AKP បន្ទាយមានជ័យ ថ្ងៃទី0៩ ខែកញ្ញា ឆ្នាំ២០២៥ -- ឯកឧត្តម សុវណ្ណ សុភា និងឯកឧត្តម គ្រី សំណាង សមាជិកក្រុមប្រឹក្សាខេត្តបន្ទាយមានជ័យ បានដឹកនាំក្រុមការងារ និងពុទ្ធបរិស័ទយ៉ាងច្រើនកុះករអញ្ជើញចូលរួមពិធីសូត្រមន្តចម្រើនព្រះបរិត្ត និងវេរប្រគេនបច្ច័យចំនួន ៨លានរៀល ដល់ព្រះសង្ឃ ដែលគង់នៅវត្តទួលពង្រ ស្ថិតក្នុងសង្កាត់អូរឬស្សី ក្រុងប៉ោយប៉ែត ដើម្បីចូលរួមចំណែកកសាងសមិទ្ធផលនានាក្នុងវត្ត កាលពីរសៀលថ្ងៃចន្ទ ទី០៨ ខែកញ្ញា ឆ្នាំ២០២៥ ដែលត្រូវនឹងថ្ងៃកាន់បិណ្ឌវេនទី២។

ពិធីនេះក៏មានការអញ្ជើញចូលរួមពីសំណាក់ លោកជំទាវ លោកឧត្តមសេនីយ៍ត្រី ប៊ុន ផេង ស្នងការរងនគរបាលខេត្ត លោក ឆេង គឹមថុន ប្រធានប្រតិបត្តិសមាគមថ្នាលយុវជនកម្ពុជាប្រចាំសាខាខេត្តបន្ទាយមានជ័យ រួមទាំងអាជីវករ និងប្រជាពុទ្ធបរិស័ទជាច្រើនរូបផងដែរ។ ពិធីនេះបានប្រព្រឹត្តទៅយ៉ាងអធិកអធមនៅក្នុងឱកាសបុណ្យកាន់បិណ្ឌវេនទី២។

បន្ទាប់ពីចប់ពិធីសូត្រមន្តចម្រើនព្រះបរិត្ត ឯកឧត្តមគណៈអធិបតី រួមជាមួយពុទ្ធបរិស័ទ បានវេរប្រគេននូវបច្ច័យ និងតេយ្យទាន តេយ្យវត្ថុ ផ្សេងៗជូនដល់ព្រះសង្ឃ។ ក្នុងចំណោមនោះ បច្ច័យចំនួន ៨លានរៀល ដែលបានមកពីការប្រមូល និងគៀងគររបស់ឯកឧត្តម សុវណ្ណ សុភា និងឯកឧត្តម គ្រី សំណាង ត្រូវបានវេរប្រគេនដើម្បីចូលរួមចំណែកក្នុងការកសាងសមិទ្ធផលក្នុងវត្ត ជាពិសេស គឺសាលាបាលី ដែលកំពុងត្រូវការជំនួយ។

កាយវិការសប្បុរសធម៌នេះ បានបង្ហាញពីសទ្ធាជ្រះថ្លា និងការយកចិត្តទុកដាក់របស់ថ្នាក់ដឹកនាំចំពោះវិស័យព្រះពុទ្ធសាសនា។ ការចូលរួមនេះមិនត្រឹមតែបានរួមចំណែកដល់ការកសាងហេដ្ឋារចនាសម្ព័ន្ធក្នុងវត្តប៉ុណ្ណោះទេ តែវាក៏ជាការលើកស្ទួយដល់វិស័យអប់រំ និងការបណ្ដុះបណ្ដាលព្រះសង្ឃឱ្យមានចំណេះដឹងខ្ពស់ផងដែរ។

សូមបញ្ជាក់ថា បុណ្យភ្ជុំបិណ្ឌ ជាពិធីបុណ្យមួយដែលធំជាងគេនៅក្នុងចំណោមពិធីបុណ្យទាំងអស់ចំពោះអ្នកកាន់ព្រះពុទ្ធសាសនា។ ជារៀងរាល់ឆ្នាំ នៅពេលដល់ថ្ងៃខែដែលត្រូវប្រារព្ធ ពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម។ ទាំងនេះ គឺជាទម្លាប់មួយដែលគេនិយមធ្វើតៗគ្នារបស់ជនជាតិខ្មែរជាយូរមកហើយ។

ពិធីបុណ្យកាន់បិណ្ឌ និងភ្ជុំបិណ្ឌឆ្នាំ២០២៥ នេះ ប្រព្រឹត្តទៅចាប់ពីថ្ងៃ ១រោច ដល់ថ្ងៃ ១៥រោច ខែភទ្របទ ត្រូវនឹងថ្ងៃទី០៨ ដល់ថ្ងៃទី២៣ ខែកញ្ញា ឆ្នាំ២០២៥៕

ដោយ៖ ឈុនសារ៉ាត