការត្បូងពេជ្ររវាងកម្ពុជា និងចិនឱ្យកាន់តែរឹងមាំថែមទៀត។ កម្មវិធីនេះក៏នឹងជួយគាំទ្រដល់យុទ្ធនាការ “ឆ្នាំទេសចរណ៍កម្ពុជា-ចិន ២០២៥” និងចូលរួមចំណែកយ៉ាងសកម្មដល់យុទ្ធសាស្ត្រ “ខ្សែក្រវាត់ និងផ្លូវ” របស់ប្រទេសចិនផងដែរ។

ក្នុងឱកាសនេះ ឯកឧត្តម ហេង សុខចំរើន បានអំពាវនាវសូមឱ្យមានការចូលរួមទាំងអស់គ្នាជាមួយក្រសួងទេសចរណ៍ក្នុងយុទ្ធនាការ “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” “ទេសចរណ៍រីកលូតលាស់ក្នុងសន្តិភាព” “ម្នាក់ៗជាអ្នកផ្សព្វផ្សាយទេសចរណ៍កម្ពុជា-ចិនម្នាក់” និងសូមឱ្យចំណងសាមគ្គីភាព មិត្តភាព ភាពជាដៃគូកិច្ចសហប្រតិបត្តិការត្បូងពេជ្ររវាងប្រទេស និងប្រជាជនទាំងពីរកាន់តែរឹងមាំ មានវិបុលភាព និងស្ថិតស្ថេរជាអមតៈ៕

ដោយ៖ ចាន់ សុភឿន