AKP ភ្នំពេញ ថ្ងៃទី០៨ ខែកញ្ញា ឆ្នាំ២០២៥ --សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានចូលរួមកាន់បិណ្ឌវេនទី១ នៅវត្តមុនីសុវណ្ណ ហៅវត្តចំពុះក្អែក តាមទំនាមទម្លាប់ប្រពៃណីជាតិខ្មែរ  នាព្រឹកថ្ងៃចន្ទ ១១រោច ខែភទ្រ បទ ឆ្នាំម្សាញ់ សប្តស័កព.ស.២៥៦៩ ត្រូវនឹងថ្ងៃទី៨ ខែកញ្ញា ឆ្នាំ២០២៥។

សម្តេចកិត្តិសង្គហបណ្ឌិត ម៉ែន សំអន បានបញ្ជាក់ដែរថា៖ពិធីបុណ្យកាន់បិណ្ឌ គឺជាពិធីបុណ្យសាសនាដ៏ធំមួយក្នុង ចំណោមពិធីបុណ្យផ្សេងៗទៀត ដែលប្រជាពលរដ្ឋខ្មែរ តែងគោរព ប្រណិប័តន៍ ដើម្បីរំលឹក និងឧទិ្ទសកុសលដល់សាច់ញាតិ មាតាបិតា បុព្វការីជនដែលបានលាចាកទៅលោកខាងមុខ។ ប្រជាពលរដ្ឋភាគច្រើនបានយកម្ហូបអាហារ និងផ្លែឈើ នំចំណីទៅប្រគេនដល់ព្រះសង្ឃ នៅតាមវត្តអា រាមចាប់ពីថ្ងៃ១រោច ដល់ថ្ងៃ១៥រោច ខែភទ្របទ ដែលជាថ្ងៃឆ្លងបញ្ចប់ ឬគេហៅថា ថ្ងៃបុណ្យភ្ជុំបិណ្ឌ នៃពិធីបុណ្យភ្ជុំបិណ្ឌ ។

   សូមបញ្ជាក់ថា៖ វេនបុណ្យកាន់បិណ្ឌទី១ ដែលជាវេនកាន់បិណ្ឌរបស់ឧកញ៉ា តាំង គឹមថុង ព្រមទាំងក្រុមគ្រួសាររបស់លោក រួមជាមួយពុទ្ធបរិស័ទ្ធចំណុះជើងវត្ដ បានអញ្ជើញបត្ដិបត័ព្រះធម៌ សូត្រមន្ដ នមស្សកាចម្រើនព្រះបរិត្ដ រាប់បាត្រ ប្រគេនព្រះសង្ឃ បង្សុកូល ឧទ្ទិសកុសលផលបុណ្យជូនដល់វិញ្ញាណក្ខន្ធបុព្វការីជន មានមាតាបិតា ជីដូន ជីតា ញាតិកាទាំង៧សន្ដាន និងជូន ចំពោះវិញ្ញាណក្ខន្ធបុព្វ បុរសអ្នក ស្នេហាជាតិ ដែលបានពលី អាយុជីវិត ដើម្បីភាពគង់វង្សនៃបូរណភាពទឹកដី ជាតិមាតុភូមិឱ្យ ទទួលបានសុខសន្ដិភាព ភាពរីកចម្រើនសម្បូររុងរឿង ៕

  ដោយ៖ សួស សំរិត