AKP បន្ទាយមានជ័យ ថ្ងៃទី១៩ ខែកញ្ញា ឆ្នាំ២០២៥-- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញចុះសួរសុខទុក្ខប្រជាពលរដ្ឋ កងកម្លាំង និងព្រះសង្ឃ ដែលកំពុងសម្រាកព្យាបាលរបួសនៅមន្ទីរពេទ្យ កាលពីរសៀលថ្ងៃព្រហស្បតិ៍ ទី១៨ ខែកញ្ញា ឆ្នាំ២០២៥។ ក្រុមអ្នករងរបួសទាំងនេះបណ្ដាលមកពីការរំលោភបំពានរបស់កងកម្លាំងចម្រុះថៃ ដែលបានចូលមកបោះបង្គោល និងរាយបន្លាលួសក្នុងទឹកដីកម្ពុជានៅភូមិព្រៃចាន់ ឃុំអូរបីជាន់ ស្រុកអូរជ្រៅ។

ក្នុងដំណើរទស្សនកិច្ចដ៏កក់ក្ដៅនេះ ឯកឧត្តម ឌិត ទីណា បានពាំនាំនូវការផ្ដាំផ្ញើសាកសួរសុខទុក្ខយ៉ាងជ្រាលជ្រៅពី សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ សាររបស់ថ្នាក់ដឹកនាំទាំងពីរបានបង្ហាញពីក្ដីបារម្ភ និងការគាំទ្រចំពោះប្រជាពលរដ្ឋរងគ្រោះ ដែលបានប្រឈមមុខនឹងអំពើហិង្សាដោយគ្មានអាវុធ។

យោងតាមរបាយការណ៍របស់មន្ទីរសុខាភិបាលខេត្តបន្ទាយមានជ័យ មានពលរដ្ឋ កងកម្លាំងនគរបាល ទាហាន និងព្រះសង្ឃសរុប ២៩ អង្គ/រូប បានរងរបួសធ្ងន់និងស្រាលពីហេតុការណ៍ដែលកើតឡើងនកាលពីរសៀលថ្ងៃទី១៧ ខែកញ្ញា ឆ្នាំ២០២៥។ របាយការណ៍បានបញ្ជាក់ថា កងកម្លាំងយោធាថៃបានអនុវត្ត "ច្បាប់ថៃនៅលើទឹកដីខ្មែរ" ដោយបានបាញ់ឧស្ម័នបង្ហូរទឹកភ្នែក ប្រើចំពាមកៅស៊ូ និងឧបករណ៍សំឡេងរំខានផ្សេងទៀត ដែលបង្កឱ្យមានរបួសដល់ត្រចៀកផងដែរ។

ឯកឧត្តមរដ្ឋមន្ត្រីបានសង្កត់ធ្ងន់ថា រាជរដ្ឋាភិបាលកម្ពុជារក្សាជំហរដោះស្រាយវិវាទនេះដោយសន្តិវិធី ស្របតាមច្បាប់អន្តរជាតិ។ ឯកឧត្តមក៏បានជំរុញឱ្យភាគីទាំងសងខាងរក្សាបទឈប់បាញ់ និងបន្ធូរបន្ថយស្ថានការណ៍ ដើម្បីស្ដារសន្តិភាព និងស្ថិរភាពក្នុងតំបន់ ព្រមទាំងធានាសុខមាលភាពសម្រាប់ប្រជាជនទាំងសងខាង។

ជាចុងក្រោយ ឯកឧត្តម ឌិត ទីណា បានអំពាវនាវដល់ប្រជាពលរដ្ឋឱ្យរក្សាភាពអត់ធ្មត់ និងជឿទុកចិត្តលើកិច្ចខិតខំប្រឹងប្រែងរបស់រាជរដ្ឋាភិបាល។ រាជរដ្ឋាភិបាលនឹងបន្តដោះស្រាយបញ្ហាដោយសន្តិវិធី ដើម្បីឱ្យប្រជាពលរដ្ឋអាចវិលត្រឡប់ទៅផ្ទះសម្បែងវិញដោយសុវត្ថិភាព៕

ដោយ ឈុន សារ៉ាត