AKP កំពង់ចាម ថ្ងៃទី១៩ ខែកញ្ញា ឆ្នាំ២០២៥-- ឯកឧត្ដម ខ្លូត ផន ប្រធានក្រុមប្រឹក្សាខេត្ត ឯកឧត្តម អ៊ុន ចាន់ដា អភិបាលខេត្តកំពង់ចាម បានអញ្ជើញជួបសំណេះ សំណាល ជាមួយថ្នាក់ដឹកនាំ ក្រុមប្រឹក្សាខេត្ត គណៈអភិបាល មន្ត្រីរាជការ មន្ត្រីជាប់កិច្ចសន្យា និវត្តជន នៃរដ្ឋបាលខេត្តកំពង់ចាម រួមទាំងសមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលសាលាខេត្ត មន្ត្រីរាជការទីចាត់ការ និងអង្គភាពចំណុះសាលាខេត្ត នៅព្រឹកថ្ងៃទី១៩ ខែកញ្ញា ឆ្នាំ២០២៥។

នាឱកាសនោះ ឯកឧត្តម អ៊ុន ចាន់ដា បានលើកឡើងថា រដ្ឋបាលខេត្តកំពង់ចាមរបស់យើង តែងតែរៀបចំធ្វើការជួបជុំគ្នាមុនឱកាសបុណ្យភ្ជុំបិណ្ឌ និងបុណ្យចូលឆ្នាំថ្មីជារៀងរាល់ឆ្នាំ។ ការជួបជុំគ្នានេះ គឺជាឱកាសដើម្បីជួបសំណេះសំណាល ជួបជុំបង្កើតទំនាកទំនងប្រកបដោយភាពស្និទ្ធស្នាល ភាពស្នាមញញឹម និងឧបត្ថម្ភនូវថវិកាមួយចំនួន ជូនបងប្អូនមន្ត្រីរាជការ ដើម្បីយកទៅប្រើប្រាស់ទៅតាមសេចក្តីត្រូវការជាក់ស្តែងក្នុងនៅក្នុងពិធីបុណ្យ។

ឯកឧត្តមអភិបាលខេត្តបានកោតសរសើរ និងវាយតម្លៃខ្ពស់ចំពោះមន្ត្រីរាជការរបស់រដ្ឋបាលខេត្តយើងដែលបានយកចិត្តទុកដាក់ក្នុងការបំពេញការងារតាមជំនាញរបស់ខ្លួន កន្លងមក ដោយទទួលបានជោគជ័យលើគ្រប់វិស័យរបស់ខេត្តធ្វើឱ្យខេត្តទទួលបាននូវកំណើនសេដ្ឋកិច្ចខ្ពស់។ ជាមោទនភាពរបស់យេីង ចំពោះសមិទ្ធផល​ និងលទ្ធផលការងារនានាកន្លងមកនេះ​ គឺកេីតចេញពីការប្រឹងប្រែង​ តស៊ូ​ និងមានការចូលរួមពីគ្រប់ភាគីពាក់ព័ន្ធទាំងអស់ដែលការយកចិត្តទុកដាក់ពីមន្ត្រី គ្រប់ភាគីពាក់ព័ន្ធ ក្នុងការផ្តល់សេវាសាធារណៈបានល្អនិងសូមឱ្យមន្ត្រីរបស់យើងបន្តការផ្តល់សេវាសាធារណៈឱ្យកាន់តែប្រសិទ្ធភាពបន្ថែមទៀត។

ឯកឧត្តមអភិបាលខេត្តក៏បានជំរុញ និងលើកទឹកចិត្ត ដល់មន្ត្រីរាជការទាំងអស់នៅក្នុងសាលាខេត្ត សូមខិតខំបំពេញការងារ និងម្ចាស់ការទទួលខុសត្រូវលើកិច្ចការដែលថ្នាក់ដឹកនាំបានប្រគល់ជូនឱ្យបានល្អិតល្អន់ និងគ្រប់ជ្រុងជ្រោយ ជាពិសេសត្រូវខិតខំធ្វើការអភិវឌ្ឍន៍សមត្ថភាពបំពេញការងាររបស់ខ្លួនម្នាក់ៗ ឱ្យស្របតាមសម័យបច្ចេកវិទ្យា ទាន់សម័យនាពេលបច្ចុប្បន្នដើម្បីអភិវឌ្ឍសេដ្ឋកិច្ចខេត្តយើង។

ក្នុងឱកាសនោះឯកឧត្តម អភិបាលខេត្ត ក៏បានឧបត្ថម្ភជាថវិការ សម្ភារមួយចំនួនដល់បងប្អូន សម្រាប់ ចូលរួមក្នុងពិធីបុណ្យភ្ជុំបិណ្ឌ ជួបជុំគ្រួសារផងដែរ៕

ដោយ ឆាយ ម៉ុត