AKP តាកែវ ថ្ងៃទី0៩ ខែកញ្ញា ឆ្នាំ២០២៥ -- កាលពីព្រឹកថ្ងៃចន្ទ ១រោច ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០៨ ខែកញ្ញា ឆ្នាំ២០២៥ នៅក្នុងបរិវេណសាលាក្រុងដូនកែវខេត្តតាកែវ បានរៀបចំពិធីជួបសំណេះសំណាល និងសាកសួរសុខទុក្ខជាមួយ អ៊ុ ពូ មីង មន្ត្រីរាជការចូលនិវត្តន៍ដែលធ្លាប់បម្រើការងារនៅសាលាក្រុងដូនកែវ នៅក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌប្រពៃណីជាតិខ្មែរ។ អញ្ជើញជាអធិបតីក្នុងពិធីនោះដោយលោក កង អាណាន់ អភិបាលនៃគណៈអភិបាលក្រុងដូនកែវ ខេត្តតាកែវ ព្រមទាំងមានការអញ្ជើញចូលរួមពីថ្នាក់ដឹកនាំមន្ត្រីរាជការ កងកម្លាំងប្រដាប់អាវុធចំណុះរដ្ឋបាលក្រុងដូនកែវ និងអ៊ុ ពូ មីង មន្ត្រីរាជការចូលនិវត្តន៍ចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ លោក កង អាណាន់ អភិបាលនៃគណៈអភិបាលក្រុងដូនកែវ បានសម្ដែងការដឹងគុណ និងអរគុណនូវគុណបំណាច់របស់ អ៊ុ ពូ មីង មន្រ្តីរាជការចូលនិវត្តន៍ ដែលធ្លាប់បម្រើការងារនៅសាលាក្រុងដូនកែវ។ ពួកគាត់ធ្លាប់បានលះបង់នូវកម្លាំងកាយចិត្ត ប្រាជ្ញាស្មារតីក្នុងកិច្ចការកសាងមាតុភូមិឱ្យមានការអភិវឌ្ឍរីកចម្រើន។ ហើយម្យ៉ាងទៀត ពួកគាត់បានបន្សល់ទុកនូវស្នារដៃជាកេរមរតកដ៏មានតម្លៃជាច្រើនរាប់មិនអស់បន្តឱ្យយុវជនជំនាន់ក្រោយ។ យើងខ្ញុំជាយុវជនជំនាន់ក្រោយ បានចងចាំទុកដោយមិនអាចបំភ្លេចបាននិងបន្តរៀនសូត្រពីគំរូវីរភាពនេះទុកជាបទពិសោធន៍សម្រាប់ធានាប្រសិទ្ធភាពក្នុងការបំពេញភារកិច្ចជូនជាតិមាតុភូមិក្នុងពេលបច្ចុប្បន្ន និងអនាគត។

លោក កង អាណាន់ អភិបាលក្រុងដូនកែវ បានមានប្រសាសន៍បន្តថា ចំពោះ អ៊ុ ពូ មីង ជាមន្ត្រីនិវត្តន៍ជន បានចូលរួមឆ្លងកាត់ការលំបាកក្នុងអតីតកាល និងបានរៀបចំស្ដារឡើងវិញនូវប្រព័ន្ធរដ្ឋបាលថ្មី។ នេះជាការចាប់ផ្ដើមដំបូងដោយឆ្លងកាត់ការលំបាក ជួបប្រទះព្យុះភ្លៀង ធ្វើឱ្យកម្ពុជាមានការអភិវឌ្ឍរីកចម្រើនមកដល់បច្ចុប្បន្ន។

លោកអភិបាលក្រុងដូនកែវ បានមានប្រសាសន៍បន្ថែមថា អ៊ុ ពូ មីង ទាំងអស់ សុទ្ធតែជាអ្នកត្រួសត្រាយផ្លូវសម្រាប់អ្នកបន្តវេនជំនាន់ក្រោយ។ យ៉ាងណាមិញ ទោះពេលនេះ អ៊ុ ពូ មីង បានចូលនិវត្តន៍ទៅតាមវ័យដែលច្បាប់បានកំណត់ តែជាការគិតគូររបស់រាជរដ្ឋាភិបាល មានគោលនយោបាយគាំទ្រជីវភាពសុខភាព អ៊ុ ពូ មីង ជានិច្ច ដោយបានតម្លើងប្រាក់សោធននិវត្តន៍ មិនឱ្យឃ្លាតគ្នាច្រើន ផ្ដល់បណ្ណថែរក្សាសុខភាពជូនគ្រប់គ្នា និងសេវាសង្គមកិច្ចផ្សេងៗទៀត។

នាឱកាសពិធីកាន់បិណ្ឌ-ភ្ជុំបិណ្ឌនាឆ្នាំនេះ យុវជនជំនាន់ក្រោយដែលជាគណៈអភិបាលក្រុង និងមន្ត្រីរាជការនៃរចនាសម្ព័ន្ធរបស់រដ្ឋបាលក្រុងដូនកែវទាំងអស់ សូមជូនពរចំពោះ អ៊ុ ពូ មីង សូមជួបនូវពុទ្ធពរជ័យទាំងឡាយ ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។លោកអភិបាលក្រុងដូនកែវក៏បានជូនភេសជ្ជៈដល់ អ៊ុ ពូ មីង មន្ត្រីរាជការចូលនិវត្តន៍ ក្នុងម្នាក់ៗទទួលបានទឹកក្រូច ១កេស ទឹកផ្លែឈើ ១កេស និងថវិកាមួយចំនួន៕

ដោយ៖ អ៊ុច សៀង