AKP សៀមរាប ថ្ងៃទី០៨ ខែកញ្ញា ឆ្នាំ២០២៥ -- ការយកចិត្តទុកដាក់ដ៏ខ្ពង់ខ្ពស់ពីទុក្ខលំបាករបស់កងកម្លាំងការពារព្រំដែនគោក និងបងប្អូនប្រជាពលរដ្ឋភៀសសឹកចេញពីតំបន់ព្រំដែនកម្ពុជា-ថៃនោះ  ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានអញ្ជើញដឹកនាំប្រតិភូក្រសួងមហាផ្ទៃ នាំយកអំណោយជាគ្រឿងឧបភោគបរិភោគ និងសម្ភារៈប្រើប្រាស់ប្រគល់ជូនរដ្ឋបាលខេត្ត និងស្នងការដ្ឋាននគរបាលខេត្តសៀមរាប និងខេត្តឧត្តរមានជ័យ សម្រាប់ធ្វើការផ្គត់ផ្គង់ជូនដល់វរនគរបាលការពារព្រំដែនគោក និងប្រជាពលរដ្ឋជាជនភៀសសឹក ដែលបានភៀសខ្លួនចេញពីតំបន់ព្រំដែនកម្ពុជា-ថៃ មកស្នាក់នៅតាមមណ្ឌលសុវត្ថិភាពនៅក្នុងខេត្តសៀមរាប និងខេត្តឧត្តរមានជ័យ ដោយពិធីប្រគល់បានធ្វើឡើងនៅសាលាខេត្តសៀមរាប នារសៀលថ្ងៃទី០៨ ខែកញ្ញា ឆ្នាំ២០២៥ នេះ។  

អំណោយទាំងនេះរួមមាន អង្ករ ២០តោន មី ១០០កេសធំ ត្រីខ ១០០កេស គុយទាវកញ្ចប់ ១០០កេស ទឹកសុទ្ធ ២០០កេស និងថ្នាំបាញ់មូស ៤ពាន់ដប ដែលត្រូវប្រគល់ជូនដល់រដ្ឋបាលខេត្ត និងស្នងការដ្ឋាននគរបាលខេត្តសៀមរាប និងខេត្តឧត្តរមានជ័យ ដោយក្នុងមួយខេត្ត និងអង្គភាព ទទួលបានអង្ករ ៥តោន មី ២៥កេសធំ ត្រីខ ២៥កេស គុយទាវកញ្ចប់ ២៥កេស ទឹកសុទ្ធ ៥០កេស និងថ្នាំបាញ់មូស ១ពាន់ដប  ដើមី្បយកទៅប្រើប្រាស់ក្នុងការផ្គត់ផ្គង់ដល់កងកម្លាំងនគរបាលការពារព្រំដែន និងប្រជាពលរដ្ឋជាជនភៀសសឹកដែលកំពុងស្នាក់នៅតាមមណ្ឌលសុវត្តិភាពក្នុងខេត្តរបស់ខ្លួន៕

ដោយ៖ ឃុត សៅ