AKP បន្ទាយមានជ័យ ថ្ងៃទី០៩ ខែកញ្ញា ឆ្នាំ២០២៥ -- លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានអញ្ជើញជាអធិបតីភាពក្នុងពិធីដ៏មានសារៈសំខាន់មួយ ដើម្បីផ្សព្វផ្សាយសេចក្តីណែនាំ ស្តីពីការប្រមូលទិន្នន័យពលរដ្ឋធ្វើទេសន្តរប្រវេសន៍ និងកុមារក្នុងគ្រួសារទេសន្តរប្រវេសន៍។ ពិធីនេះត្រូវបានរៀបចំឡើងនៅសាលាខេត្តបន្ទាយមានជ័យ រយៈពេលមួយថ្ងៃពេញ នាថ្ងៃទី០៩ ខែកញ្ញា ឆ្នាំ២០២៥ នេះ។

ពិធីនេះមានការចូលរួមយ៉ាងផុសផុលពីបណ្តាអ្នកពាក់ព័ន្ធជាច្រើន រួមមានតំណាងអង្គការដៃគូ ក្រុមការងារប្រធានលេខាធិការដ្ឋាន គណៈកម្មាធិការប្រយុទ្ធប្រឆាំងអំពើជួញដូរមនុស្សពីបណ្តាខេត្តជុំវិញដូចជាខេត្តបាត់ដំបង សៀមរាប ឧត្តរមានជ័យ និងប៉ៃលិន។ លើសពីនេះទៀត ក៏មានវត្តមានរបស់លោក លោកស្រីអភិបាលរងក្រុង-ស្រុកទាំង៩ ក្នុងខេត្តបន្ទាយមានជ័យ ដែលទទួលបន្ទុកការងារប្រយុទ្ធប្រឆាំងអំពើជួញដូរមនុស្សផងដែរ។

ក្នុងឱកាសនោះ លោកជំទាវ ជូ ប៊ុនអេង បានសង្កត់ធ្ងន់ពីសារៈសំខាន់នៃការប្រមូលទិន្នន័យពលរដ្ឋទេសន្តរប្រវេសន៍ និងកុមារក្នុងគ្រួសារទេសន្តរប្រវេសន៍ ដែលជាកត្តាចាំបាច់ក្នុងការការពារ និងផ្តល់ជំនួយដល់ពួកគេ។

លោកជំទាវបានមានប្រសាសន៍ថា "ការងារនេះមានសារៈសំខាន់ណាស់ ព្រោះទិន្នន័យត្រឹមត្រូវជាមូលដ្ឋានគ្រឹះក្នុងការរៀបចំផែនការ និងដាក់ចេញនូវគោលនយោបាយប្រកបដោយប្រសិទ្ធភាព ដើម្បីឆ្លើយតបនឹងបញ្ហាប្រឈមនានាដែលពលរដ្ឋ និងកុមារទេសន្តរប្រវេសន៍កំពុងជួបប្រទះ។ យើងត្រូវមានកិច្ចសហការយ៉ាងជិតស្និទ្ធរវាងភាគីពាក់ព័ន្ធទាំងអស់ ចាប់ពីថ្នាក់ជាតិដល់ថ្នាក់មូលដ្ឋាន ទាំងអាជ្ញាធរ អង្គការដៃគូ និងសហគមន៍ ដើម្បីប្រមូលទិន្នន័យឱ្យបានគ្រប់ជ្រុងជ្រោយ និងត្រឹមត្រូវតាមសភាពការណ៍ជាក់ស្តែង។ ការប្រមូលទិន្នន័យនេះមិនត្រឹមតែជួយការពារពលរដ្ឋយើងពីការជួញដូរ ឬការកេងប្រវ័ញ្ចប៉ុណ្ណោះទេ តែវាក៏ជួយឱ្យយើងអាចផ្តល់សេវាចាំបាច់ផ្សេងៗដូចជា ការអប់រំ ការថែទាំសុខភាព និងការគាំពារសង្គមផ្សេងៗដល់កុមារដែលនៅសេសសល់ក្នុងគ្រួសារទេសន្តរប្រវេសន៍បានទាន់ពេលវេលាផងដែរ"។

ជាមួយគ្នានោះ លោកជំទាវបានជំរុញឱ្យគ្រប់ភាគីពាក់ព័ន្ធទាំងអស់រួមគ្នាអនុវត្តការងារនេះដោយយកចិត្តទុកដាក់ និងមានប្រសិទ្ធភាពខ្ពស់ ដើម្បីសម្រេចបាននូវគោលដៅរួម គឺការកាត់បន្ថយហានិភ័យ និងលើកកម្ពស់សុវត្ថិភាពជូនពលរដ្ឋកម្ពុជាដែលធ្វើទេសន្តរប្រវេសន៍ ក៏ដូចជាកុមារដែលរស់នៅក្នុងគ្រួសារទាំងនោះ៕

ដោយ: ឈុនសារ៉ាត