AKP ព្រះសីហនុ ថ្ងៃទី១៩ ខែកញ្ញា ឆ្នាំ២០២៥--  លោក ឯម ភាព អភិបាលរងនៃគណៈអភិបាលខេត្តព្រះសីហនុ អញ្ជើញសំណេះសំណាលជាមួយថ្នាក់ដឹកនាំ មន្ត្រីរាជការ មន្ត្រីជាប់កិច្ចសន្យានៃរដ្ឋបាលខេត្តព្រះសីហនុ ក្នុងឱកាសពិធីបុណ្យភ្ជំបិណ្ឌ ដាក់បិណ្ឌដែលជាបុណ្យប្រពៃណីជាតិខ្មែរ នារសៀលថ្ងៃសុក្រ ទី១៩ ខែកញ្ញា ឆ្នាំ២០២៥។

លោក ឯម ភាព បានថ្លែងថា ជារៀងរាល់ឆ្នាំ ក្នុងឱកាសមុនបុណ្យចូលឆ្នាំខ្មែរ និងបុណ្យកាន់បិណ្ឌ ភ្ជំបិណ្ឌ រដ្ឋបាលខេត្តព្រះ សីហនុតែងតែបានរៀបចំធ្វើការជួបជុំគ្នាដើម្បីបង្កើនភាពស្និទស្នាលរវាងថ្នាក់ដឹកនាំខេត្ត ជាមួយមន្ត្រីរាជការ មន្ត្រីកិច្ចសន្យា និងនិវត្តជន។ ហើយឆ្នាំនេះ ក៏មិនខុសផ្លែកពីឆ្នាំមុនដែរ ដែលរដ្ឋបាលខេត្តបានរៀបចំការជួបជុំគ្នានាពេលនេះ គឺជាការថ្លែងអំណគុណដល់មន្ត្រីរាជការ មន្ត្រីកិច្ចសន្យារបស់យើងដែលបានខិតខំបំពេញការងារមិនក្លាយនឿយហត់ ជាពិសេសក្នុងការបម្រើសេវាសាធារណៈជូនប្រជាពលរដ្ឋទទួលបានការគាំទ្រពីបងប្អូនប្រជាពលរដ្ឋក្នុងខេត្តព្រះសីហនុ។ ទន្ទឹមនោះ អាជ្ញាធរក្រុង ស្រុក ខេត្ត និងមន្ទីរជំនាញពាក់ព័ន្ធជួយសម្របសម្រួលដល់ប្រជាពលរដ្ឋខ្មែរដែលបានវិលត្រឡប់មកពីប្រទេសថៃវិញ ពួកគាត់មានការងារធ្វើនៅតាមរោងចក្រ សហគ្រាសនៅក្នុងខេត្តព្រះសីហនុ មិនមានបងប្អូនពលករណាម្នាក់គ្នានការងារធ្វើនោះទេ លុះណាតែពួកគាត់មិនចង់ធ្វើ គាត់សម្រាក ឬប្រកបមុខរបរដោយខ្លួនឯង។

លោកអភិបាលរងខេត្ត បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ មន្ត្រីកិច្ចសន្យាបានបំពេញការងារទៅតាមជំនាញរៀងៗខ្លួនបានល្អ ក៏ដូចទៅពេលខាងមុខដោយទទួលបានជោគជ័យលើគ្រប់វិស័យ ធ្វើឱ្យខេត្តព្រះសីហនុមានការអភិវឌ្ឍរីកចម្រើនលើគ្រប់វិស័យ និងទទួលបាននូវកំណើនសេដ្ឋកិច្ចខ្ពស់ ទាំងអស់នេះ គឺជាការចូលរួមរបស់បងប្អូន។ ហើយសកម្មភាពទាំងអស់នេះ ជាមោទនភាពរបស់យើងទាំងអស់គ្នា ចំពោះសមិទ្ធផល និងលទ្ធផលការងារនានាដែលយើងរួមគ្នាសម្រេចបាននាពេលកន្លងមក គឺកេីតចេញពីការខិតខំប្រឹងប្រែង តស៊ូ និងការចូលរួមពីគ្រប់ភាគីពាក់ព័ន្ធទាំងអស់ និងសូមឱ្យមន្ត្រីរបស់យើងបន្តការបម្រើសេវាសាធារណៈឱ្យកាន់តែមានប្រសិទ្ធភាព និងប្រសិទ្ធផលថែមទៀត ស្របតាមគោលនយោបាយកំណែទម្រង់របស់រាជរដ្ឋាភិបាលនីតិកាលទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងឱកាសនោះ លោកអភិបាលរងខេត្តក៏បានធ្វើការផ្តាំផ្ញើដល់មន្ត្រីរាជការ មន្ត្រីកិច្ចសន្យាសូមមានការប្រុងប្រយ័ត្ន និងចូលរួមគោរពច្បាប់ចរាចរណ៍ផ្លូវគោកឱ្យបានគ្រប់គ្នា ព្រោះគ្រោះថ្នាក់ចរាចរណ៍អាចកើតឡើងគ្រប់ពេលវេលា ប្រសិនបើយើងមិនមានការប្រុងប្រយ័ត្ននោះទេ គ្រោះថ្នាក់ចរាចរណ៍ជាឃាតករលាក់មុខបង្កឱ្យស្លាប់ ពិការភាព ខូចខាតទ្រព្យសម្បត្តិឯកជន និងទ្រព្យសម្បត្តិរដ្ឋថែមទៀតផង។

ទន្ទឹមនឹងនេះ រដ្ឋបាលខេត្តក៏បានឧបត្ថម្ភថវិកាសម្រាប់មន្ត្រីរាជការ មន្ត្រីកិច្ចសន្យា ដើម្បីយកទៅធ្វើបុណ្យភ្ជំបិណ្ឌជួបជុំគ្រួសារតាមប្រពៃណីខ្មែររៀងខ្លួន៕

ដោយ ងូ សុមុនី