AKPកំពង់ធំថ្ងៃទី០៩ ខែកញ្ញា ឆ្នាំ២០២៥--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤នាព្រឹកថ្ងៃទី០៩ខេត្តកញ្ញាឆ្នាំ២០២៥បានរៀបចំពិធី បំពាក់ឋានន្តរសក្កិ និងប្រកាសសេចក្តីសម្រេច តែងតាំងផ្កាស់ប្តូរមុខងារ ភារកិច្ច ជូននាយទាហាន នាយទាហានរង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិភាគទី៤ក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។

លោកអនុសេនីយ៍ឯក សេង មករា នាយរងការិយាល័យទី១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានសេចកីសម្រេច ស្ដីពីការតម្លើងឋានន្តរសក្កិ និងសេចកី្តសម្រេចស្ដីពីការតែងតាំងផ្លាស់ប្ដូរមុខងារភារកិច្ចនាយទាហាន នាយទាហានរង តាមសិទ្ធិសម្រេចរបស់ឯកឧត្តមនាយឧត្តមសេនីយ៍ អគ្គមេបញ្ជាការនៃកងយោធពលខេមរភូមិន្ទ និងសិទ្ធិសម្រេចរបស់ឯកឧត្តម នាយឧត្តមសេនីយ៍ អគ្គមេបញ្ជាការរង មេបញ្ជាការកងទ័ពជើងគោក សរុបចំនួន៣៥នាក់  ។

បន្ទាប់ពីការ ផ្តល់​កិត្តិយស​ បំពាក់ឋានន្តរស័ក និងប្រគល់សេចកីសម្រេច តែងតាំងផ្លាស់ប្ដូរមុខងារជូនយោធិនរួចមក ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងនូវការគោរពនិងថ្លែងអំណរគុណដ៍ជ្រាលជ្រៅជាទីបំផុត ចំពោះឯកឧត្តម ឧត្តមសេនីយ៍ឯក មេបញ្ជាការរងកងទ័ពជេីងគោក​ មេបញ្ជាការ​យោធភូមិភាគទី៤,ឯកឧត្តមនាយឧត្តមសេនីយ៍ អគ្គមេបញ្ជាការរង មេបញ្ជាការកងទ័ពជើងគោក និងឯកឧត្តមនាយឧត្តមសេនីយ៍ អគ្គមេបញ្ជាការនៃកងយោធពលខេមរភូមិន្ទ ដែលបានផ្ដល់សេចក្ដីទុកចិត្ត សម្រេចដំឡើងឋានន្តរសក្កិ និងតែងតាំងផ្លាស់ប្ដូរមុខងារភារកិច្ច​ជូន​យោធិន​ នៃ​បញ្ជាការ​ដ្ឋាន​តំបន់​ប្រតិបត្តិការ​សឹក​រង​កំពង់​ធំ​ ស្របតាមរចនាសម្ព័ន្ធចាត់តាំងនិងផែនការកំណែទម្រង់របស់កងយោធពលពលខេមរភូមិន្ទ ។

ឧត្តមសេនីយ៍ទោ សោម ស៊ុន បានណែនាំដល់យោធិនដែលត្រូវបានបំពាក់ឋានន្តរសក្ដិថ្មី និងនាយទាហាន នាយទាហានរង ដែលបានប្រកាសតែងតាំងផ្លាស់ប្ដូរមុខងារភារកិច្ចថ្មី​នៅ​ពេល​នេះ​ ត្រូវខិតខំយកចិត្តទុកដាក់ ក្នុងការបំពេញភារកិច្ចជូនអង្គភាព ឱ្យសម្រេចបានតាមផែនការដែលថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងគណៈបញ្ជាការឯកភាពរដ្ឋបាលខេត្តបានប្រគល់ជូន ពិសេសត្រូវស្មោះត្រង់ចំពោះជាតិ សាសនា ព្រះមហាក្សត្រនឹងត្រូវប្ដេជ្ញាចិត្តដាច់ខាត​ ក្នុងកាតព្វកិច្ចការពារជាតិ ការពារបូរណភាពទឹកដី និងការពាររាជរដ្ឋាភិបាលស្របច្បាប់ដែលប្រសូតចេញពីការបោះឆ្នោត ។

ឧត្តមសេនីយ៍ទោ សោម ស៊ុន ក៏បានសំណូមពរដល់យោធិនផ្សេងទៀត ដែលមិនទាន់បានទទួលឋានន្តរសក្តិថ្មី​ ត្រូវខិតខំប្រឹងប្រែងបំពេញភារកិច្ចបន្ថែមទៀត ដើម្បីទទួលបានការផ្ដល់ទំនុកចិត្ត និងបំពាក់ឋានន្តរសក្តិតាមមុខតំណែងតួនាទីភារកិច្ចនិងរបបកំណត់តាមឆ្នាំនៃការតម្លើងឋានន្តរសក្តិ តាមថ្នាក់នីមួយៗ ដែលមានចែងនៅក្នុងច្បាប់ស្ដីពីលក្ខន្តិកៈរបស់កងយោធពលខេមរភូមិន្ទ៕

ដោយ៖ ស៊ុម វណ្ណា, ប្រភពតំបន់ប្រតិបត្តិការសឹករងកំពង់ធំ