AKPកំពង់ធំ ថ្ងៃទី០៩ ខែកញ្ញា ឆ្នាំ២០២៥--លោក សាយ គឹមឡម អភិបាលស្រុកស្ទោងបានអំពាវនាវដល់ពលរដ្ឋក្នុងមូលដ្ឋានត្រូវជួយថែរក្សាដើមឈើនិងសមិទ្ធផលនានា ដែលអាជ្ញាធរធរនិងរាជរដ្ឋាភិបាលបានកសាងជូនក្នុងឱកាសដែរលោកនិងក្រុមការងារចុះពិនិត្យមើលការដាំដើមក្ងោកចំនួន២០០ដើម នៅសងខាងនៅជាតិលេខ៦ក្នុងភូមិសាស្ត្រឃុំសំព្រោជស្រុកស្ទោងខេត្តកំពង់ធំនាព្រឹកថ្ងៃទី០៩ ខែកញ្ញា ឆ្នាំ២០២៥។

លោកសាយ គឹមឡមបានបញ្ជាក់ថាក្រោយពីដាំដើមឈើរួចរាល់ជាស្ថាពរវាគឺជាផ្នែកមួយបន្ថែមទៀតក្នុងការលើកកម្ពស់សោភ័ណភាពស្រុកស្ទោងនិងចូលរួមទាក់ទាញភ្ញៀវទេសចរ ព្រមទាំងលើកកម្ពស់ខឿនសេដ្ឋកិច្ចមូលដ្ឋាន និងសេដ្ឋកិច្ចជាតិមួយផ្នែកផងដែរ ហើយប្រជាពលរដ្ឋអាចដាំដើមឈើ តាមភូមិឋានរបស់ខ្លួនជាលក្ខណៈគ្រួសារ ជាឈើហូបផ្លែ ជាឈើយកម្លប់ឬឈើប្រណីតជាដើម នៅតាមទីសាធារណៈនានា ក៏ដូចជាសាលារៀន វត្តអារាម និងទីទួលបុរាណដ្ឋានផ្សេងៗ។

លោក សាយ គឹមឡម បានគោរពថ្លែងអំណរគុណយ៉ាងជ្រៅជ្រៅបំផុតដល់ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំតែងតែណែនាំចង្អុលបង្ហាញលើការលើកកម្ពស់ ការអភិវឌ្ឍស្រុកស្ទោងទាំងមូលក៏ដូចជាការរៀបចំសោភ័ណភាព បរិស្ថាន ជាពិសេសការដាក់បំពាក់សូឡាបំភ្លឺផ្លូវ និងដាំដើមក្ងោកជាច្រើនពាន់ដើមយ៉ាងស្រស់បំព្រងនៅតាមដងផ្លូវជាតិលេខ៦ ដែលជាផ្លូវដ៏សំខាន់មួយសម្រាប់ភ្ជាប់ពីទីរួមខេត្តកំពង់ធំ ទៅខេត្តសៀមរាប ហើយជាផ្លូវសេដ្ឋកិច្ច និងទេសចរណ៍ដ៏សំខាន់។

សូមបញ្ជាក់ថា ការដាំដើមក្ងោកនៅព្រឹកនេះមានចំនួន២០០ដើម ហើយស្រុកស្ទោងគ្រោងដាំដើមក្ងោកលាតសន្ធឹងតាមដងផ្លូវជាតិលេខ៦ប្រវែងជិត៤០គីឡូម៉ែត្រពីព្រំប្រទល់ស្រុកកំពង់ស្វាយ ខេត្តកំពង់ធំ រហូតដល់ព្រំប្រទល់ស្រុកជីក្រែងខេត្តសៀមរាប៕ដោយ៖ ស៊ុម វណ្ណា