AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៥–យន្តហោះរបស់ក្រុមអាកាសចរណ៍ជាតិ Air Cambodia ដឹកភ្ញៀវទេសចរមកពីប្រទេសចិនបានក្លាយជាជើងហោះហើរដំបូងបង្អស់ដែលបានទម្លាក់កង់ចុះចតនៅអាកាសយានដ្ឋានអន្តរជាតិតេជោ ខណៈដែលអាកាសយានដ្ឋានថ្មីសន្លាងមួយនេះបានដាក់ឱ្យដំណើរការនៅព្រឹកថ្ងៃទី០៩ ខែកញ្ញា ឆ្នាំ២០២៥ បន្ទាប់ពីអាកាសយាន្តដ្ឋានអន្តរជាតិភ្នំពេញដែលមានអាយុកាល៦៦ឆ្នាំ ត្រូវបិទលែងដំណើរការទាំងស្រុង កាលពីវេលាម៉ោង១២ រំលងអធ្រាត្រ ថ្ងៃទី០៨ ខែកញ្ញា ឆ្នាំ២០២៥ ដោយរាល់ប្រតិបត្តិការទាំងអស់ត្រូវផ្ទេរទាំងស្រុងទៅអាកាសយាន្តដ្ឋានអន្តរជាតិតេជោដែលទើបសាងសង់ថ្មីសន្លាង។

ការសាងសង់អាកាសយានដ្ឋានអន្តរជាតិតេជោនេះត្រូវបានប្រកាសឡើងកាលពីខែមករា ឆ្នាំ២០១៨ ដែលការសាងសង់អាកាសយានដ្ឋានអន្តរជាតិថ្មីនេះគឺជាសក្ខីកម្មនៃភាពរីកចម្រើនរបស់កម្ពុជា ដែលត្រូវ ធ្វើការពង្រីកនូវអាកាសយានដ្ឋានជាចាំបាច់ ដើម្បីទទួលជើងហោះហើរទាំងក្នុង និងក្រៅប្រទេស ដោយ អាកាសយានដ្ឋានអន្តរជាតិតេជោនេះជាប្រភេទអាកាសយានដ្ឋាន 4F ដែលមានសមត្ថភាពទទួលយន្ត ហោះធុនធំចុះចតបាន។ ជាមួយគ្នានេះ អាកាសយានដ្ឋានអន្តរជាតិតេជោមានសមត្ថភាពក្នុងការទទួល អ្នកដំណើរប្រមាណ១៣លាននាក់ ក្នុង១ឆ្នាំសម្រាប់ដំណាក់កាលទី១ ហើយអាចទទួលអ្នកដំណើររហូតដល់ ៣០លាននាក់ ក្នុង១ឆ្នាំ នៅដំណាក់កាលទី២ និងដំណាក់កាលទី៣ នៃការសាងសង់ត្រូវបានបញ្ចប់អាចទទួលអ្នកដំណើរបាន៥០លាននាក់ ក្នុង១ឆ្នាំ ចាប់ពីឆ្នាំ២០៥០តទៅ។

សូមជម្រាបជូនថា អាកាសយានដ្ឋានអន្តរជាតិតេជោមានទីតាំងស្ថិតនៅឃុំព្រែកស្លែង ស្រុកកណ្តាល ស្ទឹង ខេត្តកណ្តាល និងមួយផ្នែកស្ថិតក្នុងស្រុកបាទី ខេត្តតាកែវ មានផ្ទៃដីជាង ២៦០០ហិកតា ដែលគ្រោងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ សម្រាប់ដំណាក់កាលទី១ ដើម្បីទទួលអ្នកដំណើរផ្លូវអាកាសចេញ-ចូលប្រទេសកម្ពុជា៕

ដោយ៖ ចាន់ សុភឿន