AKP បាត់ដំបង ថ្ងៃទី១៩ ខែកញ្ញា ឆ្នាំ២០២៥ -- អ្នកសារព័ត៌មានត្រូវតែស្វែងយល់ឱ្យបានច្បាស់ស៊ីជម្រៅអំពីសិទិ្ធ ករណីយកិច្ច និងការទទួលខុសត្រូវរបស់ខ្លួនជាអ្នកសារព័ត៌មាន និងត្រូវបន្តដុសខាត់ជំនាញនិងពង្រឹងសមត្ថភាព បទពិសោធន៍វិជ្ជាជីវៈសារព័ត៌មាន ដើម្បីបំពេញតួនាទីដោយក្រមសីលធម៌ពេញលេញ បម្រើដល់ប្រយោជន៍សាធារណៈ រួមចំណែកលើកកម្ពស់សិទ្ធិទទួលព័ត៌មានរបស់ប្រជាពលរដ្ឋ។ នេះគឺជាការលើកឡើងរបស់ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ដែលបានថ្លែងក្នុងឱកាសផ្តល់បទអន្តរាគមន៍ក្នុងវគ្គបំពាក់បំប៉នស្តីពីការពង្រឹងសមត្ថភាពលើការងារព័ត៌មាននិងសាធារណមតិ នៅសាលាខេត្តបាត់ដំបង នាថ្ងៃទី១៨ ខែកញ្ញា ឆ្នាំ២០២៥ ។ 

ឯកឧត្តម ទេព អស្នារិទ្ធ បានមានប្រសាសន៍ក្រើនរម្លឹកដល់អ្នកសារព័ត៌មានឱ្យស្វែងយល់ឱ្យច្បាស់ពីច្បាប់ និងព្រំដែននៃសេរីភាព ហើយត្រូវអនុវត្តសិទ្ធិចុះយកព័ត៌មាន ផលិត និង រាយការណ៍ព័ត៌មានដោយ អនុលោមតាមក្របខណ្ឌច្បាប់កំណត់។ ឯកឧត្តមអ្នកនាំពាក្យបានសង្កត់ធ្ងន់ថា៖ «អ្នកសារព័ត៌មានមានតួនាទីសំខាន់ក្នុងការចូលរួមធានាការផ្សព្វផ្សាយប្រកបដោយភាពសុក្រឹត មានគុណភាព ផ្តល់ព័ត៌មានពិតជូនសាធារណៈជន និងរួមចំណែករក្សាទំនុកចិត្តរបស់ប្រជាពលរដ្ឋមកលើប្រព័ន្ធផ្សព្វផ្សាយ។ ហេតុដូច្នេះ អ្នកសារព័ត៌មានត្រូវសិក្សា ស្វែងយល់ និងធ្វើការស្រាវជ្រាវឱ្យបានច្រើនអំពីប្រធានបទនីមួយៗ ពិសេសពេលចុះយក និងរាយការណ៍ព័ត៌មានស្តីពីប្រធានបទពិបាក ឬរសើប និងដោយត្រូវស្វែងរកការសហការពីជំនាញ អាជ្ញាធរពាក់ព័ន្ធ ដើម្បីធ្វើឱ្យសេចក្តីរាយការណ៍ និងការផ្សព្វផ្សាយព័ត៌មាននោះមានភាពគ្រប់ជ្រុងជ្រោយ ដោយយោងប្រភពច្បាស់លាស់ ផ្លូវការ ហើយបានផ្តល់សំឡេងដល់ភាគីពាក់ព័ន្ធក្នុងសាច់រឿង ឬប្រធានបទនោះ»។ 

ឯកឧត្ដមអ្នកនាំពាក្យក្រសួងព័ត៌មានបានបញ្ជាក់ថា កន្លងទៅក្រសួងបានកត់សម្គាល់មានអ្នកសារព័ត៌មានខ្លះបានប្រព្រឹត្តផ្ទុយទៅនឹងនិយាមប្រតិបត្តិវិជ្ជាជីវៈ ផ្ទុយនឹងក្រមសីលធម៌ និងការដើរហួសគន្លងនៃច្បាប់។ ឯកឧត្តមបានគូសបញ្ជាក់ថា ការអនុវត្តច្បាប់ពុំមែនជាការរិតត្បិតសិទ្ធិសេរីភាពឡើយ ប៉ុន្តែជាការអនុវត្តនៅក្នុងក្របខ័ណ្ឌសង្គមដែលមានលទ្ធិប្រជាធិបតេយ្យនីតិរដ្ឋ ចំពោះទង្វើប្រាសចាកក្រមសីលធម៌ ឬការបំពានច្បាប់ លិខិតបទដ្ឋានជាធរមាន។ ឯកឧត្ដមបានបញ្ជាក់ផងដែរថា នៅពេលអ្នកសារព័ត៌មានបានផ្សាយប្រាសចាកការពិត ក្រមសីលធម៌វិជ្ជាជីវៈ បំពានសិទ្ធិ និងករណីយកិច្ចរបស់ខ្លួនជាអ្នកសារព័ត៌មាន ក្រសួងតែងតែធ្វើការណែនាំ និងតម្រង់ទិស ដើម្បីឱ្យអនុវត្តន៍ដោយគោរពតាមនិយាមវិជ្ជាជីវៈ និងក្រមសីលធម៌វិញ ព្រមទាំងបានឱ្យអ្នកសារព័ត៌មាននោះផ្សាយអត្ថបទកែតម្រូវជាមួយព័ត៌មានត្រឹមត្រូវវិញ ហើយបើនៅតែបន្តសកម្មភាពបំពានលើវិជ្ជាជីវៈ និងក្រមសីលធម៌ធ្ងន់ធ្ងរ ក្រសួងនឹងអាចឈានទៅសម្រេចលុបអាជ្ញាបណ្ណ ដែលទាំងនេះជាការអនុវត្តនីតិវិធីក្នុងក្របខណ្ឌច្បាប់ និងដោយអនុលោមតាមច្បាប់ស្តីពីរបបសារព័ត៌មាន។

