AKP ភ្នំពេញ ថ្ងៃទី១៩ ខែកញ្ញា ឆ្នាំ២០២៥-- ក្រុមប្រតិបត្តសាខា រួមជាមួយអនុសាខាកាកបាទក្រហមកម្ពុជាស្រុកបារាយណ៍ ខេត្តកំពង់ធំ សហការជាមួយមន្ទីរសាធារណ:ការ និងដឹកជញ្ជូនខេត្ត  ការិយាល័យសុវត្ថិភាពចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ធំ យុវជនកាកបាទក្រហម និងអ្នកស្ម័គ្រចិត្ត ព្រឹកថ្ងៃទី១៩ ខែកញ្ញា  ឆ្នាំ២០២៥ បានធ្វើយុទ្ធនាការផ្សព្វផ្សាយស្តីពីសុវត្ថិភាពចរាចរណ៍ផ្លូវគោកដល់ប្រជាពលរដ្ឋដែលបានធ្វើដំណើរឆ្លងកាត់ត្រង់ចំណុចមុខសាលាស្រុកបារាយណ៍ ខេត្តកំពង់ធំ ក្នុងគោលបំណងអប់រំផ្សព្វផ្សាយទៅដល់បងប្អូនប្រជាពលរដ្ឋដែលជាអ្នកប្រើប្រាស់ម៉ូតូដោយពុំមានពាក់មួកសុវត្ថិភាព និងអ្នកបើកបររថយន្តដោយពុំបានដាក់ខ្សែក្រវ៉ាត់ ជាពិសេសយានយន្តដែលពុំសូវមានភាពត្រឹមត្រូវទៅតាមលក្ខណៈបច្ចេកទេសឱ្យ បានយល់ដឹងពីបញ្ហាគ្រោះថ្នាក់ចរាចរណ៍ និងការចូលរួមដើម្បីកាត់បន្ថយគ្រោះថ្នាក់ចរាចរណ៍នៅក្នុងពេលបើកបរ។

អនុសាខាកាកបាទក្រហមកម្ពុជាស្រុកបារាយណ៍បានឱ្យដឹងថា ខ្លួនតែងតែធ្វើយុទ្ធនាការលើកកម្ពស់សុវត្ថិភាពចរាចរណ៍នេះជារៀងរាល់ឆ្នាំ ព្រោះកាកបាទក្រហមកម្ពុជាក៏ជាសមាជិកថ្នាក់ជាតិរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក និងដើម្បីឆ្លើយតបទៅនឹងផែនការជាតិសុវត្ថិភាពចរាចរណ៍ផ្លូវគោក   ឆ្នាំ២០២១-២០៣០ និងការអំពាវនាវរបស់រាជរដ្ឋាភិបាលកម្ពុជាសូមឱ្យស្ថាប័នពាក់ព័ន្ធរួមគ្នាចូលរួមកាត់បន្ថយអត្រាស្លាប់ របួសធ្ងន់ និងពិការដោយសារគ្រោះថ្នាក់ចរាចរណ៍ក្នុងព្រះរាជាណាចក្រកម្ពុជាតាមតែអាចធ្វើទៅបាន  ព្រោះគ្រោះថ្នាក់ចរាចរណ៍ជាបញ្ហាប្រឈមចម្បងមួយ ដោយបានសម្លាប់ប្រជាពលរដ្ឋខ្មែរជាច្រើនពាន់នាក់ក្នុង១ឆ្នាំៗ។

សម្រាប់ពិធីបុណ្យភ្ជុំបិណ្ឌប្រពៃណីជាតិខ្មែរ ដែលនឹងឈានមកដល់នៅពេលខាងមុខនេះអនុសាខាកាកបាទក្រហមកម្ពុជាស្រុកបារាយណ៍ ខេត្តកំពង់ធំ សូមឲ្យប្រជាពលរដ្ឋទាំងអស់ធ្វើដំណើរប្រកប ដោយសុវត្ថិភាព គោរពច្បាប់ចរាចរណ៍ ដើម្បីកាត់បន្ថយការគ្រោះថ្នាក់ និងការស្លាប់បាត់បងជីវិត៕

ដោយ៖ ចាន់ សុភឿន (ប្រភព៖ អនុសាខាកាកបាទក្រហមកម្ពុជាស្រុកបារាយណ៍)