ជាមួយគ្នានេះ ឯកឧត្តម ទេព អស្នារិទ្ធ បានបញ្ជាក់បន្ថែមទៀតថា សេរីភាពខាងសារព័ត៌មាន មិនផ្តល់អភ័យឯកសិទ្ធិឱ្យអ្នកអនុវត្ត រួចផុតពីការទទួលខុសត្រូវចំពោះទង្វើបំពានច្បាប់ឡើយ។ ឯកឧត្តមអ្នកនាំពាក្យបានឱ្យដឹងទៀតថា អ្នកសារព័ត៌មានត្រូវប្រតិបត្តិតាមក្រមសីលធម៌ និងនិយាមវិជ្ជាជីវៈឱ្យបានត្រឹមត្រូវ និងត្រូវមានមនសិការ និងចូលរួមការពារឧត្តមប្រយោជន៍របស់ជាតិ។ ទន្ទឹមនេះ អ្នកសារព័ត៌មានត្រូវចៀសវាងការផ្សាយព័ត៌មាន ដែលបង្កមហន្តរាយដល់សន្តិសុខជាតិ ឬប៉ះពាល់ដល់ស្ថិរភាពនយោបាយ សង្គម។ ឯកឧត្តមក៏បានរម្លឹកដល់អ្នកសារព័ត៌មានផងដែរថា ត្រូវបែងចែកឱ្យច្បាស់រវាងការផ្ដល់ព័ត៌មាន និងការបញ្ចេញមតិផ្ទាល់ខ្លួន ព្រមទាំងធានារាល់ការបញ្ចេញមតិ ឬការរិះគន់ ត្រូវធ្វើឡើងដោយភាពថ្លៃថ្នូរ និងគោរពសិទ្ធិអ្នកដទៃ។ ជាងនេះទៀតអ្នកសារព័ត៌មាន ត្រូវមានកាតព្វកិច្ចរាយការណ៍ព័ត៌មាន ដោយមានប្រភពច្បាស់លាស់ ត្រូវផ្ទៀងផ្ទាត់ព័ត៌មាន និងចូលរួមទប់ស្កាត់ព័ត៌មានក្លែងក្លាយ ព័ត៌មានក្លែងបន្លំ ព័ត៌មានបំភ្លៃ និងព័ត៌មានភាន់ច្រឡំ។ 

ក្នុងឱកាសនោះ ឯកឧត្តមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានក៏បានអំពាវនាវដល់អ្នកសារព័ត៌មាន ទាំងអាជីព និងមិនមែនអាជីព ត្រូវមានទំនួលខុសត្រូវខ្ពស់ចំពោះការផ្សព្វផ្សាយព័ត៌មាន ដោយចៀសវាងការបំផ្លើស បំភ្លៃ ឬការកាឡៃព័ត៌មានប្រាសចាកពីការពិត ដើម្បីចូលរួមក្នុងការធានាសណ្តាប់ធ្នាប់ ស្ថិរភាព និងសន្តិសុខសង្គម ព្រមទាំងតម្កល់ លើកតម្កើងឧត្តមប្រយោជន៍ជាតិជាធំ។ 

សូមជម្រាបជូនផងដែរថា គិតត្រឹមខែសីហា ឆ្នាំ២០២៥នេះ ក្រសួងព័ត៌មាន បានចេញបណ្ណសារព័ត៌មាន ជូនដល់អ្នកសារព័ត៌មានជាង ៨ ៧០០ បណ្ណ ដែលមានអង្គភាពចំនួន ១ ៦២០ អង្គភាព ដោយរួមទាំងសារព័ត៌មានប្រពៃណី និងទំនើប៕

ដោយ៖ រិទ្ធី